Lyuk 14:1-35
14 Wan ɔda tɛm, i go it na wan pan di Faresi dɛn lida in os di Sabat de, ɛn dɛn yay bin de pan am.
2 Wan man we gɛt wan sik we dɛn kɔl drɔpsi* bin de bifo am.
3 So Jizɔs aks di Faresi dɛn ɛn di wan dɛn we sabi di Lɔ gud gud wan se: “I rayt fɔ mɛn pɔsin di Sabat de ɔ i nɔ rayt?”
4 Bɔt dɛn nɔ tɔk natin. So Jizɔs ol di man, i mɛn am, ɛn tɛl am lɛ i go.
5 Dɔn i tɛl dɛn se: “Uswan pan una we in bɔypikin ɔ kaw fɔdɔm insay wɛl di Sabat de, we nɔ go pul am wantɛm wantɛm?”
6 Dɛn nɔ ebul fɔ ansa am.
7 Dɔn i gi wan ɛgzampul to di wan dɛn we dɛn invayt we i notis se dɛn bin de pik di bɛst ples fɔ dɛnsɛf. I tɛl dɛn se:
8 “We sɔmbɔdi invayt yu pan mared pati, nɔ go sidɔm na di bɛst ples. Sɔntɛm i go dɔn invayt pɔsin we impɔtant pas yu.
9 Di wan we invayt una tu go kam tɛl yu se, ‘Lɛ dis man tek yu ples.’ Dɔn yu go shem we yu de go sidɔm biɛn.
10 We pɔsin invayt yu, go sidɔm biɛn, so dat we di pɔsin we invayt yu kam, i go tɛl yu se, ‘Mi padi, go bifosay.’ Ɛn ɔl di ɔda pipul dɛn we i invayt go rɛspɛkt yu.
11 Ɛnibɔdi we es insɛf ɔp, Gɔd go put am dɔŋ, bɔt ɛnibɔdi we put insɛf dɔŋ, Gɔd go es am ɔp.”
12 Dɔn i tɛl di man we invayt am se: “We yu de invayt pipul dɛn fɔ kam it ivintɛm it, nɔ kɔl yu padi dɛn, yu brɔda dɛn, yu fambul dɛn, ɔ yu neba dɛn we jɛntri. Sɔntɛm dɛnsɛf go invayt yu, ɛn dat go bi yu pe.
13 Bɔt we yu de invayt pipul dɛn fɔ kam it, kɔl di wan dɛn we po, di wan dɛn we na kripul, di wan dɛn we nɔ ebul waka fayn, di wan dɛn we blayn;
14 ɛn yu go gladi, bikɔs dɛn nɔ gɛt natin fɔ pe yu bak. Yu go gɛt yu pe di tɛm we di wan dɛn we du wetin rayt de gɛt layf bak.”
15 We wan pan di pipul dɛn we dɛn invayt yɛri dis, i tɛl Jizɔs se: “Di wan we go it* na Gɔd in Kiŋdɔm go gladi.”
16 Jizɔs tɛl am se: “Wan man mek wan big ivintɛm it, ɛn invayt bɔku pipul dɛn.
17 We di tɛm rich fɔ it di ivintɛm it, i sɛn in slev to di wan dɛn we i invayt fɔ tɛl dɛn se, ‘Una kam, bikɔs ɔltin dɔn rɛdi.’
18 Bɔt dɛn ɔl bigin fɔ gi ɛkskyuz. Di fɔs wan tɛl am se, ‘A bay wan land, ɛn a nid fɔ go luk am. A rili sɔri, a nɔ go ebul fɔ kam.’
19 Wan ɔda wan tɔk se: ‘A bay tɛn kaw dɛn, ɛn a de go luk dɛn. A rili sɔri, a nɔ go ebul fɔ kam.’
20 Dɔn wan ɔda wan tɔk se, ‘A jɔs mared, so a nɔ go ebul fɔ kam.’
21 So di slev kam tɛl in masta wetin dɛn tɛl am. Dɔn di masta na di os vɛks ɛn tɛl in slev se, ‘Go kwik kwik wan na di men strit dɛn ɛn di smɔl smɔl rod dɛn na di siti, ɛn kam wit di wan dɛn we po, di wan dɛn we na kripul, di wan dɛn we blayn, ɛn di wan dɛn we nɔ ebul waka fayn.’
22 We di slev kam bak, i se, ‘Masta, a dɔn du wetin yu se, bɔt spes stil de.’
23 So di masta tɛl di slev se, ‘Go na di rod dɛn ɛn di len dɛn ɛn mek lɛ pipul dɛn kam, so dat mi os go ful-ɔp.
24 A de tɛl yu se ɔl di wan dɛn we a bin invayt nɔ go tes mi ivintɛm it.’”
25 Bɔku bɔku pipul dɛn bin de travul wit Jizɔs, ɛn i tɔn ɛn tɛl dɛn se:
26 “If ɛnibɔdi kam to mi ɛn i nɔ et* in papa, in mama, in wɛf, in pikin dɛn, in brɔda dɛn, in sista dɛn, ɛn ivin in yon layf, i nɔ go ebul bi mi disaypul.
27 Ɛnibɔdi we nɔ tot in tik we i go sɔfa pan* ɛn fala mi, nɔ go ebul bi mi disaypul.
28 Fɔ ɛgzampul, uswan pan una we want fɔ bil tawa nɔ go sidɔm fɔs ɛn chɛk ɔmɔs i gɛt fɔ spɛn ɛn si if i gɛt wetin i nid fɔ dɔn di tawa?
29 If i nɔ du dat, i go le di fawndeshɔn bɔt i nɔ go ebul fɔ dɔn am, ɛn ɔl di wan dɛn we de luk go bigin fɔ provok am
30 se: ‘Dis man bigin fɔ bil, bɔt i nɔ ebul fɔ dɔn am.’
31 Us kiŋ we gɛt 10,000 trup ɛn we want fɔ fɛt ɔda kiŋ we gɛt 20,000 trup nɔ go sidɔm fɔs ɛn lisin to advays fɔ si if i go ebul fɔ win di wɔ?
32 If i si se i nɔ go ebul fɔ win di wɔ, we di ɔda kiŋ de fa, i go sɛn mɛsenja dɛn fɔ go beg fɔ lɛ dɛn mek pis.
33 Semweso, wan tin we una fɔ no na dat, if ɛniwan pan una nɔ se baybay to* ɔl wetin i gɛt, i nɔ go ebul fɔ bi mi disaypul.
34 “Sɔl fayn. Bɔt if di sɔl nɔ gɛt tes igen, wetin dɛn go tek sizin am?
35 I nɔ go fayn fɔ put na grɔn ɔ fɔ yuz as manyɔ. Na trowe pipul dɛn kin trowe am. Lɛ di wan we gɛt yes fɔ lisin, lisin.”
Futnot Dɛn
^ Dat na, wan sik we de mek pɔsin in bɔdi swɛl.
^ Insay Grik, “it bred.”
^ Ɔ “lɛk mi pas.”
^ Rid Baybul Wɔd dɛn Minin.
^ Ɔ “lɛf.”
