Akt 6:1-15
6 Insay di tɛm we di disaypul dɛn de bɔku, di Ju dɛn we de tɔk Grik bigin fɔ kɔmplen agens di Ju dɛn we de tɔk Ibru, bikɔs di uman dɛn we dɛn man dɛn dɔn day ɛn we de tɔk Grik nɔ bin de gɛt pan wetin dɛn bin de sheb ɛvride.
2 So di 12 apɔsul dɛn kɔl ɔl di disaypul dɛn ɛn se: “I nɔ fayn fɔ mek wi lɛf Gɔd in wɔd fɔ sheb it na tebul dɛn.
3 So wi brɔda dɛn, unasɛf sɛf pik sɛvin man dɛn pan una we gɛt gudnem ɛn we rili gɛt oli spirit ɛn sɛns, so dat wi go gi dɛn dis impɔtant wok;
4 bɔt wi go put wi atɛnshɔn pan prea ɛn fɔ de tich Gɔd in wɔd.”
5 Ɔlman gladi fɔ wetin dɛn tɔk, ɛn dɛn pik Stivin we bin rili gɛt fet ɛn oli spirit, wit Filip, Prɔkɔrɔs, Naykenɔ, Taymɔn, Paminas, ɛn Nikoleɔs we kɔmɔt Antiɔk ɛn we jɔyn di Ju rilijɔn.
6 Dɛn briŋ dɛn kam to di apɔsul dɛn, ɛn di apɔsul dɛn pre pan dɛn ɛn le dɛn an pan dɛn.
7 So Gɔd in wɔd kɔntinyu fɔ rich bɔku say dɛn ɛn di disaypul dɛn kɔntinyu fɔ bɔku na Jerusɛlɛm; ɛn bɔku bɔku prist dɛn bigin fɔ biliv.
8 Gɔd in gudnɛs ɛn pawa bin rili de pan Stivin, ɛn Stivin bin de pafɔm sayn dɛn ɛn du wɔndaful tin dɛn fɔ di pipul dɛn.
9 Bɔt sɔm man dɛn na wan grup we dɛn de kɔl Sinagɔg fɔ di Pipul dɛn we Dɛn Dɔn Fri, wit sɔm Sayrinian dɛn, Alɛgzandrian dɛn, ɛn sɔm pipul dɛn we kɔmɔt na Silaysia ɛn Eshia, kam fɔ agyu wit Stivin.
10 Bɔt dɛn nɔ bin ebul fɔ win am pan di agyumɛnt, bikɔs i bin de tɔk wit sɛns, ɛn i bin gɛt oli spirit.
11 Dɛn go tɔk to sɔm man dɛn na kɔna fɔ kam tɔk se: “Wi yɛri i de tɔk bad tin dɛn bɔt Mozis ɛn Gɔd.”
12 Ɛn dɛn mek di pipul dɛn, di lida dɛn, ɛn di Lɔ ticha dɛn vɛks, ɛn dɛn kam bɔs pan am jɔs lɛk dat ɛn ol am bay fos ɛn kɛr am go na di Sanɛndrin.
13 Ɛn dɛn briŋ lay lay witnɛs dɛn we kam tɔk se: “Dis man nɔ de lɛf fɔ tɔk bad bɔt dis oli ples ɛn di Lɔ.
14 Fɔ ɛgzampul, wi yɛri i tɔk se dis Jizɔs di Nazarin go brok brok dis ples ɛn chenj di we aw Mozis bin dɔn tɛl wi fɔ de du tin.”
15 Ɛn we ɔlman we sidɔm na di Sanɛndrin de luk am piŋ, dɛn si se in fes tan lɛk enjɛl fes.
