Galeshians 1:1-24
1 Mi, Pɔl, na apɔsul; nɔto mɔtalman mek a bi apɔsul ɛn nɔto tru mɔtalman a bi apɔsul, bɔt na tru Jizɔs Krays ɛn Gɔd we na di Papa, we gi am layf bak.
2 Mi ɛn ɔl di brɔda dɛn we de wit mi de rayt to di kɔngrigeshɔn dɛn na Galeshia:
3 Lɛ Gɔd, we na wi Papa, ɛn Masta Jizɔs Krays gi una pis ɛn mek dɛn spɛshal gudnɛs* de pan una.
4 I gi insɛf fɔ wi sin dɛn so dat i go sev wi insay di bad tɛm* we wi de, jɔs lɛk aw wi Gɔd ɛn Papa want,
5 we gɛt di glori sote go. Emɛn.
6 A rili sɔprayz se una de tɔn una bak kwik kwik wan pan* di Wan we kɔl una wit Krays in spɛshal gudnɛs* ɛn una dɔn tɔn to ɔda kayn gud nyuz.
7 Nɔto fɔ se ɔda gud nyuz de; bɔt sɔm pipul dɛn de ambɔg una, ɛn dɛn want fɔ twis di gud nyuz bɔt di Krays.
8 Bɔt ilɛksɛf wi ɔ enjɛl we kɔmɔt na ɛvin kam tɛl una gud nyuz we difrɛn frɔm di gud nyuz we wi bin dɔn tɛl una, lɛ swɛ de pan am.
9 Lɛk aw wi dɔn tɔk fɔs, a de tɔk am bak, Ɛnibɔdi we de tɛl una gud nyuz we difrɛn frɔm wetin una bin dɔn biliv, lɛ swɛ de pan am.
10 Infakt, fɔ se na mɔtalman naw a de tray fɔ mek biliv ɔ na Gɔd? Ɔ a de tray fɔ pliz mɔtalman? If a bin stil de pliz mɔtalman, a nɔ fɔ dɔn bi Krays in slev.
11 Mi brɔda dɛn, a want mek una no se di gud nyuz we a bin tɛl una nɔto frɔm mɔtalman i kɔmɔt;
12 nɔto mɔtalman gi mi am, ɛn nɔto tich dɛn tich mi am, bɔt na Jizɔs Krays mek a no am.
13 Una dɔn yɛri bɔt aw a bin de biev we a bin de na di Ju rilijɔn, a bin de rili mek Gɔd in kɔngrigeshɔn sɔfa ɛn du bɔku bad tin dɛn to am;
14 ɛn a bin de rili go bifo na di Ju rilijɔn pas bɔku pan di wan dɛn we wi ɔl na ej grup na mi neshɔn, bikɔs a bin gɛt zil pas dɛn fa fawe fɔ mi papa dɛn tradishɔn.
15 Bɔt we Gɔd, we pul mi na mi mama in bɛlɛ ɛn kɔl mi tru in spɛshal gudnɛs,* si am se i fayn
16 fɔ yuz mi fɔ sho pipul dɛn in Pikin so dat a go tɔk di gud nyuz bɔt am na di neshɔn dɛn, a nɔ go kwik kwik wan to ɛni mɔtalman* fɔ advays;
17 ɛn a nɔ go ɔp na Jerusɛlɛm to di wan dɛn we bin dɔn bi apɔsul bifo mi, bɔt a go na Arebia, dɔn a go bak na Damaskɔs.
18 Dɔn afta tri ia, a go ɔp na Jerusɛlɛm fɔ go fɛn Sifas,* ɛn a de wit am fɔ 15 dez.
19 Bɔt a nɔ si nɔn pan di ɔda apɔsul dɛn, pas Jems we na di Masta in brɔda.
20 Gɔd na mi witnɛs se di tin dɛn we a de rayt to una na tru, nɔto lay a de lay.
21 Afta dat, a go na di eria dɛn na Siria ɛn Silishia.
22 Bɔt di kɔngrigeshɔn dɛn na Judia we gɛt wanwɔd wit Krays nɔ bin dɔn si mi yet.
23 Dɛn bin jɔs de yɛri se: “Di man we bin de mek wi sɔfa ɛn we bin de du bɔku bad tin dɛn to di kɔngrigeshɔn* dɛn de tɔk naw bɔt di gud nyuz.”
24 So dɛn bigin fɔ prez Gɔd bikɔs ɔf mi.
Futnot
^ Rid Baybul Wɔd dɛn Minin.
^ Ɔ “dis tɛm.” Rid Baybul Wɔd dɛn Minin.
^ Ɔ “kɔmɔt kwik kwik wan to.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Insay Grik, “flɛsh ɛn blɔd.”
^ In ɔda nem na Pita.
^ Insay Grik, “di fet.”
