Jems 5:1-20
5 Una lisin, una dɛn jɛntriman dɛn; una kray bita wan fɔ di sɔfa we una gɛt fɔ sɔfa.
2 Una jɛntri dɔn rɔtin ɛn tumbu dɔn it una klos.
3 Una gold ɛn silva dɔn rɔsti, ɛn dɛn rɔsti go bi witnɛs agens una ɛn i go swɛla una bɔdi. Wetin una dɔn gɛda go tan lɛk faya insay di las dez.
4 Di wokman dɛn we dɔn avɛst una fam de kray bikɔs una nɔ pe dɛn, ɛn Jiova* we gɛt bɔku bɔku sojaman dɛn dɔn yɛri we dɛn de kray fɔ mek pɔsin ɛp dɛn.
5 Una dɔn liv pɔsh layf, ɛn una bin jɔs de nɔmɔ fɔ ɛnjɔy unasɛf na di wɔl. Una de it ɛn jɔs de gɛt bɔdi te di de we dɛn go kil una.
6 Una dɔn kɔndɛm di wan we de du wetin rayt ɛn kil am. I nɔ de agens una?
7 So mi brɔda dɛn, una peshɛnt te di tɛm we di Masta go de wit wi. Di fama de kɔntinyu fɔ wet fɔ di valyu frut na di wɔl, i de peshɛnt te di fɔs ren ɛn di las ren kam.
8 Unasɛf fɔ peshɛnt; una* tinap tranga wan, bikɔs di tɛm we di Masta go de wit wi dɔn kam nia.
9 Mi brɔda dɛn, una nɔ grɔmbul* pan una kɔmpin dɛn, so dat di Masta nɔ go jɔj una. Luk! Di Jɔj tinap bifo di domɔt.
10 Mi brɔda dɛn, una falamakata di we aw di prɔfɛt dɛn we bin tɔk fɔ Jiova* bin de sɔfa ɛn aw dɛn bin de sho se dɛn gɛt peshɛnt.
11 Wi go se di wan dɛn we dɔn bia gɛt gladi-at.* Una yɛri bɔt di kayn we aw Job bin bia ɛn una si wetin Jiova* du fɔ am, una si se Jiova* rili lɛk wi ɛn i gɛt sɔri-at.
12 Pantap dat, mi brɔda dɛn, una lɛf fɔ swɛ to ɛvin, to di wɔl, ɔ to ɛni ɔda tin. Bɔt lɛ una “Yɛs” min yɛs ɛn una “Nɔ” min nɔ, so dat Gɔd nɔ go jɔj una.
13 Ɛnibɔdi de pan una we tin tranga fɔ am? Mek i go de pre. Ɛnibɔdi de pan una we in at gladi? Mek i siŋ sam dɛn.
14 Ɛnibɔdi de pan una we sik? Mek i kɔl di ɛlda dɛn na di kɔngrigeshɔn, ɛn lɛ dɛn pre pan am, lɛ dɛn rɔb ɔyl pan am akɔdin to wetin Jiova* want.
15 Ɛn di fet we dɛn gɛt we dɛn pre go mek di wan we sik* wɛl, ɛn Jiova* go es am ɔp. Ɛn if i bin dɔn sin, Gɔd go fɔgiv am.
16 So una go de kɔnfɛs una sin dɛn opin wan to una kɔmpin dɛn, ɛn una pre fɔ una kɔmpin dɛn, so dat una go wɛl. We pɔsin we de du wetin rayt rili beg Gɔd, dat rili gɛt pawa.
17 Ilayja na bin man we gɛt filin lɛk wi, bɔt we i pre wit ɔl in at fɔ mek ren nɔ kam, ren nɔ kam na di land fɔ tri ia siks mɔnt.
18 Dɔn i pre bak, ɛn ren kɔmɔt na ɛvin ɛn frut dɛn gro na di land.
19 Mi brɔda dɛn, if ɛnibɔdi de pan una we dɛn dɔn ful fɔ mek i lɛf fɔ fala di tru ɛn ɔda pɔsin mek i tɔn bak,
20 una no se ɛnibɔdi we mek sina tɔn bak ɛn lɛf di bad we i bin de du, i go sev am* mek i nɔ day ɛn kɔba bɔku bɔku sin dɛn.
Futnot Dɛn
^ Rid Baybul Wɔd dɛn Minin.
^ Insay Grik, “una mek una at.”
^ Ɔ “pini; le kɔmplen.” Insay Grik, “blo kam dɔŋ.”
^ Rid Baybul Wɔd dɛn Minin.
^ Ɔ “blɛsin.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ i kin bi, “taya.”
^ Rid Baybul Wɔd dɛn Minin.
^ Ɔ “in sol.”
