Egay 1:1-15
1 Insay di sɛkɔn ia we Kiŋ Darayɔs de rul, insay di mɔnt we mek siks, di fɔs de insay da mɔnt de, Jiova gi prɔfɛt Egay* mɛsej fɔ gi Zɛrubabɛl di gɔvnɔ fɔ Juda, we na Shialtiɛl in bɔypikin, ɛn to Jɔshwa di ay prist, we na Jɛɔzadak in bɔypikin, se:
2 “Na dis Jiova we gɛt bɔku bɔku sojaman dɛn se, ‘Dɛn pipul dɛn ya se, “Di tɛm nɔ rich yet fɔ bil* Jiova in os.”’”*
3 Jiova gi mɛsej bak to di prɔfɛt Egay se:
4 “Fɔ se na di tɛm dis fɔ lɛ una de na os dɛn we dɛn dizayn wit fayn fayn bod dɛn, we dis os de in pwɛl pwɛl wan?
5 Dis na wetin Jiova we gɛt bɔku bɔku sojaman dɛn se, ‘Una tink gud gud wan bɔt* di tin dɛn we una de du.
6 Una dɔn plant bɔku sid, bɔt na smɔl una avɛst. Una de it, bɔt una nɔ de bɛlful. Una de drink, bɔt una nɔ de satisfay. Una de wɛr klos, bɔt una stil de fil kol. Di wan we dɛn de pe fɔ di wok we i de du de put in mɔni insay bag we bɔs bɔs.’”
7 “Dis na wetin Jiova we gɛt bɔku bɔku sojaman dɛn se, ‘Una tink gud gud wan bɔt* di tin dɛn we una de du.’
8 “Jiova se, ‘Una go ɔp di mawntin ɛn briŋ bod dɛn. Dɔn una bil di os so dat a go gladi fɔ am, ɛn a go gɛt glori.’
9 “Jiova we gɛt bɔku bɔku sojaman dɛn se, ‘Una bin de ɛkspɛkt bɔku, bɔt na smɔl una de gɛt. Dɔn we una briŋ am na di os, a de blo pan am ɛn skata am. Fɔ us rizin? Na bikɔs mi os de in pwɛl pwɛl wan bɔt una de yagba fɔ kia fɔ una yon os dɛn.
10 So di ɛvin nɔ gi una dyu, ɛn di grɔn nɔ mek di plant dɛn bia.
11 Dɔn a kɔntinyu fɔ mek una land ɛn mawntin dɛn dray we mek una nɔ gɛt bɛtɛ it, wayn, ɔyl, ɛn plant dɛn. Una ɛn una animal dɛn de sɔfa, ɛn ɔl una tranga wok na fɔ natin.’”
12 Zɛrubabɛl, we na Shialtiɛl in bɔypikin, ɛn Jɔshwa di ay prist, we na Jɛɔzadak in bɔypikin, ɛn ɔl di pipul dɛn lisin to Jiova dɛn Gɔd ɛn to wetin prɔfɛt Egay se bikɔs na Jiova dɛn Gɔd dɔn sɛn am, ɛn di pipul dɛn bigin fɔ fred Jiova.
13 Dɔn Egay, we na Jiova in mɛsenja, gi di pipul dɛn dis mɛsej we Jiova gi am fɔ gi dɛn: “Jiova se, ‘A de wit una.’”
14 So Jiova ɛnkɔrej Zɛrubabɛl di gɔvnɔ fɔ Juda, we na Shialtiɛl in bɔypikin, ɛn Jɔshwa di ay prist, we na Jɛɔzadak in bɔypikin, ɛn ɔl di pipul dɛn. So dɛn kam ɛn bigin fɔ bil dɛn Gɔd we na Jiova we gɛt bɔku bɔku sojaman dɛn in os.
15 Dis apin di de we mek 24, insay di mɔnt we mek siks, ɛn insay di sɛkɔn ia we Kiŋ Darayɔs de rul.
Futnot Dɛn
^ I min “Dɛn Bɔn Am di De we Dɛn Gɛt Fɛstival.”
^ Ɔ “bil bak.”
^ Ɔ “tɛmpul.”
^ Insay Ibru, “Una put una at pan.”
^ Insay Ibru, “Una put una at pan.”
