Zɛkaraya 13:1-9
13 “Da de de, dɛn go dig wɛl fɔ Devid in famili ɛn fɔ di pipul dɛn na Jerusɛlɛm fɔ pul dɛn sin ɛn di dɔti we de pan dɛn.”
2 Jiova we gɛt bɔku bɔku sojaman dɛn se: “Da de de, a go pul di aydɔl dɛn na di land, ɛn dɛn nɔ go mɛmba dɛn igen; a go pul di prɔfɛt dɛn na di land ɛn di wan dɛn we de mek pipul dɛn du tin dɛn we nɔ klin na Gɔd in yay.
3 If wan man prɔfɛsay igen, in papa ɛn in mama we bɔn am go tɛl am se: ‘Yu go day, bikɔs yu de se na wetin Jiova tɛl yu nain yu de tɔk, bɔt na lay yu de lay.’ Ɛn in mama ɛn in papa we bɔn am go chuk am bikɔs ɔf di prɔfɛsay we i de prɔfɛsay.
4 “Da de de, ɔl di prɔfɛt dɛn go shem bikɔs ɔf dɛn vishɔn dɛn we dɛn de prɔfɛsay; ɛn dɛn nɔ go wɛr prɔfɛt klos we dɛn mek wit ia fɔ ful pipul dɛn.
5 Ɛn ich wan pan dɛn go tɔk se: ‘Mi nɔto prɔfɛt. Mi na fama, bikɔs wan man bay mi we a bin yɔŋ.’
6 Ɛn if sɔmbɔdi aks am se: ‘Us wund dɛn dis we de bitwin yu sholda* dɛn?’ i go ansa am se: ‘Na mi padi* dɛn os a gɛt dɛn wund ya.’”
7 Jiova we gɛt bɔku bɔku sojaman dɛn se:“E sɔd, grap ɛn atak mi shɛpad, atak di man we na mi padi,
Atak di shɛpad ɛn lɛ di ship dɛn skata;Ɛn a go kɔrɛkt di wan dɛn we nɔ impɔtant.”
8 Jiova se: “Na ɔl di land,We yu kɔnt tri pipul dɛn, dɛn go kil tu pan dɛn;Na wan nɔmɔ go lɛf.
9 Ɛn a go mek di wan dɛn we lɛf pas insay faya;A go klin dɛn lɛk we dɛn de klin silva,Ɛn tɛst dɛn lɛk we dɛn de tɛst gold.
Dɛn go kɔl mi nem,Ɛn a go ansa dɛn.
A go se: ‘Na mi pipul dɛn,’
Ɛn dɛn go se: ‘Jiova na wi Gɔd.’”
Futnot Dɛn
^ Insay Ibru, “bitwin yu an?” Dat na, na di chɛst ɔ na di bak.
^ Ɔ “Na di wan dɛn we lɛk mi.”
