Akt 12:1-25
12 Arawnd dis sem tɛm, Kiŋ Ɛrɔd bigin fɔ trit sɔm pipul dɛn na di kɔngrigeshɔn bad.
2 I kil Jems, we na Jɔn in brɔda, wit sɔd.
3 We i si se di Ju dɛn lɛk wetin i du, i arɛst Pita. (Dis apin insay di tɛm we dɛn de it di Bred we Nɔ Gɛt Yist.)
4 I ol am ɛn put am na prizin. Dɔn i mek sojaman dɛn wach am bay shift; na 4 shift i mek. Ɛni shift bin gɛt 4 sojaman dɛn. I bin want fɔ pul am* ɛn briŋ am bifo di pipul dɛn afta di Pasova.
5 So Pita bin de na prizin, bɔt di kɔngrigeshɔn bin de rili pre to Gɔd fɔ am.
6 Di nɛt bifo di de we Ɛrɔd bin want fɔ briŋ Pita na do, Pita bin de slip midul tu sojaman dɛn, ɛn dɛn tay am wit tu chen dɛn. Ɛn di gaydman dɛn we bin de bifo di domɔt bin de wach di prizin.
7 Bɔt Jiova* in enjɛl bin tinap de, ɛn layt shayn na di sɛl. I tɔch Pita in sayd ɛn wek am. Dɔn i se: “Grap kwik!” Ɛn di chen dɛn kɔmɔt na in an ɛn fɔdɔm.
8 Di enjɛl tɛl am se: “Drɛs* ɛn wɛr yu sandal.” I du am. Dɔn i tɛl am bak se: “Wɛr yu klos we yu kin wɛr pantap ɛn fala mi.”
9 So i kɔmɔt na do ɛn kɔntinyu fɔ fala am, bɔt i nɔ bin no se wetin di enjɛl de du na rial tin. Infakt, i bin tink se na vishɔn i de si.
10 Dɛn pas di fɔs ɛn sɛkɔn gaydman post ɛn rich na di ayɛn get usay pɔsin de pas fɔ go na di siti, ɛn di get opin fɔ insɛf. We dɛn kɔmɔt na do, dɛn go dɔŋ wan strit, ɛn wantɛm wantɛm di enjɛl lɔs pan am.
11 Nain Pita kam no wetin de apin, so i se: “Na naw a rili no se Jiova* sɛn in enjɛl fɔ pul mi na Ɛrɔd in an ɛn mek ɔl di tin dɛn we di Ju dɛn bin want nɔ apin.”
12 We i kam no dis, i go na Meri in os. Meri na Jɔn we dɛn de kɔl Mak, in mama. Plɛnti pipul dɛn bin gɛda na di os de pre.
13 We i nak na di get, wan savant gal we nem Roda, kam de fɔ no udat de nak.
14 We i yɛri Pita in vɔys, i so gladi dat i nɔ opin di get, bifo dat, i rɔn go insay ɛn tɔk se na Pita tinap na di get.
15 Dɛn tɛl am se: “Yu ed nɔ de.” Bɔt i pin se na Pita. Na de dɛn se: “Na in enjɛl.”
16 Pita bin stil de de, de nak. We dɛn opin di domɔt, dɛn si am ɛn dɛn sɔprayz.
17 Bɔt i mek sayn to dɛn wit in an fɔ lɛ dɛn sɛt dɛn mɔt, ɛn i tɛl dɛn ɔltin bɔt aw Jiova* pul am na prizin. Dɔn i tɛl dɛn se: “Una tɛl Jems ɛn di brɔda dɛn bɔt dɛn tin ya.” Afta dat, i kɔmɔt de ɛn travul go na ɔda ples.
18 We doklin, di sojaman dɛn bin kɔnfyuz ɛn de wɔnda wetin dɔn apin to Pita.
19 Ɛrɔd luk gud gud wan fɔ am, bɔt i nɔ si am. So i aks di gaydman dɛn kwɛstyɔn dɛn ɛn se mek dɛn kɛr dɛn go fɔ go pɔnish dɛn. Dɔn i kɔmɔt na Judia ɛn go dɔŋ na Sizeria ɛn spɛn sɔm tɛm de.
20 I bin dɔn vɛks pan* di pipul dɛn na Taya ɛn Saydɔn. So dɛn mek wanwɔd ɛn kam to am ɛn tɔk to Blastɔs, we de in chaj ɔf di kiŋ in os,* fɔ ɛp dɛn. Dɔn dɛn beg fɔ pis, bikɔs na di kiŋ in land bin de sɔplay dɛn kɔntri wit it.
21 Wan de we pipul dɛn gɛda, Ɛrɔd wɛr kiŋ klos ɛn sidɔm na di jɔjmɛnt chia ɛn bigin fɔ tɔk to di pipul dɛn.
22 Di pipul dɛn we gɛda bigin fɔ ala se: “Da vɔys de na wan gɔd in vɔys, nɔto mɔtalman vɔys!”
23 Wantɛm wantɛm Jiova* in enjɛl mek i sik, bikɔs i nɔ mek Gɔd gɛt di glori. Dɔn tumbu dɛn it am ɛn i day.
24 Bɔt Jiova* in wɔd kɔntinyu fɔ rich na bɔku say dɛn ɛn plɛnti pipul dɛn biliv.
25 Afta Banabas ɛn Sɔl dɔn kɛr di tin dɛn fɔ ɛp di brɔda dɛn na Jerusɛlɛm, dɛn tɔn bak. We dɛn de go, dɛn kɛr Jɔn, we dɛn kin kɔl bak Mak.
Futnot
^ Ɔ “pul am fɔ jɔj am.”
^ Rid Baybul Wɔd dɛn Minin.
^ Ɔ “Rɛdi yusɛf.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “want fɔ fɛt.”
^ Insay Grik, “di kiŋ in rum.”
^ Rid Baybul Wɔd dɛn Minin.
^ Rid Baybul Wɔd dɛn Minin.
