Job 33:1-33
33 “Bɔt naw, duya Job, yɛri wetin a de tɔk;Lisin to ɔl wetin a de se.
2 Duya, a go opin mi mɔt;Mi mɔt go tɔk.
3 Mi wɔd dɛn de sho se a de du wetin rayt na mi at,Ɛn mi mɔt go tɔk ɔl wetin a no.
4 Na Gɔd in spirit mek mi,Ɛn na di Ɔlmayti in bloblo mek a gɛt layf.
5 Ansa mi if yu ebul;Rɛdi fɔ tɛl mi wetin yu tink.
6 Luk! A jɔs tan lɛk yu bifo di tru Gɔd;Mi bak na dɔti i tek mek mi.
7 So nɔ fred mi,Ɛn a nɔ go mɔna yu tumɔs.
8 Bɔt a yɛri wetin yu bin de se,Fɔ tru, a bin de yɛri dɛn wɔd dɛn ya,
9 ‘A piɔ, a nɔ de sin;A klin, a nɔ de mek mistek.
10 Bɔt Gɔd de fɛn rizin dɛn fɔ de agens mi;I de si mi as in ɛnimi.
11 I dɔn put mi fut dɛn na stɔk;*I de tek tɛm wach ɔl usay a de waka.’
12 Bɔt yu nɔ gɛt rayt fɔ tɔk dat, so a go ansa yu:
Gɔd pawaful pas mɔtalman fa fawe.
13 Wetin mek yu de tɔk agens Am?
Fɔ se na bikɔs i nɔ ansa yu?
14 Gɔd de tɔk wan tɛm dɔn i ripit am,Bɔt nɔbɔdi nɔ de pe atɛnshɔn;
15 I de du dis tru drim, insay vishɔn na nɛt,We mɔtalman de slip dip wanDi tɛm we dɛn de slip na dɛn bed,
16 Na da tɛm de, i de opin dɛn yesƐn tɛl dɛn wetin i want dɛn fɔ du,
17 Fɔ mek pɔsin avɔyd fɔ du badƐn fɔ protɛkt pɔsin fɔ mek i nɔ prawd.
18 Gɔd de mek in sol* nɔ go na di ol,*I go mek sɔd* nɔ kil am.
19 Pɔsin kin lan sɔntin we i ledɔm wit pen na in bedƐn we in bon dɛn de at am ɔltɛm,
20 So dat kin mek i* et bred,Ɛn i nɔ kin ivin want fɔ it gud it.
21 In bɔdi de dɔn bad bad wan,Ɛn pipul dɛn de si ɔl in bon dɛn.
22 In sol* de nia di ol;*In layf de nia di wan dɛn we de mek pɔsin day.
23 If mɛsenja de fɔ am,If pan wan tawzin pipul dɛn na wan pɔsin nɔmɔ de sɔpɔt am,Fɔ tɛl am wetin rayt,
24 Dɔn Gɔd sɔri fɔ am ɛn se,‘Nɔ mek i go dɔŋ na di ol!*
A dɔn fɛn prayz fɔ fri am!
25 Lɛ in flɛsh frɛsh pas aw i bin de we i bin yɔŋ;Lɛ i gɛt trɛnk bak lɛk aw i bin de di tɛm we i yɔŋ.’
26 Mɔtalman go beg Gɔd, ɛn i go gri fɔ am,I go si Gɔd in fes wit gladi-at,Ɛn Gɔd go si se mɔtalman dɔn bigin du wetin rayt bak.
27 Da pɔsin de go tɛl* pipul dɛn se,‘A dɔn sin ɛn a nɔ du wetin rayt,Bɔt a nɔ gɛt di pɔnishmɛnt we a fit fɔ gɛt.*
28 I dɔn sev mi sol* fɔ lɛ i nɔ go na di ol,*Ɛn mi layf go si layt.’
29 Fɔ tru, Gɔd dɔn du ɔl dɛn tin dɛn yaFɔ mɔtalman, tu tɛm, ɔ ivin tri tɛm,
30 So i sev am frɔm di grev,So dat i go ɛnjɔy layf.
31 Pe atɛnshɔn, Job! Lisin to mi!
Nɔ tɔk natin, ɛn a go kɔntinyu fɔ tɔk.
32 If yu gɛt sɔntin fɔ se, ansa mi.
Tɔk, bikɔs a want fɔ pruv se yu rayt.
33 If yu nɔ gɛt natin fɔ se, na fɔ lisin to mi;Nɔ tɔk natin, ɛn a go tich yu sɛns.”
Futnot Dɛn
^ Dat na, ɛvi bod dɛn we gɛt ol fɔ put fut. Rid Baybul Wɔd dɛn Minin.
^ Ɔ “layf.”
^ Ɔ “grev.”
^ Ɔ “wɛpɔn.”
^ Insay Ibru, “in layf.”
^ Ɔ “layf.”
^ Ɔ “grev.”
^ Ɔ “grev.”
^ Insay Ibru, “siŋ to.”
^ Ɔ i kin bi, “Ɛn a nɔ gɛt prɔfit.”
^ Ɔ “layf.”
^ Ɔ “grev.”
