Zɛfanaya 3:1-20
3 I go bad fɔ di siti we trangayes, we dɔti, ɛn we de sɔprɛs pipul dɛn!
2 I nɔ de yɛri nɔbɔdi in wɔd; i nɔ de tek kɔrɛkshɔn.
I nɔ abop pan Jiova; i nɔ de go nia in Gɔd.
3 In prins dɛn tan lɛk layɔn dɛn we de ala lawd wan.
In jɔj dɛn tan lɛk wulf dɛn na nɛt;Dɛn nɔ de ivin lɛf wan bon fɔ cham na mɔnin.
4 In prɔfɛt dɛn prawd, na man dɛn we pɔsin nɔ go abop pan.
In prist dɛn de dɔti wetin oli;Dɛn nɔ de rɛspɛkt di lɔ.
5 Jiova de na di siti, i de du wetin rayt; i nɔ de du ɛni bad tin.
Ɛni mɔnin, i de mek dɛn no in lɔ dɛn,Jɔs lɛk aw san de kɔmɔt ɛnide.
Bɔt di wan we nɔ de du wetin rayt nɔ gɛt wan shem.
6 “A dɔn dɔnawe wit neshɔn dɛn;
Nɔbɔdi nɔ de na di tawa dɛn we de kɔna na di wɔl.
A pwɛl di strit dɛn, nɔbɔdi nɔ de pas de.
Dɛn siti dɛn lɛf pwɛl pwɛl wan, nɔbɔdi nɔ de de.
7 A se: ‘Yu go mɔs fred mi ɛn tek kɔrɛkshɔn,’
So dat a nɔ go dɔnawe wit yu—A fɔ pɔnish yu fɔ ɔl dɛn tin ya.
Bɔt na di mɔ yu want fɔ du tin dɛn we kɔrɔpt.
8 Jiova se: ‘So una wet fɔ mi,Te di de we a go grap fɔ lut,Bikɔs di tin we a dɔn disayd na fɔ gɛda neshɔn dɛn ɛn kiŋdɔm dɛn,So dat a go pul mi vɛksteshɔn pan dɛn ɛn pul ɔl mi wamat pan dɛn;Bikɔs mi zil we tan lɛk faya go bɔn di wan ol wɔl.
9 Da tɛm de, a go chenj di pipul dɛn langwej to piɔ langwej,So dat dɛn ɔl go kɔl Jiova in nem,Fɔ lɛ dɛn gɛt wanwɔd we dɛn de sav am.’
10 Di pipul dɛn we de beg mi we dɛn dɔn skata go briŋ gift fɔ miFrɔm di eria we de nia di riva dɛn na Itiopia.
11 Da de de, yu nɔ go shemBikɔs ɔf ɔl di tin dɛn we yu du we yu tɔn yu bak pan mi,A go pul di wan dɛn we prawd ɛn we de bost kɔmɔt de;Ɛn yu nɔ go ɛva mek prawd igen na mi oli mawntin.
12 A go alaw di pipul dɛn we ɔmbulƐn di pipul dɛn we dɛn nɔ tek mek natin fɔ lɛf de,
Ɛn dɛn go luk to Jiova fɔ protɛkt dɛn.
13 Di wan dɛn we go lɛf pan di Izrɛlayt dɛn nɔ go du ɛnitin we nɔ rayt;Dɛn nɔ go lay, ɔ ful pɔsin;Dɛn go it ɛn ledɔm, ɛn nɔbɔdi nɔ go mek dɛn fred.”
14 E di pipul dɛn na Zayɔn, una ala wit gladi-at!
E di pipul dɛn na Izrɛl, una ala di we we de sho se una gladi!
E di pipul dɛn na Jerusɛlɛm, una gladi pasmak wit ɔl una at!
15 Jiova dɔn pul di pɔnishmɛnt pan una.
I dɔn mek una ɛnimi dɛn tɔn bak.
Jiova, di Kiŋ na Izrɛl, de wit una.
Una nɔ go fred trɔbul igen.
16 Da de de, dɛn go tɛl Jerusɛlɛm se:
“E di pipul dɛn na Zayɔn, una nɔ fred.
Lɛ una at nɔ pwɛl.
17 Jiova una Gɔd de wit una.
I pawaful, ɛn i go sev una.
I go gladi pasmak bikɔs ɔf una.
I go satisfay* we i sho una in lɔv.
I go ala we i de sho se i gladi fɔ una.
18 A go gɛda di wan dɛn we dɛn at pwɛl bikɔs dɛn nɔ ebul fɔ de fɔ una fɛstival dɛn;Dɛn nɔ bin de bikɔs dɛn bin de na ɔda land usay dɛn bin de provok dɛn.
19 Da tɛm de, a go dil wit ɔl di wan dɛn we de sɔprɛs una;Ɛn a go sev di wan dɛn we nɔ de waka fayn,A go gɛda di wan dɛn we dɛn dɔn skata.
A go mek dɛn femɔs ɛn mek dɛn prez dɛnNa ɔl di say dɛn we dɛn dɔn mek dɛn shem.”
20 Jiova se: “Da tɛm de, a go briŋ una kam bak,Da tɛm de, a go gɛda una pipul dɛn.
A go mek una femɔs to ɔl di pipul dɛn na di wɔl, ɛn a go mek dɛn prez unaWe a briŋ una pipul dɛn kam bak. Una go si we dat de apin.”
Futnot Dɛn
^ Ɔ “kwayɛt.”
