Akt 14:1-28
14 We dɛn de na Aykoniɔm, dɛn go na di Ju dɛn sinagɔg* togɛda, ɛn di we aw dɛn tɔk mek bɔku Ju ɛn Grik dɛn biliv di Masta.
2 Bɔt di Ju dɛn we nɔ biliv mek di pipul dɛn we nɔto Ju vɛks ɛn pɔyzin dɛn maynd fɔ di brɔda dɛn.
3 So dɛn spɛn lɔng tɛm de, ɛn Jiova* gi dɛn pawa fɔ tɔk wit maynd. Ɛn i sho se di mɛsej we dɛn de tɔk bɔt in spɛshal gudnɛs* na tru, bay we i alaw dɛn fɔ pafɔm sayn dɛn ɛn du wɔndaful tin dɛn.
4 Bɔt di pipul dɛn na di siti nɔ bin gɛt wanwɔd; sɔm bin de fɔ di Ju dɛn ɛn ɔda wan dɛn bin de fɔ di apɔsul dɛn.
5 We di pipul dɛn we nɔto Ju ɛn di Ju dɛn wit dɛn rula dɛn tray fɔ trit dɛn bad ɛn ston dɛn,
6 pipul dɛn tɛl dɛn, ɛn dɛn rɔnawe go na di siti dɛn na Likeonia, Listra ɛn Dabi, ɛn di eria dɛn we de arawnd de.
7 Ɛn dɛn bin de tɔk bɔt di gud nyuz na dɛn ples dɛn de.
8 Wan man bin de na Listra we sidɔm. Dɛn bɔn am in kripul wan, ɛn i nɔ wande waka.
9 Dis man bin de lisin to Pɔl we i de tɔk. Pɔl luk am piŋ ɛn si se i gɛt fet we fɔ mek i wɛl.
10 So i tɔk lawd wan se: “Tinap.” Na de di man jomp ɛn bigin fɔ waka.
11 We di krawd si wetin Pɔl dɔn du, dɛn ala insay di Likeonian langwej se: “Di gɔd dɛn dɔn tɔn mɔtalman, ɛn dɛn dɔn kam dɔŋ to wi!”
12 Ɛn dɛn bigin kɔl Banabas Zus ɛn kɔl Pɔl Amis, bikɔs na in bin de bifo fɔ tɔk.
13 Zus in tɛmpul bin de nia di siti get. Ɛn Zus in prist kam na di get wit man kaw dɛn ɛn rawnd tin dɛn we dɛn mek wit flawa; in ɛn di krawd bin want fɔ mek sakrifays dɛn.
14 Bɔt we apɔsul Banabas ɛn apɔsul Pɔl yɛri bɔt dat, dɛn chɛr dɛn klos ɛn rɔn go insay di krawd ɛn tɔk lawd wan se:
15 “Man dɛn, wetin mek una de du dɛn tin ya? Wisɛf na mɔtalman dɛn we gɛt di sem prɔblɛm dɛn lɛk una. Wi de tɛl una bɔt di gud nyuz, fɔ lɛ una lɛf dɛn tin ya we nɔ min natin ɛn tɔn to di Gɔd we de alayv, we mek ɛvin, di wɔl, di si, ɛn ɔl di tin dɛn we de de.
16 Trade trade i bin de alaw ɔl di neshɔn dɛn fɔ du wetin dɛn want,
17 bɔt stil i bin de sho udat i bi bay di gud tin dɛn we i de du. I de gi una ren we de kɔmɔt na ɛvin ɛn mek di tin dɛn we una kin plant bia bɔku bɔku wan we di tɛm rich; i de gi una it we de mek una satisfay ɛn mek una rili gladi.”
18 Ɛn pan ɔl we dɛn tɔk dɛn tin ya, i nɔ bin izi fɔ lɛ dɛn stɔp di krawd mek dɛn nɔ sakrifays to dɛn.
19 Bɔt sɔm Ju dɛn kɔmɔt na Antiɔk ɛn Aykoniɔm ɛn kam put wɔd na di krawd dɛn yes, ɛn dɛn ston Pɔl ɛn drɛg am kɔmɔt na di siti; dɛn bin tink se i dɔn day.
20 Bɔt we di disaypul dɛn kam gɛda rawnd am, i grap ɛn go insay di siti. Di nɛks de, in ɛn Banabas go na Dabi.
21 Afta dɛn dɔn tɔk bɔt di gud nyuz na da siti de ɛn mek bɔku disaypul dɛn, dɛn go bak na Listra, Aykoniɔm, ɛn Antiɔk.
22 Dɛn ɛnkɔrej di disaypul* dɛn we de de fɔ kɔntinyu fɔ gɛt fet pan di Masta ɛn tɛl dɛn se: “Wi go sɔfa bɔku tin dɛn bifo wi go insay Gɔd in Kiŋdɔm.”
23 Pantap dat, dɛn pik ɛlda dɛn fɔ dɛn na ɛni kɔngrigeshɔn, dɛn pre ɛn fast, ɛn lɛf dɛn na Jiova* in an we na in dɛn dɔn biliv.
24 Dɔn dɛn pas na Pisidia ɛn kam na Pamfilia,
25 ɛn we dɛn dɔn fɔ tɔk bɔt Gɔd in wɔd na Paga, dɛn go dɔŋ na Atalaya.
26 Dɔn dɛn tek bot de fɔ go na Antiɔk, usay Gɔd bin dɔn sho dɛn in spɛshal gudnɛs* fɔ du di wok we dɛn jɔs dɔn dɔn.
27 We dɛn rich, dɛn gɛda ɔlman na di kɔngrigeshɔn ɛn tɛl dɛn aw Gɔd dɔn yuz dɛn fɔ du bɔku tin dɛn, ɛn aw Gɔd dɔn opin di we fɔ mek pipul dɛn na ɔda neshɔn dɛn gɛt fet.
28 So dɛn spɛn lɔng tɛm wit di disaypul dɛn.
Futnot
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “di disaypul dɛn sol.”
^ Rid Baybul Wɔd dɛn Minin.
^ Rid Baybul Wɔd dɛn Minin.
