Zɛkaraya 1:1-21
1 Insay di sɛkɔn ia we Darayɔs de rul as kiŋ, insay di mɔnt we mek et, Jiova gi mɛsej to prɔfɛt Zɛkaraya.* Zɛkaraya na Bɛrakaya in bɔypikin, ɛn Bɛrakaya na Ido in bɔypikin. Gɔd tɛl Zɛkaraya se:
2 “Mi, Jiova bin vɛks bad bad wan pan una papa dɛn.”
3 Na dis Jiova we gɛt bɔku bɔku sojaman dɛn se: “Tɛl dɛn se Jiova we gɛt bɔku bɔku sojaman dɛn se: ‘Una kam bak to mi, ɛn a go kam bak to una. Na dis Jiova we gɛt bɔku bɔku sojaman dɛn se.’”
4 “Una nɔ tan lɛk una papa dɛn, we di prɔfɛt dɛn we bin de trade bin de tɛl se: ‘Na dis Jiova we gɛt bɔku bɔku sojaman dɛn se: “Duya, una lɛf di bad bad tin dɛn we una de du.”’”
Jiova se: “Dɛn nɔ lisin, ɛn dɛn nɔ pe atɛnshɔn to mi.”
5 “Usay una papa dɛn de naw? Fɔ se di prɔfɛt dɛn de sote go?
6 Bɔt mi wɔd dɛn ɛn lɔ dɛn we a tɛl mi savant dɛn, di prɔfɛt dɛn, fɔ tɔk apin to una papa dɛn, nɔto so?” So dɛn kam bak to mi ɛn tɔk se: “Jiova we gɛt bɔku bɔku sojaman dɛn dɔn dil wit wi akɔdin to di tin dɛn we wi du, jɔs lɛk aw i bin dɔn se i go du.”
7 Di de we mek 24 insay di mɔnt we mek 11, dat na, di mɔnt we nem Shibat,* insay di sɛkɔn ia we Darayɔs de rul as kiŋ, Jiova gi mɛsej to Zɛkaraya. Zɛkaraya na Bɛrakaya in pikin, ɛn Bɛrakaya na Ido in bɔypikin.
8 Zɛkaraya tɔk se: “A si wan vishɔn na nɛt. Wan man bin de rayd rɛd ɔs, ɛn i bin tinap usay di matul stik dɛn de na di vali, ɛn rɛd, brawn, ɛn wayt ɔs dɛn bin de biɛn am.”
9 So a aks se: “Mi masta, udat na dɛn wan ya?”
Di enjɛl we bin de tɔk wit mi ansa mi se: “A go sho yu udat na dɛn.”
10 Dɔn di man we tinap usay di matul stik dɛn de tɔk se: “Na di wan dɛn we Jiova sɛn fɔ waka waka na di wɔl.”
11 Ɛn dɛn tɛl Jiova in enjɛl we tinap usay di matul stik dɛn de se: “Wi dɔn go waka waka na di wɔl; di wan ol wɔl kwayɛt ɛn natin nɔ de ambɔg di wɔl.”
12 So Jiova in enjɛl aks Am se: “E Jiova we gɛt bɔku bɔku sojaman dɛn, aw lɔng yu go wet ɛn nɔ sho sɔri-at fɔ Jerusɛlɛm ɛn di siti dɛn na Juda, we yu dɔn vɛks pan fɔ 70 ia naw?”
13 Jiova ansa di enjɛl we bin de tɔk to mi; i yuz fayn wɔd dɛn fɔ ɛnkɔrej am.
14 Dɔn di enjɛl we bin de tɔk to mi tɛl mi se: “Ala lawd wan, ‘Na dis Jiova we gɛt bɔku bɔku sojaman dɛn se: “A gɛt pasmak zil fɔ Jerusɛlɛm ɛn fɔ Zayɔn.
15 A vɛks bad bad wan pan di neshɔn dɛn we nɔ gɛt natin we de wɔri dɛn, bikɔs a bin vɛks smɔl, bɔt dɛn dɔn ad pan di trɔbul.”’
16 “So na dis Jiova se: ‘A go sɔri fɔ Jerusɛlɛm bak, a go bil mi yon os insay de, ɛn dɛn go mɛzhɔ* Jerusɛlɛm fɔ bil am bak.’” Na dis Jiova we gɛt bɔku bɔku sojaman dɛn se.
17 “Ala lawd wan bak ɛn tɔk se: ‘Na dis Jiova we gɛt bɔku bɔku sojaman dɛn se: “Mi gudnɛs go bɔku bak na mi siti dɛn; ɛn mi, Jiova, go kɔrej Zayɔn bak ɛn pik Jerusɛlɛm bak.”’”
18 Dɔn a luk ɔp ɛn si 4 ɔn dɛn.
19 So a aks di enjɛl we de tɔk to mi se: “Wetin na dɛn wan ya?” I tɛl mi se: “Dis na di ɔn dɛn we skata di pipul dɛn na Juda, Izrɛl, ɛn Jerusɛlɛm.”
20 Dɔn Jiova sho mi 4 man dɛn we sabi wok wit dɛn an.
21 A aks se: “Wetin dɛn de kam du?”
I ansa mi se: “Dis na di ɔn dɛn we skata di pipul dɛn na Juda di kayn we we nɔbɔdi nɔ bin ebul fɔ es in ed ɔp. Dɛn ɔda wan ya go kam ɛn mek dɛn fred, ɛn dɛn go dɔnawe wit di neshɔn dɛn ɔn dɛn; di neshɔn dɛn we bin de yuz dɛn ɔn dɛn agens Juda, fɔ skata di pipul dɛn we de de.”
