Zɛkaraya 14:1-21
14 “Di de de kam, we na Jiova in de, we dɛn go sheb di prɔpati dɛn we dɛn tek frɔm yu;* dɛn go sheb dɛn usay dɛn tek dɛn.
2 A go gɛda ɔl di neshɔn dɛn fɔ fɛt Jerusɛlɛm; dɛn go kapchɔ di siti, lut di os dɛn, ɛn rep di uman dɛn. Ɛn dɛn go kɛr go af ɔf di pipul dɛn we de na di siti, bɔt dɛn go lɛf di ɔda wan dɛn.
3 “Jiova go fɛt dɛn neshɔn dɛn de jɔs lɛk aw i kin fɛt di de fɔ wɔ.
4 Da de de, i go put in fut dɛn na Mawnt Ɔliv, we fesin Jerusɛlɛm na di ist; ɛn Mawnt Ɔliv go plit midul, frɔm di ist* to di wɛst,* ɛn mek wan big big vali; ɛn af pat pan di mawntin go go na di nɔt, ɛn af pat go go na di sawt.
5 Una go rɔn go na di vali usay mi mawntin dɛn de, bikɔs di vali usay di mawntin dɛn de go go te rich Ezɛl. Una go rɔn go de jɔs lɛk aw una bin rɔn bikɔs ɔf di atkwek we bin apin insay di tɛm we Kiŋ Uzaya bin de rul Juda. Ɛn Jiova mi Gɔd go kam, ɛn ɔl di oli wan dɛn go de wit am.
6 “Da de de, layt we na valyu tin nɔ go de—tin dɛn go kek.*
7 Ɛn i go bi de we dɛn go no as Jiova in de. I nɔ go bi de, i nɔ go bi nɛt; ɛn ivintɛm, layt go de.
8 Da de de, wata we de gi layf go kɔmɔt na Jerusɛlɛm, af go go na di si* we de na di ist ɛn af go go na di si* we de na di wɛst. I go apin insay dray sizin ɛn insay kol sizin.
9 Ɛn Jiova go bi Kiŋ fɔ di wan ol wɔl. Da de de, na Jiova in wangren dɛn go wɔship, ɛn na in nem nɔmɔ dɛn go prez.
10 “Di wan ol land go tan lɛk di Araba, frɔm Giba to Rimɔn we de na di sawt pat na Jerusɛlɛm; ɛn Jerusɛlɛm go ay ɛn pipul dɛn go de de, frɔm Bɛnjamin in Get te rich na di Fɔs Get, te go na di Kɔna Get, ɛn frɔm Ananɛl in Tawa te go na di say dɛn we dɛn de kwis greps fɔ di kiŋ.
11 Ɛn pipul dɛn go de de; ɛn nɔbɔdi nɔ go kɔndɛm di siti igen fɔ lɛ dɛn pwɛl am, ɛn pipul dɛn go de sef wan na Jerusɛlɛm.
12 “Na dis we Jiova go pɔnish ɔl di pipul dɛn we fɛt wɔ agens Jerusɛlɛm: Dɛn bɔdi go rɔtin we dɛn tinap, dɛn yay go lɛf pan dɛn i rɔtin, ɛn dɛn tɔŋ go rɔtin na dɛn mɔt.
13 “Da de de, Jiova go ib kɔnfyushɔn midul dɛn; ɛn ɔlman go ol in kɔmpin in an, ɛn atak in kɔmpin.
14 Juda insɛf go de pan di wɔ na Jerusɛlɛm; dɛn go gɛda di jɛntri na ɔl di neshɔn dɛn we de rawnd dɛn, dɛn go gɛda bɔku bɔku gold, silva, ɛn klos dɛn.
15 “Ɛn da sem kayn pɔnishmɛnt go kam pan di ɔs dɛn, di myul* dɛn, di kamɛl dɛn, di dɔnki dɛn, ɛn ɔl di animal dɛn we de insay dɛn kamp dɛn de.
16 “Ɔl di wan dɛn we lɛf pan ɔl di neshɔn dɛn we atak Jerusɛlɛm go go ɔp na Jerusɛlɛm ɛni ia fɔ wɔship* di Kiŋ we na Jiova we gɛt bɔku bɔku sojaman dɛn, ɛn fɔ sɛlibret di Bafa Fɛstival.
17 Bɔt if ɛnibɔdi pan di famili dɛn na di wɔl nɔ go ɔp na Jerusɛlɛm fɔ go wɔship di Kiŋ, we na Jiova we gɛt bɔku bɔku sojaman dɛn, no ren nɔ go kam to dɛn.
18 Ɛn if di pipul dɛn na Ijipt nɔ kam ɔp ɛn dɛn nɔ kam insay, no ren nɔ go kam to dɛn. Bifo dat, dɛn go gɛt di pɔnishmɛnt we Jiova gi di neshɔn dɛn we nɔ kam ɔp fɔ kam sɛlibret di Bafa Fɛstival.
19 Dis na di pɔnishmɛnt we go kam pan Ijipt ɛn ɔl di neshɔn dɛn we nɔ kam ɔp fɔ sɛlibret di Bafa Fɛstival bikɔs dat na sin.
20 “Da de de, dɛn go rayt pan di ɔs dɛn bɛl dɛn se ‘Olinɛs na Jiova in kwaliti!’ Ɛn di pɔt* dɛn we dɛn de yuz fɔ kuk na Jiova in os go tan lɛk di bol dɛn bifo di ɔlta.
21 Ɛn ɔl di pɔt* dɛn we dɛn de yuz fɔ kuk na Jerusɛlɛm ɛn Juda go oli, ɛn na Jiova we gɛt bɔku bɔku sojaman dɛn go gɛt dɛn, ɛn ɔl di wan dɛn we de sakrifays go kam ɛn yuz sɔm pan dɛn fɔ bwɛl bif. Da de de, no Kenanayt* nɔ go de igen na Jiova we gɛt bɔku bɔku sojaman dɛn in os.”
Futnot Dɛn
^ Dat na, di siti we dɛn tɔk bɔt na vas 2.
^ Ɔ “usay di san de kɔmɔt.”
^ Insay Ibru, “di si.”
^ Ɔ “nɔ go muv,” lɛk we kol kin mek sɔntin stif.
^ Dat na, di Dɛd Si.
^ Dat na, di Mɛditarenian Si.
^ Myul na animal we man dɔnki ɛn uman ɔs bɔn.
^ Insay Ibru, “butu bifo.”
^ Ɔ “big pɔt.”
^ Ɔ “big pɔt.”
^ Ɔ i kin bi, “biznɛsman.”
