Galeshians 2:1-21
2 Dɔn afta 14 ia, a go ɔp bak na Jerusɛlɛm wit Banabas, ɛn we a bin de go a go wit Taytɔs.
2 A go ɔp de bikɔs ɔf wetin Jizɔs mek a no, ɛn a go tɛl dɛn di gud nyuz we a de prich to pipul dɛn na ɔda neshɔn dɛn. Bɔt a du dat to di brɔda dɛn nɔmɔ we pipul dɛn rili rɛspɛkt, fɔ mek shɔ se a nɔ bin de rɔn ɔ a nɔ bin dɔn rɔn fɔ natin.
3 Bɔt dɛn nɔ bin ivin fos Taytɔs, we bin de wit mi, fɔ sakɔmsayz, pan ɔl we in na bin Grik.
4 Bɔt dis tin kam ɔp bikɔs ɔf di lay lay brɔda dɛn we kam insay kwayɛt wan fɔ ambɔg di fridɔm we wi de ɛnjɔy bikɔs wi gɛt wanwɔd wit Krays Jizɔs, so dat dɛn go rili tɔn wi to slev;
5 bɔt wi nɔ bin lisin to dɛn, ivin fɔ shɔt tɛm* sɛf, so dat di gud nyuz we na di trut go kɔntinyu fɔ de wit una.
6 Dɛn wan dɛn we tan lɛk se dɛn impɔtant—ilɛk udat dɛn bin bi nɔ impɔtant to mi, bikɔs Gɔd nɔ de tek pɔsin bay aw i luk—dɛn man dɛn de we pipul dɛn rili rɛspɛkt, nɔ tɛl mi ɛni nyu tin.
7 Bifo dat, we dɛn si se a dɔn gɛt di wok fɔ prich di gud nyuz to di wan dɛn we nɔ sakɔmsayz, jɔs lɛk aw Pita insɛf bin dɔn gɛt di wok fɔ prich to di wan dɛn we sakɔmsayz—
8 di wan we gi Pita di pawa fɔ bi apɔsul to di wan dɛn we sakɔmsayz, na in bak gi mi pawa fɔ bi apɔsul to di wan dɛn we de na ɔda neshɔn dɛn—
9 ɛn we dɛn si se Gɔd dɔn gi mi spɛshal gudnɛs,* Jems, Sifas* ɛn Jɔn, we bin tan lɛk pila dɛn, shek-an wit mi ɛn Banabas fɔ sho se wi ɔl de wok togɛda,* so dat wi go go to di pipul dɛn na ɔda neshɔn dɛn, bɔt dɛn go go to di wan dɛn we sakɔmsayz.
10 Di tin nɔmɔ we dɛn tɛl wi na fɔ de mɛmba di wan dɛn we po, ɛn a dɔn de rili tray fɔ du dis.
11 Bɔt we Sifas* kam na Antiɔk, a tɔk pan am bifo in fes bikɔs i bin rili rɔng.
12 Bifo sɔm man dɛn we kɔmɔt to Jems kam, i bin de it wit pipul dɛn we kɔmɔt na ɔda neshɔn dɛn; bɔt we dɛn kam, i lɛf fɔ du so ɛn kɔmɔt nia dɛn, bikɔs i bin de fred di wan dɛn we sakɔmsayz.
13 Di ɔda Ju dɛn bak bin jɔyn am pan dis ipokrit, ɛn ivin Banabas insɛf bin jɔyn dɛn pan dɛn ipokrit.
14 Bɔt we a si se dɛn nɔ de waka lɛk aw di gud nyuz we na tru se dɛn fɔ waka, a tɛl Sifas* bifo dɛn ɔl se: “If yu we na Ju, de liv lɛk aw pipul dɛn na ɔda neshɔn dɛn de liv ɛn yu nɔ de liv lɛk di Ju dɛn, wetin mek yu de fos pipul dɛn na ɔda neshɔn dɛn fɔ liv lɛk aw di Ju dɛn de liv?”
15 Wi we dɛn bɔn as Ju ɛn we nɔto sina dɛn we kɔmɔt na ɔda neshɔn dɛn,
16 no se nɔto we pɔsin de du wetin lɔ se go mek Gɔd tɔk se i de du wetin rayt, bɔt na we i gɛt fet pan Jizɔs Krays. So wi dɔn put wi fet pan Krays Jizɔs, so dat Gɔd go tɔk se wi de du wetin rayt bikɔs wi gɛt fet pan Krays ɛn nɔto bikɔs wi de du wetin lɔ se; Gɔd nɔ go se ɛnibɔdi de du wetin rayt bikɔs i de du wetin lɔ se.
17 If naw wi dɔn bi sina we wi de tray fɔ mek Gɔd tɔk se wi de du wetin rayt tru Krays, fɔ se dat min se Krays na sin in savant? Nɔ-o!
18 If di sem tin dɛn we a bin dɔn pwɛl na dɛn a de bil bak, a de sho se mi na pɔsin we de brok lɔ.
19 Lɔ dɔn mek a day we i kam pan lɔ, so dat a go de alayv to Gɔd.
20 Dɛn nel mi na di tik wit Krays. Nɔto mi de liv igen, bɔt na Krays we gɛt wanwɔd wit mi, na in de liv. Fɔ tru, di layf we a de liv naw na dis bɔdi,* a de liv am di we we de sho se a gɛt fet pan Gɔd in Pikin, we lɛk mi ɛn an ova insɛf fɔ mi.
21 A nɔ de tɔn mi bak pan Gɔd in spɛshal gudnɛs,* bikɔs if na lɔ de mek pɔsin du wetin rayt, na fɔ natin Krays day.
Futnot
^ Insay Grik, “wan awa.”
^ Rid Baybul Wɔd dɛn Minin.
^ In ɔda nem na Pita.
^ Ɔ “na patna dɛn.”
^ In ɔda nem na Pita.
^ In ɔda nem na Pita.
^ Insay Grik, “flɛsh.”
^ Rid Baybul Wɔd dɛn Minin.
