Ibruz 2:1-18
2 Na dat mek wi nid fɔ pe mɔ atɛnshɔn to di tin dɛn we wi dɔn yɛri, so dat wi nɔ go ɛva kɔmɔt na di rayt rod smɔl smɔl.
2 If di wɔd dɛn we Gɔd yuz enjɛl dɛn fɔ tɔk kam bi tru, ɛn ɛnibɔdi we sin ɛn nɔ obe bin gɛt di rayt pɔnishmɛnt,
3 aw wi go rɔnawe if wi nɔ bisin igen bɔt di wɔndaful we aw wi go sev? Na wi Masta bigin fɔ tɔk bɔt am ɛn di wan dɛn we yɛri am mek wi no se na tru,
4 ɛn Gɔd insɛf sho se na tru bay we i yuz sayn dɛn, wɔndaful tin dɛn, difrɛn kayn pawaful wok dɛn ɛn gi pipul dɛn oli spirit akɔdin to wetin i want.
5 Nɔto enjɛl dɛn Gɔd put oba di wɔl we gɛt fɔ kam, we wi de tɔk bɔt.
6 Bɔt na wansay wan witnɛs se: “Udat na mɔtalman we yu de mɛmba am, ɔ udat na mɔtalman pikin we yu de kia fɔ?
7 Yu mek enjɛl dɛn pas am smɔl; yu gi am glori ɛn ɔnɔ we tan lɛk krawn, ɛn yu pik am fɔ de oba di tin dɛn we yu mek wit yu an.
8 Yu put ɔltin ɔnda in fut.” We Gɔd put ɔltin ɔnda am, natin nɔ de we i nɔ put ɔnda am. Bɔt naw wi nɔ de si ɔltin ɔnda am.
9 Bɔt wi de si Jizɔs, we Gɔd bin mek enjɛl dɛn pas am smɔl. Naw Gɔd dɔn gi am glori ɛn ɔnɔ we tan lɛk krawn fɔ we i sɔfa ɛn day, so dat tru Gɔd in spɛshal gudnɛs* i go tes day fɔ ɔlman.
10 Ɔltin de fɔ Gɔd ɛn na in mek dɛn de. Fɔ mek bɔku bɔypikin dɛn gɛt glori, i bin fayn fɔ lɛ Gɔd mek di Chif Lida we de ɛp dɛn fɔ sev pafɛkt bay we i sɔfa.
11 Di wan we de mek pɔsin oli ɛn di wan dɛn we dɛn de mek oli kɔmɔt frɔm wan pɔsin, ɛn na dat mek i nɔ de shem fɔ se dɛn na in brɔda dɛn,
12 jɔs lɛk aw i se: “A go tɔk bɔt yu nem to mi brɔda dɛn; a go siŋ fɔ prez yu midul di kɔngrigeshɔn.”
13 Ɛn i tɔk bak se: “A go abop pan am.” Ɛn tɔk bak se: “Luk mi ɛn di smɔl pikin dɛn we Jiova* gi mi.”
14 So bikɔs di “smɔl pikin dɛn” gɛt blɔd ɛn mɔtalman bɔdi, insɛf gɛt dɛn sem tin dɛn ya, so dat we i day, i go mek di wan we ebul mek pɔsin day nɔ de igen, dat na, di Dɛbul,
15 ɛn fri ɔl di wan dɛn we bin tan lɛk slev dɛn, bikɔs dɛn ol layf, dɛn bin de fred day.
16 Nɔto enjɛl dɛn i de ɛp, na Ebraam in pikin dɛn i de ɛp.
17 So i bin gɛt fɔ tan lɛk in “brɔda dɛn” ɔlkayn we, so dat i go bi ay prist we gɛt sɔri-at ɛn we fetful pan ɔltin we gɛt fɔ du wit Gɔd biznɛs, fɔ mek i go mek sakrifays fɔ di pipul dɛn sin so dat dɛn go gɛt pis wit Gɔd.
18 Bikɔs insɛf bin sɔfa we dɛn bin de tɛst am, i ebul ɛp di wan dɛn we dɛn de tɛst.
