Jems 4:1-17
4 Wetin kam wit di wɔ dɛn ɛn di fɛt-fɛt we una de pan? Nɔto bikɔs ɔf di tin dɛn we una bɔdi want we de fɛt fɔ kɔntrol una?
2 Una want bɔt una nɔ gɛt. Una de kɔntinyu fɔ kil ɛn milɛ, bɔt una nɔ ebul fɔ gɛt. Una de kɔntinyu fɔ fɛt ɛn mek wɔ. Una nɔ gɛt bikɔs una nɔ de aks.
3 Ɛn we una aks, una nɔ de gɛt bikɔs una de aks fɔ di rɔng rizin, so dat una go yuz am fɔ du wetin una bɔdi want.
4 Una we bambot,* una nɔ no se we una mek padi wit di wɔl una dɔn bi Gɔd in ɛnimi? So ɛnibɔdi we want fɔ bi padi to di wɔl de mek insɛf Gɔd in ɛnimi.
5 Ɔ una tink se na fɔ natin mek di skripchɔ se: “Di milɛ* we de insay wi de mek wi want difrɛn difrɛn tin dɛn”?
6 Bɔt di spɛshal gudnɛs* we Gɔd de gi bɛtɛ pas am fawe. So di skripchɔ se: “Gɔd de agens di wan dɛn we prawd, bɔt i de gi in spɛshal gudnɛs* to di wan dɛn we de put dɛnsɛf dɔŋ.”
7 So una put unasɛf ɔnda Gɔd, bɔt una de agens di Dɛbul, ɛn i go rɔnawe pan una.
8 Una kam nia Gɔd, ɛn insɛf go kam nia una. Una dɛn sina dɛn, una klin una an, ɛn una we nɔ de mekɔp una maynd fɔ du sɔntin, una klin una at.
9 Una fɔ sɔri, una at fɔ pwɛl, ɛn una fɔ kray. Lɛ una laf tɔn to pwɛlat. Una nɔ fɔ gladi, una fɔ fil bad.
10 Una put unasɛf dɔŋ na Jiova* in yay, ɛn i go es una ɔp.
11 Mi brɔda dɛn, una lɛf fɔ tɔk agens una kɔmpin dɛn. Ɛnibɔdi we de tɔk agens wan brɔda ɔ we de jɔj in brɔda de tɔk agens lɔ ɛn de jɔj lɔ. If yu jɔj lɔ, yu nɔ de du wetin di lɔ se, bɔt yu dɔn bi jɔj.
12 Na wangren Pɔsin de we de gi lɔ ɛn we de jɔj, dat na di wan we ebul fɔ sev ɛn dɔnawe wit pɔsin. Bɔt udat na yu fɔ de jɔj yu neba?
13 Una lisin, una we se: “Tide ɔ tumara wi go travul go na dis siti ɛn tek wan ia de, ɛn wi go du biznɛs ɛn mek prɔfit,”
14 we i bi se una nɔ no aw una layf go tan lɛk tumara. Una na dyu we de apia fɔ shɔt tɛm ɛn lɔs.
15 Bifo dat, una fɔ se: “If Jiova* want, wi go liv ɛn du dis ɔ dat.”
16 Bɔt naw una gladi we una de bost pasmak. Dɛn kayn bost dɛn de, dɛn ɔl wikɛd.
17 So, if sɔmbɔdi no aw fɔ du wetin rayt, bɔt i nɔ du am, i dɔn sin.
Futnot Dɛn
^ Ɔ “Una we nɔ fetful.”
^ Insay Grik, “spirit.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
