Zɛkaraya 7:1-14
7 Insay di ia we mek 4 we Kiŋ Darayɔs de rul, di de we mek 4 insay di mɔnt we mek nayn, dat na, di mɔnt we nem Kizlɛv,* Jiova gi mɛsej to Zɛkaraya.
2 Di pipul dɛn na Bɛtɛl sɛn Shariza, Rigɛm-mɛlɛk, ɛn in man dɛn fɔ beg Jiova fɔ lɛ i blɛs dɛn,
3 ɛn fɔ aks di prist dɛn we de na Jiova, we gɛt bɔku bɔku sojaman dɛn, in os* ɛn di prɔfɛt dɛn se: “Wi* fɔ kray di mɔnt we mek fayv ɛn nɔ it natin jɔs lɛk aw wi* dɔn de du fɔ lɔng tɛm naw?”
4 Jiova we gɛt bɔku bɔku sojaman dɛn tɛl mi bak se:
5 “Aks ɔl di pipul dɛn na di land ɛn di prist dɛn se: ‘We una bin de fast ɛn kray lawd wan insay di mɔnt we mek fayv ɛn insay di mɔnt we mek sɛvin fɔ 70 ia, na fɔ mi una bin de rili fast?
6 Ɛn we una bin de it ɛn drink, nɔto fɔ unasɛf una bin de it ɛn drink?
7 Una nɔ tink se una fɔ du di tin dɛn we Jiova bin de tɛl una tru di prɔfɛt dɛn we bin de trade? A de tɔk bɔt di tɛm we pipul dɛn bin de na Jerusɛlɛm ɛn di siti dɛn we de rawnd Jerusɛlɛm ɛn pis bin de, di tɛm we pipul dɛn bin de na di Nɛgɛb ɛn di Shɛfila.’”
8 Jiova tɛl Zɛkaraya bak se:
9 “Na dis Jiova we gɛt bɔku bɔku sojaman dɛn se: ‘Una jɔj fia wan, una sho lɔv we nɔ de chenj to una kɔmpin dɛn, ɛn una sho sɔri-at.
10 Una nɔ kruk uman we in man dɔn day, pikin we nɔ gɛt papa,* fɔrina, ɛn pɔsin we po; ɛn una nɔ plan bad fɔ una kɔmpin dɛn na una at.’
11 Bɔt dɛn nɔ bin de gri fɔ pe atɛnshɔn, dɛn mek trangayes ɛn tɔn dɛn bak pan Gɔd, ɛn dɛn blɔk dɛn yes so dat dɛn nɔ go yɛri.
12 Dɛn mek dɛn at strɔng lɛk dayamɔn,* ɛn dɛn nɔ bin de obe di lɔ* ɛn di wɔd dɛn we Jiova we gɛt bɔku bɔku sojaman dɛn bin yuz in spirit fɔ tɛl di prɔfɛt dɛn we bin de trade trade. So dat bin mek Jiova we gɛt bɔku bɔku sojaman dɛn vɛks bad bad wan.”
13 “Jiova we gɛt bɔku bɔku sojaman dɛn se: ‘Jɔs lɛk we dɛn nɔ lisin we a* tɔk to dɛn, na so misɛf nɔ go lisin we dɛn aks mi fɔ ɛp dɛn.
14 Ɛn a skata dɛn wit big big briz na ɔl di neshɔn dɛn we dɛn nɔ no, ɛn di land we dɛn lɛf biɛn bin ɛmti, nɔbɔdi nɔ bin de pas de ɔ tɔn bak; dɛn tɔn di fayn fayn land to sɔntin we fiaful.’”
Futnot Dɛn
^ Luk Apɛndiks B15.
^ Ɔ “tɛmpul.”
^ Insay Ibru, “A.”
^ Insay Ibru, “a.”
^ Ɔ “pikin we nɔ gɛt mama ɛn papa.”
^ Ɔ i kin bi, “strɔng ston,” lɛk ɛmri ston.
^ Ɔ “tichin.”
^ Insay Ibru, “i.”
