Jud 1:1-25
1 Mi, Jud, we na Jizɔs Krays in slev ɛn Jems in brɔda, de rayt to una, we Gɔd, we na di Papa, dɔn lɛk ɛn kɔl ɛn we i dɔn protɛkt fɔ Jizɔs Krays.
2 Lɛ Gɔd sɔri fɔ una mɔ ɛn mɔ, mek i gi una pis mɔ ɛn mɔ, ɛn lɛk una mɔ ɛn mɔ.
3 Di wan dɛn we a rili lɛk, pan ɔl we a bin de tray ɔlkayn we fɔ rayt to una bɔt di sev we wi de sev, a si am se a nid fɔ rayt una fɔ ɛnkɔrej una fɔ lɛ una tinap tranga wan fɔ di fet we dɛn bin dɔn gi di oli wan dɛn trade ɛn we go de sote go.
4 Di rizin we mek a de rayt to una na bikɔs sɔm pipul dɛn we di Skripchɔ dɛn bin dɔn kɔndɛm frɔm trade dɔn miks wit una saful wan. Dɛn pipul ya nɔ lɛk Gɔd, ɛn dɛn de yuz wi Gɔd in spɛshal gudnɛs* as ɛkskyuz fɔ du tin dɛn we de sho se dɛn nɔ gɛt wan shem ɛn rɛspɛkt* ɛn dɛn dɔn kɔmɔt biɛn di wangren pɔsin we gɛt wi, we na wi Masta, Jizɔs Krays.
5 Pan ɔl we una no ɔl dɛn tin ya gud gud wan, a want fɔ mɛmba una se ivin we Jiova* bin sev in pipul dɛn ɛn pul dɛn na Ijipt, leta i bin dɔnawe wit di wan dɛn we nɔ bin sho se dɛn gɛt fet.
6 Ɛn as fɔ di enjɛl dɛn we nɔ kɔntinyu fɔ de usay dɛn bin de, we lɛf di rayt say we dɛn fɔ de, Gɔd dɔn chen dɛn na daknɛs sote go fɔ di big de we i go jɔj dɛn.
7 Semweso, di pipul dɛn na Sɔdɔm ɛn Gomɔra ɛn di siti dɛn we bin de rawnd dɛn bin de du mami ɛn dadi biznɛs di we aw Gɔd nɔ want* pasmak wan, ɛn dɛn bin de rɔnata wetin dɛn bɔdi want di we aw Gɔd nɔ mek dɛn fɔ du am. Gɔd bin jɔj ɛn pɔnish dɛn bay we i yuz faya fɔ dɔnawe wit dɛn. Dis tin we apin to dɛn na wɔnin ɛn ɛgzampul fɔ wi.
8 Pan ɔl dis, dɛn pipul ya sɛf de imajin bad tin dɛn, dɛn de dɔti di bɔdi, dɛn nɔ gɛt wan rɛspɛkt fɔ di pipul dɛn we de oba dɛn, ɛn dɛn de tɔk bad bɔt di wan dɛn we gɛt glori.
9 Bɔt we Maykɛl, we na di enjɛl dɛn edman, bin de agyu wit di Dɛbul bɔt Mozis in bɔdi, i nɔ bin gɛt maynd fɔ jɔj di Dɛbul ɛn yuz bad wɔd pan am, bifo dat, i se: “Mek Jiova* jɔj yu.”
10 Bɔt dɛn pipul ya de tɔk bad bɔt ɔl di tin dɛn we dɛn nɔ rili ɔndastand. Ɛn we i kam pan ɔl wetin dɛn ɔndastand, dɛn ɔndastand am lɛk animal dɛn we nɔ de tink ɛn dɛn de kɔntinyu fɔ kɔrɔpt dɛnsɛf.
11 Bad tin go apin to dɛn, bikɔs dɛn dɔn falamakata Ken ɛn dɛn dɔn rɔsh fɔ mek di mistek we Belam bin mek fɔ gɛt prɔfit, ɛn dɛn dɔn day bikɔs dɛn de tɔk bad bɔt di wan dɛn we de oba dɛn, jɔs lɛk Kora!
12 Dɛn pipul ya tan lɛk rɔk dɛn we ayd ɔnda wata we dɛn kin de na di pati dɛn we una kin mek fɔ sho lɔv to una brɔda dɛn. Dɛn tan lɛk shɛpad dɛn we nɔ de fred fɔ fid dɛnsɛf, lɛk klawd dɛn we nɔ gɛt wata we briz de kɛr ɛnisay, ɛn lɛk tik dɛn we nɔ de bia frut di tɛm we dɛn fɔ bia, we dɔn day tu tɛm* ɛn we dɛn dɔn rut.
13 Dɛn tan lɛk dɛn big big swɛlin dɛn na di si we kin kam wit dɔti we fɔ mek dɛn shem, dɛn fiba sta dɛn we nɔ gɛt wan rayt say fɔ go, ɛn Gɔd dɔn put dɛn na daknɛs we pas ɔl, usay dɛn go de sote go.
14 Fɔ tru, Inɔk, we na di nɔmba sɛvin pɔsin frɔm Adam in jɛnɛreshɔn, bin tɔk wetin Gɔd tɛl am bɔt di pipul dɛn. I se: “Luk! Jiova* bin kam wit in bɔku bɔku* enjɛl dɛn we oli
15 fɔ kam jɔj ɔlman, ɛn fɔ kɔndɛm ɔl di wan dɛn we nɔ lɛk am bikɔs ɔf ɔl di bad bad tin dɛn we dɛn dɔn du, ɛn fɔ ɔl di bad bad tin dɛn we dɛn sina dɛn we nɔ lɛk am bin tɔk agens am.”
16 Dɛn pipul ya lɛk fɔ grɔmbul, dɛn lɛk fɔ kɔmplen bikɔs dɛn nɔ satisfay wit di tin dɛn we dɛn gɛt, dɛn lɛk fɔ du wetin dɛn want, dɛn lɛk fɔ bost, ɛn dɛn de prez ɔda pipul dɛn fɔ lɛ dɛn ed big so dat dɛn go bɛnifit.
17 Bɔt as fɔ una we a rili lɛk, una mɛmba wetin wi Masta Jizɔs Krays in apɔsul dɛn bin dɔn tɔk trade,*
18 we dɛn bin de tɛl una se: “Insay di las dez,* pipul dɛn go de we de provok, dɛn go de du wetin dɛn want we Gɔd nɔ lɛk.”
19 Na dɛn pipul ya de mek wanwɔd nɔ de, dɛn de biev lɛk animal, ɛn dɛn nɔ bisin bɔt Gɔd biznɛs.*
20 Bɔt una we a rili lɛk, una tray fɔ gɛt mɔ fet we oli, ɛn una mek lɛ di oli spirit ɛp una we una de pre,
21 so dat una go kɔntinyu fɔ du wetin go mek Gɔd lɛk una, as una de wet fɔ di tɛm we wi Masta Jizɔs Krays go sɔri fɔ una ɛn gi una layf we go de sote go.
22 Ɛn una kɔntinyu fɔ sho se una de sɔri fɔ di wan dɛn we gɛt dawt,
23 una sev dɛn bay we una de pul dɛn kɔmɔt insay di faya. Una kɔntinyu fɔ sɔri fɔ ɔda pipul dɛn, bɔt una fred we una de du am, ɛn una ivin et di klos we di bɔdi dɔn dɔti.
24 Gɔd ebul fɔ protɛkt una lɛ una nɔ fɔdɔm, ɛn i ebul fɔ mek una tinap klin wan wit gladi-at bifo in we na wi Gɔd we gɛt glori.
25 Mek di wangren Gɔd we dɔn sev wi tru Jizɔs Krays wi Masta gɛt di glori, di ɔnɔ, di pawa, ɛn bi wi rula frɔm trade trade, naw, ɛn sote go. Emɛn.
Futnot Dɛn
^ Rid Baybul Wɔd dɛn Minin.
^ Grik, asɛlgɛia. Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “day kpatakpata.”
^ Rid Baybul Wɔd dɛn Minin.
^ Ɔ “bɔku bɔku tawzin.”
^ Ɔ “bifo tɛm.”
^ Insay Grik, “tɛm.”
^ Insay Grik, “di spirit.”
