Zɛfanaya 2:1-15
2 E neshɔn we nɔ gɛt wan shem,Una gɛda togɛda, una gɛda unasɛf.
2 Bifo di tin we Gɔd tɔk apin,Bifo di de pas lɛk chafchaf we briz de blo,Bifo Jiova pul in wamat pan una,Bifo di de we Jiova go vɛks pan una,
3 Lɛ ɔl di wan dɛn we ɔmbul na di wɔl luk fɔ Jiova,Dat na, di wan dɛn we de du wetin i se.
Una tray tranga wan fɔ du wetin rayt, una tray tranga wan fɔ ɔmbul.
Sɔntɛm* una go gɛt say fɔ ayd di de we Jiova go vɛks.
4 Di pipul dɛn na Gaza go kɔmɔt de;Ɛn Ashkɛlɔn go bi ples we pipul dɛn nɔ go de igen.
Dɛn go drɛb di pipul dɛn na Ashdɔd san santɛm,Ɛn dɛn go dɔnawe wit Ɛkrɔn kpatakpata.
5 “I go bad fɔ di wan dɛn we de nia di si, dat na, di Kɛritayt dɛn!
Jiova dɔn kɔndɛm una.
A go dɔnawe wit Kenan, di land usay di Filistin dɛn de,So dat nɔbɔdi nɔ go lɛf de.
6 Di ples we de nia di si go bi ples usay animal dɛn de it gras,I go gɛt wɛl dɛn fɔ shɛpad dɛn ɛn ston wɔl dɛn fɔ lɛ ship dɛn de insay.
7 I go bi ples fɔ di pipul dɛn na Juda we go sev;Na de dɛn go it.
Ivintɛm, dɛn go ledɔm na di os dɛn na Ashkɛlɔn.
Bikɔs Jiova we na dɛn Gɔd go tɔn in atɛnshɔn to dɛn,*Ɛn i go gɛda di wan dɛn we dɛn bin dɔn kapchɔ.”
8 “A dɔn yɛri di fityay wɔd dɛn we Moab de tɔk ɛn di bad wɔd dɛn we di Amɔnayt dɛn de tɔk,We dɛn de provok mi pipul dɛn ɛn de bost se dɛn go tek dɛn land.”
9 Jiova we gɛt bɔku bɔku sojaman dɛn, we na di Gɔd na Izrɛl, tɔk se:“So as lɔng as a de alayv,Moab go tan lɛk Sɔdɔm,Ɛn Amɔn go tan lɛk Gomɔra,
Di ples go gɛt chukchuk plant dɛn ɛn di dɔti go gɛt sɔl,I go lɛf so in pwɛl wan sote go.
Mi pipul dɛn we sev go tek dɛn prɔpati,
Ɛn di wan dɛn na mi neshɔn we sev go tek dɛn land.
10 Na dis go apin to dɛn fɔ di prawd we dɛn prawd,Bikɔs dɛn provok ɛn kak pan Jiova we gɛt bɔku bɔku sojaman dɛn in pipul dɛn.
11 Jiova go mek dɛn fred ɛn rɛspɛkt am;I go mek ɔl di gɔd dɛn na di wɔl nɔ gɛt wan yus,Ɛn ɔl di neshɔn dɛn we de na ayland dɛn go butu bifo* am,Frɔm usay dɛn de.
12 Una dɛn Itiopian dɛn, a go kil una wit mi sɔd.
13 I go strɛch in an na di nɔt pat ɛn dɔnawe wit Asiria,I go mek pipul dɛn nɔ de na Ninivɛ igen ɛn de go dray lɛk dɛzat.
14 Bɔku animal dɛn go ledɔm de, ɔlkayn wayl animal dɛn.
Di pɛlikan bɔd ɛn di pɔkyupayn go slip pan in pila dɛn we dɔn fɔdɔm.
Dɛn go yɛri vɔys de siŋ na di winda.
Tin dɛn we dɔn brok brok go de na di domɔt;I go mek dɛn si di sida wud we bin kɔba.
15 Na di siti dis we di wan dɛn we de de prawd ɛn dɛn nɔ de fred denja,We bin de tɔk na dɛn at se: ‘Wi siti na in wangren, no ɔda wan nɔ de we tan lɛk am.’
Naw ɛnibɔdi we si dɛn siti go shɔk,I dɔn bi ples usay wayl animal dɛn de ledɔm!
Ɛn ɛnibɔdi we pas nia dɛn siti go wisul ɛn mek in an di we we go sho se i shɔk.”
