Ibruz 12:1-29
12 So bikɔs wi gɛt bɔku witnɛs dɛn we tan lɛk klawd we de rawnd wi, lɛ wi trowe ɛnitin we gɛt wet ɛn di sin we de tangul wi izi wan, ɛn mek wi bia we wi de rɔn di res we de bifo wi,
2 as wi de rili luk di Chif Lida ɛn di Wan we de mek wi fet pafɛkt, dat na, Jizɔs. Bikɔs ɔf di gladi-at we i go gɛt, i bia na di tik we i sɔfa pan,* i nɔ tek shem mek natin, ɛn i dɔn sidɔm na Gɔd, we de na di tron na ɛvin, in raytan.
3 Una tink gud wan bɔt di wan we dɔn bia we sina dɛn tɔk bad bɔt am we i bi se wetin dɛn tɔk ambɔg dɛnsɛf sɛf, so dat una nɔ go taya ɛn giv-ɔp.
4 We una de fɛt da sin de, una nɔ ɛva fɛt te blɔd kɔmɔt pan una.
5 Ɛn una dɔn rili fɔgɛt di advays we Gɔd gi una as in pikin dɛn we i se: “Mi pikin nɔ tek di kɔrɛkt we Jiova* de kɔrɛkt yu as sɔntin we nɔ min natin, nɔ giv-ɔp we i kɔrɛkt yu;
6 Jiova* de kɔ- rɛkt di wan dɛn we i lɛk, infakt, i de bit* ɛnibɔdi we i tek as pikin.”
7 Una nid fɔ bia bikɔs dat de pan una kɔrɛkshɔn.* Gɔd de trit una lɛk in pikin dɛn. Us pikin de we in papa nɔ de kɔrɛkt?
8 Bɔt if una ɔl nɔ gɛt dis kɔrɛkshɔn, una nɔto in rial pikin dɛn, una na ɔda pɔsin in pikin dɛn.
9 Apat frɔm dat, wi mɔtalman papa dɛn bin de kɔrɛkt wi, ɛn wi bin de gi dɛn rɛspɛkt. Una nɔ tink se dat fɔ mek wi rɛdi fɔ put wisɛf ɔnda di Papa we de yuz in oli spirit fɔ dayrɛkt wi layf ɛn kɔntinyu fɔ liv?
10 Dɛn kɔrɛkt wi fɔ shɔt tɛm akɔdin to wetin fayn to dɛn, bɔt Gɔd de du so fɔ wi yon bɛnifit so dat wi go oli lɛk am.
11 Fɔ tru, no kɔrɛkshɔn nɔ de we de mek pɔsin gladi di tɛm we dɛn de kɔrɛkt am, i kin fil am; bɔt leta di wan dɛn we tek di kɔrɛkshɔn kin gɛt pis ɛn du wetin rayt.
12 So una mek di an dɛn we de dɔŋ ɛn di ni dɛn we dɔn wik, strɔng,
13 ɛn una kɔntinyu fɔ mek stret rod dɛn fɔ una fut, so dat di pat we wik nɔ go kɔmɔt na di jɔynt, bɔt i go wɛl.
14 Una tray tranga wan fɔ gɛt pis wit ɔlman ɛn oli bikɔs pɔsin we nɔ oli nɔ go si di Masta.
15 Una tek tɛm mek una nɔ lɔs Gɔd in spɛshal gudnɛs,* so dat no rut we gɛt pɔyzin nɔ go gro ɛn kɔz trɔbul ɛn mek bɔku pipul dɛn dɔti;
16 una tek tɛm mek nɔbɔdi nɔ de pan una we de du mami ɛn dadi biznɛs di we aw Gɔd nɔ want* ɔ we nɔ de sho wan rɛspɛkt fɔ tin dɛn we oli, lɛk Isɔ we gi in rayt dɛn we i fɔ gɛt as di fɔs pikin, jɔs fɔ wan it.
17 Una no se leta we i want di blɛsin, dɛn nɔ gi am; pan ɔl we i kray ɛn tray tranga wan fɔ chenj in papa in maynd, i stil nɔ gɛt am.
18 Di tin we una dɔn kam nia nɔto sɔntin we una de tɔch ɛn we faya de kech pan, ɛn we gɛt dak klawd ɛn we rili dak ɛn we gɛt big big briz,
19 ɛn lawd trɔmpɛt ɛn vɔys we de tɔk, we i bi se we di pipul dɛn yɛri am, dɛn beg mek i nɔ kɔntinyu fɔ tɔk to dɛn.
20 Dɛn nɔ ebul fɔ bia we Gɔd tɔk se: “Ivin if animal tɔch di mawntin, dɛn fɔ ston am.”
21 Ɛn di tin we dɛn si bin so fiaful dat Mozis bin se: “A de fred ɛn trimbul.”
22 Bɔt una dɔn kam nia wan Mawnt Zayɔn, di Gɔd we de alayv in siti, dat na Jerusɛlɛm we de na ɛvin, ɛn bɔku bɔku* enjɛl dɛn
23 we gɛda, ɛn di fɔs pikin in kɔngrigeshɔn we dɛn dɔn rayt dɛn nem dɛn na ɛvin, ɛn Gɔd we na di Jɔj fɔ ɔlman, ɛn di wan dɛn we de du wetin rayt we de liv dɛn layf lɛk aw di spirit de dayrɛkt dɛn ɛn we dɛn dɔn mek pafɛkt,
24 ɛn Jizɔs we na di midulman fɔ wan nyu agrimɛnt, ɛn di blɔd we dɛn sɛn sɛn, we de tɔk fayn wan pas Ebɛl in blɔd.
25 Una tek tɛm lɛ una nɔ mek dɛfyes pan* di wan we de tɔk. If di wan dɛn we nɔ lisin to di wan we de gi dɛn Gɔd in wɔnin na di wɔl nɔ bin ebul rɔnawe pan di pɔnishmɛnt, dat min se wi nɔ go rɔnawe pan di pɔnishmɛnt if wi tɔn wi bak pan di wan we de tɔk frɔm ɛvin!
26 Da tɛm de in vɔys bin shek di wɔl, bɔt naw i dɔn prɔmis se: “A nɔ go jɔs shek di wɔl igen, bɔt a go shek ɛvin bak.”
27 Di wɔd “igen” de sho se dɛn go pul di tin dɛn we dɛn shek, di tin dɛn we dɛn bin dɔn mek, so dat di tin dɛn we nɔ shek go lɛf.
28 So bikɔs wi go gɛt Kiŋdɔm we dɛn nɔ ebul shek, lɛ wi kɔntinyu fɔ gɛt Gɔd in spɛshal gudnɛs,* we go mek Gɔd gri fɔ mek wi du oli wok fɔ am ɛn sho se wi de rili fred am.
29 Wi Gɔd na faya we de pwɛl kpatakpata.
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “pɔnish.”
^ Ɔ “trenin.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “bɔku bɔku tawzin.”
^ Ɔ “gi ɛkskyuz to; mek lɛk se una nɔ notis.”
^ Rid Baybul Wɔd dɛn Minin.
