Ibruz 4:1-16
4 So, bikɔs Gɔd stil prɔmis se wi go rɛst we i de rɛst, lɛ wi tek tɛm* mek wan pan una nɔ du wetin go mek i nɔ bɛnifit frɔm di prɔmis.
2 Dɛn dɔn tɛl wi bak bɔt di gud nyuz jɔs lɛk aw dɛn bin tɛl dɛn; bɔt di wɔd we dɛn yɛri nɔ bɛnifit dɛn, bikɔs dɛn nɔ bin gɛt fet lɛk di wan dɛn we lisin.
3 Wi we bin dɔn sho se wi gɛt fet de rɛst we i de rɛst, jɔs lɛk aw i bin dɔn se: “So we mi at wam, a swɛ se: ‘Dɛn nɔ go rɛst we a de rɛst,’” pan ɔl we i bin dɔn dɔn in wok dɛn frɔm we di wɔl bigin.
4 Na wan ples i bin tɔk bɔt di de we mek sɛvin se: “Ɛn Gɔd rɛst di de we mek sɛvin afta i dɔn du ɔl in wok dɛn,”
5 ɛn i tɔk bak na ya se: “Dɛn nɔ go rɛst we a de rɛst.”
6 So, bikɔs chans stil de fɔ mek sɔm pipul dɛn rɛst we Gɔd de rɛst, ɛn di wan dɛn we bin yɛri di gud nyuz fɔs nɔ bin rɛst we Gɔd de rɛst bikɔs dɛn nɔ bin de obe,
7 afta lɔng tɛm, i pik bak wan de bay we i tɔk insay Devid in sam se, “Tide”; jɔs lɛk aw i de ɔpsay se, “Tide if una lisin to am, una nɔ fɔ mek una at strɔng.”
8 If Jɔshwa bin kɛr dɛn go na ples fɔ rɛst, Gɔd nɔ bin fɔ tɔk bak bɔt ɔda de.
9 So wan de fɔ rɛst we na Sabat, de fɔ Gɔd in pipul dɛn.
10 Ɛnibɔdi we de rɛst we Gɔd de rɛst, in bak dɔn blo fɔ wok jɔs lɛk aw Gɔd rɛst afta i wok.
11 So lɛ wi du wi bɛst fɔ rɛst we Gɔd de rɛst, so dat nɔbɔdi nɔ go falamakata di wan dɛn we nɔ bin de obe.
12 Gɔd in wɔd de alayv ɛn i gɛt pawa, i shap pas ɛni sɔd we gɛt tu ɛj, ɛn i de go rayt insay pɔsin ɛn divayd di sol* ɛn spirit,* di jɔynt dɛn ɛn di maro, ɛn i ebul no wetin pɔsin de tink ɛn di tin dɛn we i de plan na in at.
13 Natin nɔ de we ayd pan Gɔd, ɛn ɔltin nekɛd to di wan we wi go ansa to ɛn i de si ɔltin.
14 So, bikɔs wi gɛt wɔndaful ay prist we dɔn go na ɛvin, dat na Gɔd in Pikin we na Jizɔs, lɛ wi kɔntinyu fɔ tɔk bɔt am na pɔblik.
15 Wi nɔ gɛt ay prist we nɔ de ɔndastand* di say dɛn we wi wik, bɔt wi gɛt wan we dɛn dɔn tɛst ɔlkayn we lɛk wi, bɔt i nɔ sin.
16 So lɛ wi go bifo Gɔd in tron, di Gɔd we de gi spɛshal gudnɛs,* ɛn fil fri fɔ pre to am, so dat i go sɔri fɔ wi ɛn gi wi in spɛshal gudnɛs* fɔ ɛp wi di rayt tɛm.
Futnot Dɛn
^ Insay Grik, “fred.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “fil sɔri fɔ.”
^ Rid Baybul Wɔd dɛn Minin.
^ Rid Baybul Wɔd dɛn Minin.
