Ibruz 11:1-40
11 Fet na we pɔsin gɛt kɔnfidɛns se wetin i op fɔ go mɔs apin, ɛn na di pruf we i gɛt fɔ sho se sɔntin rial pan ɔl we i nɔ si am yet.
2 Na di fet we di man dɛn we bin de trade* gɛt mek Gɔd mek dɛn no se dɛn dɔn du wetin rayt na in yay.
3 Na fet mek wi no se na wetin Gɔd tɔk na in mek di tin dɛn na ɛvin ɛn na di wɔl* kam de, so na dat mek di tin dɛn we wi de si kam frɔm di tin dɛn we wi nɔ de si.
4 Na fet mek Ebɛl mek sakrifays to Gɔd we bɛtɛ pas Ken in yon, ɛn na da fet de mek Gɔd mek i no se i dɔn du wetin rayt; Gɔd gladi fɔ in gift dɛn, ɛn pan ɔl we i dɔn day in fet de tɔk fɔ am.
5 Na fet mek Gɔd transfa Inɔk fɔ mek i nɔ sɔfa we i de day, ɛn dɛn nɔ si am ɛnisay bikɔs Gɔd transfa am; bifo Gɔd transfa am, i mek i no se i dɔn du wetin rayt na in yay.
6 Pantap dat, i nɔ pɔsibul fɔ mek pɔsin pliz Gɔd fayn fayn wan if i nɔ gɛt fet, bikɔs ɛnibɔdi we de kam to Gɔd fɔ biliv se i de ɛn na in de pe di wan dɛn we de luk fɔ am wit ɔl dɛn at.
7 Na fet mek Noa sho se i de fred Gɔd ɛn bil wan ak* fɔ sev di wan dɛn we de na in os, afta Gɔd dɔn wɔn am bɔt tin dɛn we i nɔ si yet; ɛn na in fet mek i kɔndɛm di wɔl, ɛn i bi pɔsin we de du wetin rayt bikɔs i gɛt fet.
8 Na fet mek we Gɔd kɔl Ebraam, i obe ɛn go na di ples we Gɔd prɔmis fɔ gi am; i go pan ɔl we i nɔ no usay i de go.
9 Na fet mek i liv as fɔrina na di land we Gɔd prɔmis; na ples we i nɔ sabi. I liv na tɛnt wit Ayzak ɛn Jekɔb, we na dɛn ɔl go gɛt di sem prɔmis.
10 I bin de wet fɔ di siti we gɛt rial fawndeshɔn dɛn, we na Gɔd dizayn* ɛn bil am.
11 Na fet mek Sera gɛt bɛlɛ,* pan ɔl we i bin dɔn pas di ej fɔ bɔn, bikɔs i si di Wan we mek di prɔmis as pɔsin we fetful.
12 Na dat mek wan man we tan lɛk se i dɔn ɔlrɛdi day bɔn pikin dɛn we bɔku lɛk di sta dɛn na ɛvin ɛn lɛk di sansan dɛn na bich we pɔsin nɔ go ebul fɔ kɔnt.
13 Ɔl dɛn wan ya bin gɛt fet we dɛn day, pan ɔl we dɛn nɔ gɛt di tin dɛn we Gɔd prɔmis; bɔt dɛn si dɛn fa ɛn gladi fɔ dɛn ɛn tɔk na pɔblik se dɛn na strenja dɛn ɛn na fɔ shɔt tɛm nɔmɔ dɛn de na di land.
14 Di wan dɛn we tɔk da kayn we de sho klia wan se dɛn rili de fɛn dɛn yon ples.
15 Bɔt if dɛn bin kɔntinyu fɔ mɛmba di ples usay dɛn kɔmɔt, dɛn bin fɔ dɔn gɛt chans fɔ tɔn bak.
16 Bɔt naw dɛn de tray tranga wan fɔ gɛt ples we bɛtɛ, dat na, ples we gɛt sɔntin fɔ du wit ɛvin. So Gɔd nɔ de shem fɔ lɛ dɛn kɔl am dɛn Gɔd, bikɔs i dɔn pripia wan siti fɔ dɛn.
17 Na fet mek i bin jɔs tan lɛk se Ebraam sakrifays Ayzak we Gɔd tɛst am—di man we bin gladi fɔ di prɔmis dɛn bin rɛdi fɔ sakrifays in wangren bɔypikin—
18 pan ɔl we Gɔd bin dɔn tɛl am se: “Di wan dɛn we dɛn go se na yu pikin dɛn, na frɔm Ayzak dɛn go kɔmɔt.”
19 Bɔt i bin biliv se Gɔd ebul fɔ gi am layf bak ivin if i day, ɛn Gɔd bin gi am Ayzak bak ɛn dat bin de sho wetin gɛt fɔ apin tumara bambay.
20 Na fet mek Ayzak blɛs Jekɔp ɛn Isɔ, i tɛl dɛn bɔt wetin go apin leta.
21 Na fet mek we Jekɔp bin want fɔ day, i blɛs Josɛf in bɔypikin dɛn ɛn wɔship Gɔd we i ling pan in wɔkinstik.
22 Na fet mek we di tɛm bin de nia fɔ lɛ Josɛf day, i tɔk se Izrɛl in pikin dɛn gɛt fɔ kɔmɔt na Ijipt, ɛn i tɛl dɛn wetin fɔ du wit in bon dɛn.*
23 Na fet mek Mozis in mama ɛn papa ayd am fɔ tri mɔnt afta dɛn bɔn am, bikɔs dɛn bin si se i fayn ɛn dɛn nɔ fred bikɔs ɔf wetin di kiŋ tɔk.
24 Na fet mek we Mozis big, i nɔ gri lɛ dɛn kɔl am Fɛro in galpikin in pikin,
25 bifo dat, i disayd fɔ mek dɛn trit am bad wit Gɔd in pipul dɛn, i nɔ disayd fɔ ɛnjɔy sin fɔ shɔt tɛm,
26 bikɔs i tek am se fɔ lɛ dɛn disgres am as di Krays na jɛntri we pas di jɛntri dɛn na Ijipt; i bin de rili luk to di pemɛnt.
27 Na fet mek i kɔmɔt na Ijipt, bɔt i nɔ fred di kiŋ in wamat, bikɔs i kɔntinyu fɔ tinap tranga wan lɛk se i de si di Wan we pɔsin nɔ de si.
28 Na fet mek i du di Pasova ɛn rɔb di blɔd na di domɔt, so dat di wan we de kil nɔ go du bad to* dɛn fɔs pikin dɛn.
29 Na fet mek dɛn pas midul di Rɛd Si lɛk se na dray grɔn, bɔt we di Ijipshian dɛn tray fɔ pas, di wata kɔba dɛn.
30 Na fet mek di wɔl dɛn na Jɛriko fɔdɔm afta dɛn dɔn mach rawnd am fɔ sɛvin dez.
31 Na fet mek Reab, we na bin raregal, nɔ day wit di wan dɛn we bin mek trangayes, bikɔs i bin wɛlkɔm di wan dɛn we bin go wach di land sikrit wan.
32 Wetin igen a go se? Tɛm nɔ go du if a kɔntinyu fɔ tɔk bɔt Gidiɔn, Berak, Samsin, Jɛfta, Devid, wit Samiɛl ɛn di ɔda prɔfɛt dɛn.
33 Na fet mek dɛn win kiŋdɔm dɛn, dɛn mek wetin rayt apin, Gɔd prɔmis dɛn, dɛn lɔk layɔn dɛn mɔt,
34 faya nɔ du dɛn natin, dɛn balans we dɛn want fɔ kil dɛn wit sɔd, dɛn bin wik bɔt Gɔd mek dɛn pawaful, dɛn bin pawaful fɔ fɛt wɔ, dɛn bin mek di sojaman dɛn we kam fɛt dɛn rɔnawe.
35 Sɔm uman dɛn pɔsin we bin dɔn day gɛt layf bak, bɔt pipul dɛn mek ɔda wan dɛn sɔfa bikɔs dɛn nɔ gri fɔ du bad fɔ lɛ dɛn fri dɛn, so dat di layf we dɛn go gɛt bak go bɛtɛ pas di ɔda wan dɛn yon.
36 Ɔda pipul dɛn yon tɛst na we dɛn bin de provok dɛn ɛn bit dɛn gud gud wan, pantap dat, dɛn bin de chen sɔm ɛn put dɛn na prizin.
37 Dɛn bin de ston dɛn, tɛst dɛn, kɔt dɛn midul, yuz sɔd fɔ kil dɛn, dɛn bin de wɛr ship kanda ɛn got kanda. Dɛn bin nid sɔntin, dɛn bin de gɛt prɔblɛm, dɛn bin de trit dɛn bad;
38 di wɔl nɔ bin fit fɔ gɛt dɛn. Dɛn bin de liv na dɛzat dɛn, mawntin dɛn, kev dɛn, ɛn ol dɛn na di wɔl.
39 Ɛn pan ɔl we Gɔd bin mek ɔl dɛn wan ya no se dɛn bin de du wetin rayt na in yay bikɔs ɔf dɛn fet, dɛn stil nɔ gɛt di tin dɛn we Gɔd prɔmis,
40 bikɔs Gɔd bin dɔn si bɛtɛ tin fɔ wi, so dat dɛn nɔ go pafɛkt bifo wi.
Futnot Dɛn
^ Ɔ “wi gret gret granpa dɛn.”
^ Ɔ “di difrɛn tɛm dɛn.” Rid Baybul Wɔd dɛn Minin, “Tɛm.”
^ Insay Grik, “bɔks.” Dis na bɔks we bin gɛt 4 kɔna ɛn di ɔnda bin flat.
^ Ɔ “drɔ di plan.”
^ Ɔ “gɛt pawa we mek i gɛt bɛlɛ.”
^ Ɔ “fɔ bɛr am.”
^ Insay Grik, “tɔch.”
