Akt 24:1-27
24 Afta fayv dez, di ay prist, we na Ananayas, kam dɔŋ wit sɔm lida dɛn ɛn wan man we nem Tatyulɔs we kin tɔk na pɔblik,* ɛn dɛn put dɛn kes we dɛn gɛt agens Pɔl bifo di gɔvnɔ.
2 We dɛn kɔl Tatyulɔs fɔ tɔk, i bigin fɔ tɔk bifo Fɛliks se Pɔl dɔn du bad. I se:
“Wi de rili ɛnjɔy pis bikɔs ɔf yu, ɛn bikɔs yu de tink bifo tɛm, dat dɔn mek tin dɛn dɔn de chenj na wi neshɔn.
3 Wi kin tɔk bɔt dis ɔltɛm ɛn ɔlsay, ɛn wi want fɔ tɛl yu plɛnti plɛnti tɛnki, Ɔnarebul Fɛliks.
4 Bɔt fɔ mek a nɔ kɔntinyu fɔ tek yu tɛm, a de beg yu, peshɛnt lisin to wi smɔl.
5 Wi dɔn si se dis man na pɔsin we de kɔz trɔbul,* i de mek ɔl di Ju dɛn we de ɔlsay na di wɔl tɔn agens di gɔvmɛnt, ɛn na in de bifo di grup we dɛn de kɔl di Nazarin.
6 I tray bak fɔ dɔti di tɛmpul, so wi ol am.
7 *——
8 If yusɛf sɛf aks am kwɛstyɔn dɛn, yu go kam fɔ no bɔt ɔl dɛn tin ya we wi se i dɔn du.”
9 Na de di Ju dɛn jɔyn pan di tɔk ɛn se dɛn tin ya na tru.
10 We di gɔvnɔ mek sayn wit in ed fɔ lɛ Pɔl tɔk, Pɔl se:
“A no gud gud wan se yu dɔn bi jɔj fɔ lɔng tɛm na dis neshɔn, so a gladi fɔ ɛksplen to yu.
11 I nɔ pas 12 dez yet we a bin go ɔp na Jerusɛlɛm fɔ go wɔship, yu kin chɛk fɔ yusɛf fɔ no if na tru.
12 Dɛn nɔ si mi de agyu wit ɛnibɔdi na di tɛmpul ɔ gɛda krawd fɔ mek ala ala na di sinagɔg* dɛn ɔ ɛnisay na di siti.
13 Ɛn dɛn nɔ go ebul pruv to yu se di tin dɛn we dɛn tɔk se a dɔn du na tru.
14 Bɔt a gri se a de wɔship di Gɔd we mi gret gret granpa dɛn bin de wɔship, lɛk aw di pipul dɛn we dɛn se dɔn mek wan grup de wɔship, ɛn a biliv ɔl di tin dɛn we de na di Lɔ ɛn di Prɔfɛt dɛn.
15 Ɛn a abop pan Gɔd, jɔs lɛk aw dɛn man ya sɛf abop se di wan dɛn we du wetin rayt ɛn di wan dɛn we nɔ du wetin rayt go gɛt layf bak.
16 Na dis mek a kin tray tranga wan ɔltɛm fɔ gɛt klin* kɔnshɛns bifo Gɔd ɛn mɔtalman.
17 Afta sɔm ia dɔn pas, a kam fɔ gi gift to po pipul dɛn na mi neshɔn ɛn fɔ mek sakrifays dɛn.
18 We a bin de du dɛn tin ya, dɛn mit mi na di tɛmpul, bɔt a bin klin lɛk aw di Lɔ se, ɛn dɛn nɔ mit mi de wit krawd ɛn a nɔ bin de mek ala ala. Bɔt sɔm Ju dɛn bin de de we kɔmɔt na Eshia distrikt;
19 i bin fɔ fayn mek dɛnsɛf de ya ɛn tɔk di bad tin we dɛn se a du, if dɛn rili gɛt ɛnitin agens mi.
20 Ɔ lɛ di man dɛn we de ya tɔk fɔ dɛnsɛf di bad tin we dɛn si se a du we a bin de bifo di Sanɛndrin,
21 pas we a bin tɔk lawd wan midul dɛn se: ‘Na bikɔs a biliv se pɔsin we dɔn day go gɛt layf bak, na in mek dɛn de jɔj mi bifo una tide!’”
22 Bɔt bikɔs Fɛliks bin no di tru tin dɛn bɔt dis We, i bigin fɛn we mek dɛn go, ɛn tɔk se: “Ɛnitɛm we Lisias we na di ami kɔmanda kam, a go disayd una kes.”
23 Ɛn i tɛl di ami ɔfisa se di man fɔ kɔntinyu fɔ de ɔnda arɛst bɔt mek dɛn gi am sɔm fridɔm, ɛn mek dɛn alaw in pipul dɛn fɔ ɛp am wit di tin dɛn we i nid.
24 Afta sɔm dez Fɛliks kam wit in wɛf we nem Drusila we na Ju, ɛn i sɛn kɔl Pɔl ɛn lisin to am we i de ɛksplen wetin i min fɔ biliv pan Krays Jizɔs.
25 Bɔt we Pɔl de tɔk bɔt aw pɔsin fɔ du wetin rayt, aw pɔsin fɔ kɔntrol insɛf, ɛn di jɔjmɛnt we fɔ kam, Fɛliks fred ɛn tɔk se: “Go fɔs, we a gɛt chans a go sɛn kɔl yu bak.”
26 Dɔn i bin de op se Pɔl go gi am mɔni. So na dat mek i bin de sɛn kɔl am fast fast ɛn tɔk wit am.
27 Bɔt we tu ia pas, Pɔshɔs Fɛstɔs tek Fɛliks in ples; ɛn bikɔs Fɛliks bin want fɔ gɛt gud nem wit di Ju dɛn, i nɔ fri Pɔl.
Futnot Dɛn
^ Ɔ “we na lɔya.”
^ Insay Grik, “na sik we de prɛd.”
^ Dis vas nɔ de insay sɔm fɔs fɔstɛm pepa dɛn we dɛn rayt di Baybul pan, so i nɔ de pan di Skripchɔ dɛn we Gɔd yuz pipul dɛn fɔ rayt.
^ Rid Baybul Wɔd dɛn Minin.
^ Insay Grik, “klia.”
