Zɛkaraya 2:1-13
2 Dɔn a luk ɔp ɛn si wan man ol rop fɔ mɛzhɔ.
2 So a aks am se: “Usay yu de go?”
I tɛl mi se: “A de go mɛzhɔ Jerusɛlɛm, fɔ si aw i wayd ɛn aw i lɔng.”
3 Na de di enjɛl we bin de tɔk wit mi go, ɛn wan ɔda enjɛl kam mit am.
4 Dɔn i tɛl am se: “Rɔn go yanda ɛn tɛl da yɔŋman se: ‘Bikɔs ɔf ɔl di pipul dɛn ɛn animal dɛn we go de na Jerusɛlɛm, Jerusɛlɛm go tan lɛk vilej dɛn we nɔ gɛt wɔl.
5 Ɛn a go tan lɛk wɔl we na faya rawnd am, ɛn a go de de wit ɔl mi glori.’ Na dis Jiova se.”
6 Jiova se: “Una kam! Una kam! Una rɔnawe kɔmɔt na di land we de na di nɔt.”
Jiova se: “A dɔn skata una na di ist, wɛst, nɔt, ɛn sawt.”*
7 “Lɛ di pipul dɛn na Zayɔn kam! Una we de na Babilɔn, una ɛskep.
8 Afta Jiova we gɛt bɔku bɔku sojaman dɛn dɔn gɛt glori, i sɛn mi to di neshɔn dɛn we bin de lut una ɛn na dis i se: ‘Ɛnibɔdi we tɔch una de tɔch mi bɔlyay.
9 A go jɔj dɛn, ɛn dɛn yon slev dɛn go lut dɛn.’ Ɛn una go no fɔ tru se na Jiova we gɛt bɔku bɔku sojaman dɛn dɔn sɛn mi.”
10 Jiova se: “E di pipul dɛn na Zayɔn, una ala fɔ sho se una gladi bikɔs a de kam ɛn a go de wit una.
11 Bɔku neshɔn dɛn go kam to mi, Jiova, da de de, ɛn dɛn go bi mi pipul dɛn; ɛn a go de wit una.” Ɛn una go no se Jiova we gɛt bɔku bɔku sojaman dɛn dɔn sɛn mi to una.
12 Jiova go tek Juda as in prɔpati na di grɔn we oli, ɛn i go pik Jerusɛlɛm bak.
13 Lɛ ɔlman sɛt mɔt bifo Jiova, bikɔs i de du sɔntin frɔm di say we i de we oli.
Futnot Dɛn
^ Insay Ibru, “di 4 briz dɛn na di wɔl.”
