Ibruz 3:1-19
3 So, mi oli brɔda dɛn, di wan dɛn we Gɔd dɔn kɔl fɔ go na ɛvin, una tink gud bɔt di apɔsul ɛn ay prist we wi no*—Jizɔs.
2 I bin fetful to Gɔd we pik am, jɔs lɛk aw Mozis insɛf bin fetful na Gɔd in wan ol os.
3 I* fit fɔ gɛt mɔ glori pas Mozis, bikɔs di pɔsin we bil os gɛt mɔ ɔnɔ pas di os insɛf sɛf.
4 Na tru se ɛni os we de, na pɔsin bil am, bɔt di wan we mek ɔltin na Gɔd.
5 Mozis bin fetful we in na bin savant na Gɔd in wan ol os, ɛn di wok we i du bin de sho di tin dɛn we dɛn go tɔk bɔt tumara bambay;
6 bɔt Krays bin fetful we in na pikin we de in chaj ɔf Gɔd in os. Wi na In os if wi kɔntinyu fɔ fil fri fɔ tɔk ɛn kɔntinyu fɔ gɛt di op we wi gladi fɔ te di ɛnd.
7 So jɔs lɛk aw di oli spirit se, “Tide if una lisin to am,
8 una nɔ fɔ mek una at strɔng lɛk di tɛm we dɛn mek i vɛks bad bad wan, lɛk di de we dɛn tɛst am na di wildanɛs,*
9 usay una gret gret granpa dɛn tɛst mi ɛn tray mi, pan ɔl we dɛn si di tin dɛn we a du fɔ 40 ia.
10 Na dis mek a gens wit dis jɛnɛreshɔn ɛn tɔk se: ‘Insay dɛn at, dɛn kin lɛf mi ɔltɛm, ɛn dɛn nɔ no natin bɔt mi.’
11 So we mi at wam, a swɛ se: ‘Dɛn nɔ go rɛst we a de rɛst.’”
12 So, mi brɔda dɛn, una tek tɛm mek nɔn pan una nɔ ɛva gɛt wikɛd at we nɔ gɛt fet igen bikɔs una kɔmɔt nia di Gɔd we de alayv;
13 bɔt una kɔntinyu fɔ ɛnkɔrej unasɛf ɛnide, as lɔng as dɛn kɔl am “Tide,” so dat di pawa we sin gɛt fɔ ful pɔsin nɔ go mek una at strɔng.
14 Wi go gɛt wetin Krays go gɛt if nɔmɔ wi kɔntinyu fɔ gɛt di kɔnfidɛns we wi bin gɛt frɔm di biginin te di ɛnd.
15 Jɔs lɛk aw dɛn tɔk se: “Tide if una lisin to am, una nɔ fɔ mek una at strɔng lɛk di tɛm we dɛn mek i vɛks bad bad wan.”
16 Na udat dɛn bin yɛri bɔt stil mek i vɛks bad bad wan? Infakt, nɔto ɔl di wan dɛn we kɔmɔt na Ijipt we bin de ɔnda Mozis?
17 Pantap dat, udat dɛn Gɔd bin rili gens wit fɔ 40 ia? Nɔto di wan dɛn we sin ɛn day na di wildanɛs?*
18 Ɛn na to udat dɛn i swɛ se dɛn nɔ go rɛst we i de rɛst? Nɔto to di wan dɛn we nɔ obe?
19 So wi si se dɛn nɔ rɛst we i de rɛst bikɔs dɛn nɔ gɛt fet.
Futnot Dɛn
^ Ɔ “wi de tɔk bɔt.”
^ Dat na, Jizɔs.
^ Rid Baybul Wɔd dɛn Minin.
^ Rid Baybul Wɔd dɛn Minin.
