Job 24:1-25
24 “Wetin mek di Ɔlmayti nɔ de sɛt taym?
Wetin mek di wan dɛn we sabi am nɔ de si in de?*
2 Pipul dɛn de muv bekin dɛn;Dɛn de tif ship dɛn fɔ ad dɛn pan dɛn yon.
3 Dɛn de drɛb pikin dɛn we nɔ gɛt papa, dɛn dɔnki,Ɛn dɛn de siz uman dɛn we dɛn man dɛn dɔn day, dɛn kaw as garanti fɔ lon.
4 Dɛn de fos di wan dɛn we po fɔ kɔmɔt na rod;Di wan dɛn we nɔ gɛt pɔsin fɔ ɛp dɛn na di wɔl fɔ ayd pan dɛn.
5 Di po wan dɛn de luk fɔ tin fɔ it lɛk wayl dɔnki dɛn na di wildanɛs;*Dɛn de luk fɔ tin fɔ it fɔ dɛn pikin dɛn na di dɛzat.
6 Dɛn de avɛst na ɔda pɔsin in fam,Ɛn dɛn de gɛda wetin lɛf biɛn na wikɛd pipul dɛn vayn gadin.
7 Dɛn kin de ol nɛt nekɛd wan, dɛn nɔ gɛt klos;Dɛn nɔ gɛt natin fɔ kɔba dɛnsɛf fɔ di kol.
8 Di ren na di mawntin de sok dɛn;Dɛn de na di rɔk dɛn bikɔs dɛn nɔ gɛt say fɔ de.
9 Dɛn de tek pikin we nɔ gɛt papa kɔmɔt na in mama in bɔbi,Ɛn dɛn de tek di po wan in klos as garanti fɔ lon.
10 Dɛn de fos dɛn fɔ de nekɛd, dɛn nɔ gɛt klos fɔ wɛr,Ɛn dɛn angri, we dɛn de tot di tin dɛn we di wikɛd wan dɛn dɔn avɛst.
11 Dɛn de wok san santɛm na di il dɛn usay ston wɔl dɛn de;Dɛn de mas mas greps fɔ mek wayn, bɔt dɛn stil tɔsti.
12 Di wan dɛn we de day de kray na di siti;Di wan dɛn we wund bad bad wan de kray fɔ ɛp,Bɔt Gɔd nɔ de si am se na bad tin.*
13 Pipul dɛn de we et layt;Dɛn nɔ lɛk wetin i de du,Ɛn dɛn nɔ de go usay i de.
14 Pɔsin we de kil de grap ali mɔnin;I de kil di wan dɛn we nɔ gɛt pɔsin fɔ ɛp dɛn ɛn di po wan dɛn,Dɔn i de tif na nɛt.
15 Man we de ledɔm wit mareduman de wet fɔ ivintɛm,I de tɔk se, ‘Nɔbɔdi nɔ go si mi!’
Ɛn i de kɔba in fes.
16 We di ples dak, dɛn de brok go insay* pipul dɛn os;Santɛm, dɛn de lɔk dɛnsɛf insay.
Dɛn na strenja dɛn to layt.
17 Fɔ dɛn, mɔnin tan lɛk dip daknɛs;Dɛn yus to di tin dɛn we de mek pipul dɛn fred we di ples rili dak.
18 Bɔt wata go kɛr dɛn go kwik kwik wan.
Dɛn go swɛ dɛn land.
Dɛn nɔ go go bak na dɛn vayn gadin.
19 Jɔs lɛk aw sno de mɛlt insay dray sizin ɛn we di ples wam,Na so di Grev* de kɛr go di wan dɛn we dɔn sin!
20 Di wan dɛn we de sin, dɛn mama dɛn go fɔgɛt dɛn; tumbu dɛn go it dɛn.
Dɛn nɔ go mɛmba dɛn igen.
Dɛn go pul pɔsin we nɔ de du wetin rayt jɔs lɛk aw dɛn de brok tik.
21 Di wan dɛn we de sin de tek advantej pan uman we nɔ de bɔn,Ɛn dɛn nɔ de trit uman we in man dɔn day, fayn.
22 Gɔd go yuz in trɛnk fɔ dɔnawe wit di wan dɛn we gɛt pawa;Pan ɔl we dɛn go gɛt ay pozishɔn, dɛn nɔ shɔ if dɛn go liv ɔ dɛn nɔ go liv.
23 Gɔd alaw dɛn fɔ gɛt kɔnfidɛns ɛn fɔ fil sef,Bɔt in yay de pan ɔl wetin dɛn de du.
24 Dɛn de es dɛn ɔp fɔ sɔm tɛm, dɔn dɛn nɔ go de igen.
Dɛn de briŋ dɛn kam dɔŋ ɛn gɛda dɛn jɔs lɛk ɛni ɔda pɔsin;Dɛn de kɔt dɛn lɛk aw dɛn de avɛst tin fɔ it.
25 So udat go pruv se a de layƆ sho se di tin dɛn we a de tɔk nɔ kɔrɛkt?”
Futnot Dɛn
^ Dat na, in de we i de jɔj.
^ Rid Baybul Wɔd dɛn Minin.
^ Ɔ i kin bi, “Gɔd nɔ de se ɛnibɔdi du bad.”
^ Insay Ibru, “de dig go insay.”
^ Ɔ “Shiol.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
