Job 1:1-22
1 Wan man bin de na wan ples we dɛn kɔl Ɔz, in nem na Job.* I bin de du wetin rayt ɛn waka tret wit Gɔd.* I bin de fred Gɔd ɛn avɔyd wetin bad.
2 I bin bɔn sɛvin bɔypikin dɛn ɛn tri galpikin dɛn.
3 I bin gɛt 7,000 ship dɛn, 3,000 kamɛl dɛn, 1,000 kaw dɛn,* ɛn 500 dɔnki dɛn.* Dɔn bak, i bin gɛt bɔku bɔku savant dɛn, ɛn dat mek i jɛntri ɛn impɔtant pas ɔl di pipul dɛn na di Ist.
4 Ich wan pan in bɔypikin dɛn bin de mek pati na dɛn os bay tɔn. Dɛn kin invayt dɛn tri sista dɛn fɔ it ɛn drink wit dɛn.
5 Afta dɛn ɔl dɔn mek dɛn pati, Job kin sɛn kɔl dɛn fɔ lɛ i mek dɛn oli. I kin grap ali mɔnin ɛn mek bɔn sakrifays dɛn fɔ ich wan pan dɛn. Job kin tɔk se: “Sɔntɛm mi pikin dɛn dɔn sin ɛn kɔs Gɔd na dɛn at.” Na dat Job kin du ɔltɛm.
6 Di de kam we di tru Gɔd in bɔypikin* dɛn go fɔ tinap bifo Jiova, ɛn Setan insɛf bin go wit dɛn.
7 Na de Jiova aks Setan se: “Usay yu kɔmɔt?” Setan ansa Jiova se: “A bin de waka waka na di wɔl fɔ si wetin de apin de.”
8 Dɔn Jiova aks Setan se: “Yu dɔn tek notis ɔf* mi savant Job, nɔto so? Nɔbɔdi nɔ tan lɛk am na di wɔl. I de du wetin rayt, ɛn i de waka tret na mi yay.* I de fred mi ɛn avɔyd wetin bad.”
9 Na de Setan aks Jiova se: “Yu tink se na fɔ natin Job de fred yu?
10 Yu nɔ dɔn protɛkt am bay we yu put fɛns rawnd in, in os, ɛn ɔl wetin i gɛt? Yu dɔn blɛs wetin i de du ɛn in animal dɛn de ɔlsay na di land.
11 Bɔt strɛch yu an ɛn tek ɔl wetin i gɛt, i go mɔs kɔs yu rayt bifo yu fes.”
12 Na de Jiova tɛl Setan se: “Luk! Ɔl wetin i gɛt de na yu an.* Jɔs nɔ tɔch am!” So Setan kɔmɔt bifo Jiova.
13 Di de we Job in bɔypikin dɛn ɛn in galpikin dɛn bin de it ɛn drink wayn na dɛn big brɔda in os,
14 wan mɛsenja kam to Job. I tɛl Job se: “Di kaw dɛn bin de dig di fam ɛn di dɔnki dɛn bin de it gras nia de
15 we di Sabian dɛn atak dɛn ɛn tek dɛn, dɔn dɛn kil di savant dɛn wit sɔd. Na mi wangren ɛskep fɔ kam tɛl yu.”
16 As i de tɔk, ɔda wan kam ɛn tɔk se: “Faya* frɔm Gɔd kɔmɔt na ɛvin ɛn kech pan di ship dɛn ɛn di savant dɛn ɛn bɔn dɛn! Na mi wangren ɛskep fɔ kam tɛl yu.”
17 As i de tɔk, ɔda wan kam ɛn tɔk se: “Di Kaldian dɛn mek tri grup ɛn kam tif di kamɛl dɛn, dɔn dɛn kil di savant dɛn wit sɔd. Na mi wangren ɛskep fɔ kam tɛl yu.”
18 As i de tɔk, na de ɔda wan kam ɛn tɔk se: “Yu bɔypikin dɛn ɛn yu galpikin dɛn bin de it ɛn drink wayn na dɛn big brɔda in os.
19 Wantɛm wantɛm, big big briz kɔmɔt frɔm di wildanɛs* ɛn brok di 4 kɔna dɛn na di os. So di os fɔdɔm pan dɛn ɛn kil dɛn. Na mi wangren ɛskep fɔ kam tɛl yu.”
20 Na de Job grap ɛn chɛr in klos ɛn kɔt kɔt in ia na in ed. Dɔn i butu ɛn ledɔm na grɔn
21 ɛn tɔk se:
“A kɔmɔt na mi mama in bɛlɛ nekɛd wan,Ɛn a go go bak nekɛd.
Jiova dɔn gi ɛn Jiova dɔn tek.
Lɛ Jiova in nem kɔntinyu fɔ gɛt prez.”
22 Pan ɔl dis, Job nɔ sin ɔ tɔk se Gɔd dɔn du ɛnitin bad.
Futnot Dɛn
^ I kin min “Pɔsin We Pipul dɛn Et.”
^ Ɔ “ɛn i nɔ gɛt wan blem.”
^ Insay Ibru, “500 pia kaw dɛn.”
^ Insay Ibru, “uman dɔnki dɛn.”
^ Dis na wɔd we Ibru pipul dɛn de yuz we de tɔk bɔt Gɔd in enjɛl dɛn.
^ Insay Ibru, “Yu dɔn put yu at pan.”
^ Ɔ “ɛn i nɔ gɛt wan blem.”
^ Ɔ “de ɔnda yu kɔntrol.”
^ Ɔ i kin bi, “Laytin.”
^ I kin min ples we wanwan pipul dɛn ɔ plant de. Rid Baybul Wɔd dɛn Minin.
