Zɛkaraya 9:1-17
9 Wan impɔtant mɛsej:
“Dis na Jiova in jɔjmɛnt mɛsej fɔ Edrak,Ɛn Damaskɔs na in tagɛt*—Jiova in yay de pan mɔtalmanƐn ɔl di trayb dɛn na Izrɛl—
2 Ɛn di mɛsej de bak fɔ Emat, we de shia bɔda wit am,Ɛn fɔ Taya ɛn Saydɔn, bikɔs dɛn rili gɛt sɛns.
3 Di pipul dɛn na Taya dɔn bil wɔl dɛn fɔ protɛkt dɛnsɛf.
Dɛn dɔn payl silva lɛk dɔst,Ɛn dɛn dɔn payl gold lɛk di dɔti na di strit dɛn.
4 Jiova go tek dɛn prɔpati dɛn,Ɛn i go dɔnawe wit dɛn ami na di si;Ɛn faya go bɔn di siti.
5 Di pipul dɛn na Ashkɛlɔn go si dat ɛn dɛn go fred;Di pipul dɛn na Gaza go wɔri pasmak,Ɛn di sem tin go apin to di pipul dɛn na Ɛkrɔn,
Bikɔs wetin dɛn op fɔ nɔ apin.Kiŋ nɔ go de na Gaza igen,
Ɛn pipul dɛn nɔ go de na Ashkɛlɔn.
6 Fɔrina go kam liv na Ashdɔd,A go dɔnawe wit di tin we de mek di Filistin prawd.
7 A go pul di tin dɛn we gɛt blɔd sten na in mɔtƐn a go pul di dɔti dɔti tin dɛn we de bitwin in tit,Ɛn i go lɛf fɔ wi Gɔd;Ɛn i go tan lɛk chif na Juda,Ɛn di pipul dɛn na Ɛkrɔn go tan lɛk di Jɛbusayt dɛn.
8 A go kamp lɛk wachman fɔ mi os,So dat nɔbɔdi nɔ go pas de ɛn nɔbɔdi nɔ go tɔn bak;Ɛn ɛnibɔdi we de fos pipul dɛn fɔ wok* nɔ go pas de igen,Bikɔs naw a dɔn si am* wit mi yay.
9 E di pipul dɛn na Zayɔn, una gladi pasmak.
E di pipul dɛn na Jerusɛlɛm, una ala lawd wan fɔ sho se una gladi.
Luk! Una kiŋ de kam to una.
I de du wetin rayt, ɛn i go sev una,I ɔmbul ɛn i de rayd dɔnki,I de pantap yɔŋ dɔnki,* uman dɔnki in pikin.
10 A go tek di wɔ chariɔt frɔm Ifrem.Ɛn di ɔs na Jerusɛlɛm.
A go tek di bo we dɛn de yuz fɔ fɛt.
Ɛn i go tɔk bɔt pis to di neshɔn dɛn;I go rul frɔm wan si to di ɔda siƐn frɔm di Riva* to di say we fa pas ɔl na di wɔl.
11 E uman, bikɔs ɔf di blɔd agrimɛnt we yu mek,A go pul yu prizina dɛn kɔmɔt na di ol we nɔ gɛt wata.
12 Una dɛn prizina dɛn we gɛt op,
Una go bak na di say we sef fɔ ayd.A de tɛl yu tide se,
‘E uman, a go pe yu bak dɔbul.
13 A go bɛn Juda lɛk mi bo.
Ɛn a go put Ifrem na di bo,*E Zayɔn, a go wek yu bɔypikin dɛn,Fɔ mek dɛn de agens Gris in bɔypikin dɛn,Ɛn a go mek yu tan lɛk fɛtman in sɔd.’
14 Jiova go sho se i de wit dɛn,Ɛn in aro go go lɛk laytnin.
Jiova we na di Masta We De Rul Ɔlman go blo di ɔn,Ɛn i go go wit di big big briz we de na di sawt.
15 Jiova we gɛt bɔku bɔku sojaman dɛn go fɛt fɔ dɛn,Dɛn ɛnimi dɛn go atak dɛn wit slingston dɛn, bɔt dɛn go win dɛn ɛnimi dɛn.
Dɛn go drink ɛn mek nɔys, lɛk se dɛn drink wayn;Dɛn go tan lɛk bol we ful-ɔp wit wayn,Lɛk blɔd we dɛn tɔn na di kɔna dɛn na di ɔlta.
16 Da de de, dɛn Gɔd Jiova go sev dɛnLɛk aw shɛpad de sev in ship dɛn;Dɛn go tan lɛk valyu ston dɛn pan krawn we de glita na in land.
17 I rili gud,Ɛn i rili fayn!
Fud go mek yɔŋman dɛn strɔng,Ɛn nyu wayn go mek di vajin dɛn strɔng.”
Futnot Dɛn
^ Insay Ibru, “ples fɔ rɛst.”
^ Ɔ “we de sɔprɛs pipul dɛn.”
^ I go bi di sɔfa we in pipul dɛn de sɔfa.
^ Ɔ “man dɔnki.”
^ Dat na, di Yufretis.
^ Dat na, lɛk aro.
