Filipians 2:1-30
2 We una ɛnkɔrej una kɔmpin dɛn bikɔs una gɛt wanwɔd wit Krays, we una kɔrej dɛn bikɔs una lɛk dɛn, we una sho se una bisin bɔt una kɔmpin dɛn, we una rili lɛk dɛn ɛn gɛt sɔri-at fɔ dɛn,
2 una go mek a gladi pasmak bay we una gɛt di sem maynd, di sem lɔv, una gɛt wanwɔd pan ɔltin, ɛn una de tink di sem we.
3 Una nɔ du ɛnitin we go briŋ kɔnfyushɔn ɔ du sɔntin bikɔs una tink se una tu impɔtant, bɔt una put unasɛf dɔŋ ɛn tink se ɔda pipul dɛn bɛtɛ pas una,
4 ɛn una nɔ jɔs tink bɔt wetin una want nɔmɔ, bɔt una tink bak bɔt wetin ɔda pipul dɛn want.
5 Una go de tink dis sem we aw Krays Jizɔs bin de tink.
6 Pan ɔl we i bin tan lɛk Gɔd, i nɔ ɛva tink se i fɔ tek Gɔd in pozishɔn ɛn mek insɛf ikwal to Gɔd.
7 Bifo dat, i lɛf ɔltin we i gɛt* ɛn tan lɛk slev ɛn bi mɔtalman.
8 Pantap dat, we i kam as mɔtalman, i put insɛf dɔŋ ɛn obe te i day, i day pan tik we i sɔfa pan.*
9 Na dis rizin mek Gɔd gi am pozishɔn we ay pas di wan we i bin gɛt ɛn gi am di nem we de pantap ɔl ɔda nem,
10 so dat insay Jizɔs in nem, ɔlman go nil dɔŋ—di wan dɛn we de na ɛvin, di wan dɛn we de na di wɔl, ɛn di wan dɛn we de ɔnda di grɔn—
11 ɛn ɔlman go tɔk opin wan se Jizɔs Krays na Masta we go mek Gɔd di Papa gɛt glori.
12 So, di wan dɛn we a rili lɛk, jɔs lɛk aw una dɔn de obe ɔltɛm, nɔto jɔs we a de wit una, bɔt naw mɔ we a nɔ de wit una, una kɔntinyu fɔ fred ɛn trimbul we una de tray tranga wan fɔ sev.
13 Na Gɔd de gi una trɛnk, na in de mek una want fɔ du sɔntin ɛn gi una di pawa fɔ du am, bikɔs na dat fayn na in yay.
14 We una de du ɛnitin, una nɔ grɔmbul ɛn agyu,
15 so dat dɛn nɔ go blem una fɔ ɛnitin, una go inosɛnt, una go bi Gɔd in pikin dɛn we nɔ gɛt wan fɔlt na dis jɛnɛreshɔn we kruk ɛn kɔrɔpt, usay una de shayn lɛk layt na di wɔl,
16 ɛn una kɔntinyu fɔ ol di wɔd we de gi layf wit tu an. Dɔn a go gɛt rizin fɔ gladi we Krays in de kam, bikɔs a no se a nɔ rɔn fɔ natin ɔ wok tranga wan fɔ natin.
17 Bɔt ivin if a de tɔn misɛf lɛk drink sakrifays pan di sakrifays ɛn di oli wok* we una fet dɔn mek una de du, a gladi ɛn a de gladi wit una ɔl.
18 Semweso, unasɛf fɔ gladi ɛn gladi wit mi.
19 A de op fɔ sɛn Timoti to una jisnɔ, if na dat Masta Jizɔs want, so dat we a yɛri bɔt una dat go ɛnkɔrej mi.
20 A nɔ gɛt ɛnibɔdi we tan lɛk am we go rili kia fɔ una.
21 Ɔl di ɔda wan dɛn de du wetin dɛn want, dɛn nɔ de du wetin Jizɔs Krays want.
22 Bɔt una no di fayn ɛgzampul we i dɔn sɛt, jɔs lɛk pikin wit in papa, i dɔn wok lɛk slev wit mi fɔ kɛr di gud nyuz go bifo.
23 So na in a de op fɔ sɛn as a si aw tin go bi fɔ mi.
24 Fɔ tru, a gɛt kɔnfidɛns se misɛf go kam jisnɔ if na dat di Masta want.
25 Bɔt naw, a si am se a nid fɔ sɛn Ɛpafrodaytɔs to una, we na mi brɔda, mi kɔmpin wokman, ɛn mi kɔmpin sojaman, ɛn una mɛsenja ɛn savant we una sɛn fɔ ɛp mi wit di tin dɛn we a nid,
26 bikɔs i rili want fɔ si una ɔl ɛn in at pwɛl bikɔs una yɛri se i bin sik.
27 Fɔ tru, i bin sik ɛn i lɛf smɔl mek i day; bɔt Gɔd sɔri fɔ am, infakt, nɔto in nɔmɔ Gɔd sɔri fɔ, i sɔri fɔ mi bak, so dat mi pen nɔ go bɔku mɔ ɛn mɔ.
28 So a de sɛn am kwik kwik wan, so dat we una si am una go gladi bak ɛn misɛf nɔ go wɔri tumɔs.
29 So una wɛlkɔm am wit gladi-at lɛk aw una kin wɛlkɔm pɔsin we de fala di Masta, ɛn una kɔntinyu fɔ rili valyu dɛn kayn man dɛn de,
30 bikɔs i lɛf smɔl mek i day fɔ Krays in wok,* i put in layf* pan denja fɔ ɛp mi we una nɔ de na ya.
Futnot Dɛn
^ Insay Grik, “i ɛmti insɛf.”
^ Rid Baybul Wɔd dɛn Minin.
^ Ɔ “wok fɔ bɛnifit pipul dɛn.”
^ Ɔ i kin bi, “di Masta in wok.”
^ Ɔ “sol.”
