Lyuk 18:1-43
18 Dɔn i gi dɛn wan ɛgzampul bɔt wetin mek dɛn fɔ de pre ɔltɛm ɛn nɔ giv-ɔp.
2 I tɛl dɛn se: “Wan jɔj we nɔ de fred Gɔd ɛn we nɔ rɛspɛkt mɔtalman bin de na wan siti.
3 Ɛn wan uman we in man dɔn day bin de na da sem siti de. Di uman bin de go to di jɔj ɛn tɛl am se, ‘Mek lɛ a gɛt di rayt we a fɔ gɛt pan di kes we mi ɛn sɔmbɔdi gɛt na kɔt.’
4 Fɔ sɔm tɛm, di jɔj nɔ bin want fɔ du am, bɔt leta i tɛl insɛf se, ‘Na tru se a nɔ de fred Gɔd ɔ rɛspɛkt mɔtalman,
5 bɔt bikɔs dis uman we in man dɔn day de mɔna mi, a go mek shɔ se i gɛt di rayt we i fɔ gɛt so dat i nɔ go kɔntinyu fɔ kam na ya ɛn mek a gens.’”*
6 Dɔn di Masta se: “Una yɛri wetin di jɔj tɔk, pan ɔl we in na pɔsin we nɔ de du wetin rayt!
7 So una nɔ tink se Gɔd go mek di wan dɛn we i dɔn pik we de kray to am de ɛn nɛt gɛt dɛn rayt, ɛn i go peshɛnt wit dɛn?
8 A de tɛl una se i go mek dɛn gɛt dɛn rayt kwik kwik wan. Bɔt we mɔtalman Pikin kam, una tink se i go si dis kayn fet na di wɔl?”
9 I gi wan ɔda ɛgzampul to sɔm pipul dɛn we de tink se na dɛn nɔmɔ de du wetin rayt ɛn ɔda pipul dɛn na natin. I se:
10 “Tu man dɛn go ɔp na di tɛmpul fɔ pre, di wan na Faresi ɛn di ɔda wan na pɔsin we de gɛda taks.
11 Di Faresi tinap ɛn bigin pre na in at se, ‘O Gɔd, a de tɛl yu tɛnki bikɔs a nɔ tan lɛk ɔlman. A nɔ miks pan kruk biznɛs, a nɔ tan lɛk pipul dɛn we nɔ de du wetin rayt, a nɔ de du mami ɛn dadi biznɛs wit pɔsin we a nɔ mared, ɛn a nɔ ivin tan lɛk dis man we de gɛda taks.
12 A de fast tu tɛm insay di wik; a kin sheb ɔl wetin a gɛt to tɛn pat ɛn gi wan pat.’
13 Bɔt di man we de gɛda taks bin tinap fa, ɛn i nɔ bin ivin want fɔ es in ed ɔp. I bin jɔs de nak in chɛst ɛn se, ‘E Gɔd, sɔri fɔ mi; mi na sina.’
14 Afta dat, dis man go dɔŋ na in os, ɛn na Gɔd in yay, i du wetin rayt pas da Faresi. Ɛnibɔdi we es insɛf ɔp, Gɔd go put am dɔŋ, bɔt ɛnibɔdi we put insɛf dɔŋ, Gɔd go es am ɔp.”
15 We di disaypul dɛn si pipul dɛn de briŋ dɛn smɔl pikin dɛn to Jizɔs fɔ lɛ i tɔch dɛn, dɛn bigin fɔ tɔk pan di pipul dɛn.
16 Bɔt Jizɔs se mek dɛn kam wit di smɔl pikin dɛn to am. I se: “Lɛ di smɔl pikin dɛn kam to mi. Una nɔ tray fɔ stɔp dɛn, bikɔs na pipul dɛn we tan lɛk dɛn pikin ya go gɛt Gɔd in Kiŋdɔm.
17 Fɔ tru, a de tɛl una se ɛnibɔdi we nɔ wɛlkɔm Gɔd in Kiŋdɔm lɛk smɔl pikin, nɔ go go insay de.”
18 Na de wan pan di rula dɛn aks am se: “Gud Ticha, wetin a fɔ du fɔ mek a gɛt layf we go de sote go?”
19 Jizɔs tɛl am se: “Wetin mek yu se a gud? Na Gɔd nɔmɔ gud.
20 Yu no di lɔ dɛn: ‘Yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin, yu nɔ fɔ kil pɔsin, yu nɔ fɔ tif, yu nɔ fɔ bi witnɛs we de lay, yu fɔ ɔnɔ yu mama ɛn papa.’”
21 Dɔn di man tɔk se: “A dɔn de obe ɔl dɛn lɔ ya frɔm we a smɔl.”
22 We Jizɔs yɛri dat, i tɛl am se, “Wan tin de we yu stil nid fɔ du: Sɛl ɔl di tin dɛn we yu gɛt ɛn gi di mɔni to di po wan dɛn, ɛn yu go gɛt jɛntri na ɛvin; dɔn kam fala mi.”
23 We i yɛri dis, in at pwɛl bad bad wan, bikɔs i bin jɛntri pasmak.
24 Jizɔs luk am ɛn tɔk se: “I go tranga fɔ mek di wan dɛn we gɛt mɔni go insay Gɔd in Kiŋdɔm!
25 Infakt, i izi fɔ mek kamɛl pas insay di ol we de pan nidul pas fɔ lɛ mɔniman go insay Gɔd in Kiŋdɔm.”
26 Di wan dɛn we yɛri wetin i tɔk aks se: “Udat rili go sev?”
27 Jizɔs tɔk se: “Di tin dɛn we nɔ pɔsibul fɔ mɔtalman, pɔsibul fɔ Gɔd.”
28 Bɔt Pita tɛl am se: “Wi dɔn lɛf di tin dɛn we wi gɛt ɛn fala yu.”
29 Jizɔs tɛl dɛn se: “Fɔ tru, a de tɛl una se ɛnibɔdi we dɔn lɛf os ɔ wɛf ɔ brɔda dɛn ɔ mama ɛn papa ɔ pikin dɛn fɔ Gɔd in Kiŋdɔm
30 go gɛt dɛn bɔku naw, ɛn i go gɛt layf we go de sote go tumara bambay.*”
31 Dɔn i kɛr di 12 apɔsul dɛn na kɔna ɛn tɛl dɛn se: “Wi de go ɔp na Jerusɛlɛm, ɛn ɔl di tin dɛn we di prɔfɛt dɛn dɔn rayt bɔt mɔtalman Pikin go apin.
32 Fɔ ɛgzampul, dɛn go an ova am to pipul dɛn we kɔmɔt na ɔda neshɔn dɛn. Dɛn go provok am, trit am bad, ɛn pit pan am.
33 Dɔn dɛn go bit* am ɛn kil am, bɔt i go gɛt layf bak di tɔd de.”
34 Bɔt dɛn nɔ bin no wetin i min, bikɔs Gɔd ayd di minin pan dɛn, so dɛn nɔ ɔndastand wetin i tɔk.
35 We Jizɔs de nia Jɛriko, wan blaynman bin sidɔm nia di rod de beg.
36 We i yɛri plɛnti pipul dɛn de pas, i bigin fɔ aks wetin de apin.
37 Dɛn tɛl am se: “Na Jizɔs di Nazarin de pas!”
38 Na de i ala se: “Jizɔs, Devid in Pikin, sɔri fɔ mi!”
39 Di wan dɛn we de bifo bigin fɔ tɔk pan am ɛn tɛl am fɔ sɛt in mɔt, bɔt na di mɔ i bin de ala se: “Devid in Pikin, sɔri fɔ mi!”
40 Na de Jizɔs tinap ɛn tɛl dɛn mek dɛn kam wit di man to am. We dɛn kam wit am, Jizɔs aks am se:
41 “Wetin yu want lɛ a du fɔ yu?” Di man tɛl am se: “Masta, mek lɛ a si bak.”
42 So Jizɔs tɛl am se: “Bigin si bak; yu fet dɔn mek yu wɛl.”
43 Ɛn wantɛm wantɛm i bigin fɔ si bak, ɛn i fala Jizɔs ɛn de prez Gɔd. We ɔl di pipul dɛn si dis, dɛnsɛf bigin fɔ prez Gɔd.
Futnot Dɛn
^ Ɔ “mɔna mi te a nɔ ebul fɔ bia igen.”
^ Ɔ “di tɛm we gɛt fɔ kam.” Rid Baybul Wɔd dɛn Minin.
^ Rid Baybul Wɔd dɛn Minin.
