Jems 3:1-18
3 Mi brɔda dɛn, bɔku pan una nɔ fɔ bi ticha dɛn, bikɔs wi no se Gɔd gɛt fɔ jɔj wi strikt wan pas di ɔda wan dɛn.
2 Wi ɔl kin mek mistek* bɔku tɛm. If ɛnibɔdi nɔ de mek mistek we i de tɔk, i pafɛkt, ɛn i ebul fɔ kɔntrol in wan ol bɔdi.
3 If wi kin put sɔntin na ɔs dɛn mɔt fɔ mek dɛn obe wi, wi kin ebul bak fɔ kɔntrol dɛn wan ol bɔdi.
4 Luk di ship dɛn bak na wata: Pan ɔl we dɛn rili big ɛn na big big briz kin kɛr dɛn go, na smɔl smɔl tin we fiba padul di man we de na di stiarin kin yuz fɔ kɔntrol am fɔ go usay i want lɛ i go.
5 Semweso, di tɔŋ na smɔl pat na di bɔdi, bɔt i de bost bad bad wan. Na smɔl faya kin mek big big fɔrɛst kech.
6 Di tɔŋ insɛf na faya. Pan ɔl di pat dɛn na wi bɔdi, di tɔŋ tinap fɔ ɔl wetin nɔ rayt, bikɔs i de dɔti di wan ol bɔdi, ɛn i de mek faya kech na pɔsin in layf, ɛn na Gɛɛna* de layt faya pan am.
7 Mɔtalman ebul tem ɔlkayn wayl animal, bɔd, animal dɛn we de drɛg na grɔn, ɛn animal dɛn na di si, ɛn dɛn dɔn de du dat.
8 Bɔt no mɔtalman nɔ ebul fɔ tem di tɔŋ. I nɔ de tek wan kɔntrol ɛn i de du bad tin dɛn, i gɛt pɔyzin we de kil.
9 Wi de yuz am fɔ prez Jiova,* di Papa, ɛn yuz am bak fɔ swɛ mɔtalman we Gɔd mek “lɛk insɛf.”
10 Na di sem mɔt blɛsin ɛn swɛ de kɔmɔt.
Mi brɔda dɛn, i nɔ fayn mek tin de apin dis we.
11 Spriŋ* nɔ de pul frɛsh* wata ɛn bita wata na di sem say, nɔto so?
12 Mi brɔda dɛn, fig tik nɔ de bia ɔliv, ɛn grep vayn nɔ de bia fig, nɔto so? Ɛn frɛsh wata nɔ de kɔmɔt pan sɔl wata.
13 Udat pan una gɛt sɛns ɛn ebul ɔndastand? Lɛ i biev fayn ɛn tek tɛm du tin fɔ sho se i gɛt sɛns.
14 Bɔt if una de jɛlɔs bad bad wan ɛn una lɛk plaba* na una at, una nɔ go de bost ɛn lay.
15 Dis nɔto di sɛns we de kɔmɔt ɔp kam dɔŋ; na di wan we kɔmɔt na dis wɔl, di wan we pipul dɛn we de du wetin dɛn bɔdi want gɛt, di wan we di dimɔn dɛn gɛt.
16 Ɛnisay we pipul dɛn de jɛlɔs ɛn lɛk plaba,* kɔnfyushɔn ɛn ɔlkayn bad tin go de de.
17 Bɔt fɔst-ɔf-ɔl, di sɛns we de kɔmɔt ɔp de mek pɔsin klin, dɔn i de mek i lɛk fɔ mek pis, i de mek i nɔ de pin, i de mek i rɛdi fɔ obe, i de mek i gɛt sɔri-at ɛn biev fayn, i de mek i nɔ de tek wan pɔsin bɛtɛ pas ɔda pɔsin, i de mek i nɔ de mek ipokrit.
18 Pantap dat, wetin rayt de apin usay pis de fɔ di wan dɛn we de mek pis.*
Futnot Dɛn
^ Insay Grik, “fɔdɔm.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “Wata we bɔs na grɔn.”
^ Insay Grik, “swit.”
^ Ɔ i kin bi, “de tink tumɔs bɔt aw una nɔmɔ go go bifo.”
^ Ɔ i kin bi, “de tink tumɔs bɔt aw dɛn nɔmɔ go go bifo.”
^ Ɔ i kin bi, “Di wan dɛn we de mek pis de mek wetin rayt apin usay pis de.”
