Job 26:1-14
26 Na de Job tɔk se:
2 “Yu dɔn ɛp di wan we nɔ gɛt pawa!
Yu dɔn sev di wan we nɔ gɛt trɛnk!
3 Yu dɔn gi gud advays to di wan we nɔ gɛt sɛns!
Yu dɔn sho bɔku tɛm aw fɔ du tin wit sɛns!*
4 Na to udat yu de tray fɔ tɔk,Ɛn udat mek yu de tɔk dɛn kayn tin dɛn de?
5 Di wan dɛn we dɔn day de trimbul bifo Gɔd;Dɛn ivin de dɔŋ pas wata in lɛvul ɛn di tin dɛn we de insay de.
6 Di Grev* nekɛd bifo Gɔd,Ɛn i de si di ples usay di bɔdi de rɔtin.*
7 I strɛch di skay na di nɔt oba ɛmti spes,I nɔ ɛng di wɔl pan natin;
8 I rap di wata na di klawd,So dat di wet nɔ go bɔs di klawd;
9 I mek nɔbɔdi nɔ de si in tron,I prɛd di klawd oba am.
10 I mak di bawndri bitwin di skay ɛn di wata;I mek bawndri bitwin layt ɛn daknɛs.
11 Di pila dɛn na ɛvin shek;Dɛn trimbul we i ala.
12 I de yuz in pawa fɔ mek di si nɔ stɛdi,Ɛn i de yuz in sɛns fɔ dɔnawe wit di pawaful animal* na di si.
13 I de yuz briz fɔ mek di skay klia;I de yuz in an fɔ chuk snek we de muv fast.
14 Dis na jɔs smɔl pan di tin dɛn we i de du;Na smɔl tin nɔmɔ wi dɔn yɛri bɔt am!
So udat go ebul fɔ ɔndastand in pawaful tɛnda?”
Futnot Dɛn
^ Ɔ “wit kɔmɔn sɛns.”
^ Ɔ “Shiol.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Ɔ “Ɛn i de si Abadɔn we nɔ kɔba.”
^ Insay Ibru, “wit Reab.”
