Job 4:1-21
4 Na de Ɛlifaz di Timanayt ansa am se:
2 “If pɔsin tray fɔ tɔk to yu, yu nɔ go peshɛnt wit am?
Udat de we nɔ go want fɔ tɔk?
3 Na tru se yu dɔn kɔrɛkt bɔku pipul dɛn,Ɛn yu bin de ɛp di wan dɛn we wik.
4 Di tin dɛn we yu de tɔk de mek di wan dɛn we dɔn fɔdɔm ebul fɔ grap,Ɛn i de gi trɛnk to di wan dɛn we dɛn fut de trimbul.
5 Bɔt naw i dɔn apin to yu, ɛn yu dɔn rili taya;I dɔn mit yu ɛn yu at dɔn rili pwɛl.
6 Fɔ se di rɛspɛkt we yu gɛt fɔ Gɔd nɔ gi yu kɔnfidɛns?
Fɔ se di waka we yu de waka tret na Gɔd in yay nɔ gi yu op?
7 Duya, mɛmba dis: Us inosɛnt pɔsin dɔn ɛva day?
Ustɛm dɛn dɔn dɔnawe wit pɔsin we de du wetin rayt?
8 Wetin a dɔn si na dat di wan dɛn we de plan* wetin bad,Ɛn di wan dɛn we de plant trɔbul go avɛst trɔbul.
9 Di briz we Gɔd de blo de dɔnawe wit dɛn,Ɛn we i vɛks dɛn de day.
10 Di layɔn kin ala, ɛn yɔŋ layɔn kin mek sawnd,Bɔt ivin strɔng layɔn dɛn tit dɛn de brok.
11 Layɔn kin day bikɔs i nɔ gɛt tin fɔ it,Ɛn layɔn pikin dɛn kin skata.
12 Pɔsin kam sikrit wan ɛn tɔk to mi,Ɛn pɔsin tɔk saful wan na mi yes.
13 Na nɛt we pipul dɛn bin de pan dip dip slip,A si vishɔn dɛn we mek a wɔri,
14 A bin de fred bad bad wanƐn mi wan ol bɔdi bin de trimbul.
15 Wan spirit pas bifo mi;Di ia na mi bɔdi rayz.
16 Di spirit tinap,Bɔt a nɔ bin no wetin i bi.
Sɔntin bin de bifo mi;Di ples kwayɛt, dɔn a yɛri wan vɔys we se:
17 ‘Yu tink se mɔtalman go du wetin rayt pas Gɔd?
Yu tink se pɔsin go klin pas di Wan We Mek Am?’
18 Luk! I nɔ gɛt fet pan in savant dɛn,Ɛn i de fɛn fɔlt pan in enjɛl* dɛn.
19 Wetin wi go se bɔt di wan dɛn we de na os dɛn we dɛn mek wit dɔti,We dɛn fawndeshɔn de na di dɔst,We izi fɔ dɔnawe wit lɛk mɔt flay!*
20 Dɛn dɔnawe wit dɛn kpatakpata frɔm mɔnin te ivintɛm;Dɛn day sote go, ɛn nɔbɔdi nɔ notis.
21 Dɛn nɔ tan lɛk tɛnt we in rop dɔn lus?
Dɛn de day, dɛn nɔ gɛt sɛns.
