Mak 6:1-56
6 I kɔmɔt de ɛn kam na di say we i gro ɔp, ɛn in disaypul dɛn fala am.
2 We di Sabat de rich, i bigin fɔ tich na di sinagɔg,* ɛn bɔku pipul dɛn we yɛri am bin wɔnda ɛn tɔk se: “Usay dis man lan ɔl dɛn tin ya? Wetin mek i gɛt dis kayn sɛns, ɛn wetin mek i ebul du pawaful tin dɛn?
3 Nɔto da kapɛnta dis? Nɔto in mama nem Meri ɛn in brɔda dɛn nem Jems, Josɛf, Judas, ɛn Saymɔn? Nɔto in sista dɛn de ya wit wi?” So dɛn nɔ biliv am.
4 Bɔt Jizɔs tɛl dɛn se: “Dɛn de ɔnɔ prɔfɛt ɔlsay, bɔt in fambul dɛn nɔ de ɔnɔ am, ɛn dɛn nɔ de ɔnɔ am na in yon os ɛn di say we i gro ɔp.”
5 So i nɔ du pawaful tin dɛn de. I jɔs le in an pan tu-tri pipul dɛn we sik ɛn mɛn dɛn.
6 I sɔprayz we i si se dɛn nɔ gɛt fet. Ɛn i go na di vilej dɛn we de nia de ɛn tich di pipul dɛn.
7 I kɔl in 12 apɔsul dɛn ɛn sɛn dɛn tu tu, ɛn i gi dɛn pawa fɔ kɔntrol di dimɔn dɛn.
8 Dɔn i tɛl dɛn mek dɛn nɔ kɛr natin we dɛn de travul pas dɛn wɔkinstik. Dɛn nɔ fɔ kɛr bred, bag fɔ put it, ɛn mɔni* nɔ fɔ de na dɛn bɛlt,
9 ɛn dɛn nɔ fɔ wɛr tu klos,* bɔt dɛn fɔ wɛr sandal.
10 Apat frɔm dat, i tɛl dɛn se: “We una go na ɛni os, una de de te una kɔmɔt na da ples de.
11 Bɔt ɛnisay we dɛn nɔ wɛlkɔm una ɔ lisin to una, we una de kɔmɔt de, una nak nak una fut fɔ pul di dɔti we de ɔnda de, fɔ sho se una dɔn wɔn dɛn.”
12 So dɛn go ɛn prich se pipul dɛn fɔ ripɛnt,
13 ɛn dɛn pul bɔku dimɔn dɛn pan pipul dɛn ɛn rɔb ɔyl pan bɔku sik pipul dɛn ɛn mɛn dɛn.
14 Kiŋ Ɛrɔd yɛri bɔt dis, bikɔs bɔku pipul dɛn bin de tɔk bɔt Jizɔs, ɛn dɛn bin de se: “Jɔn we bin de baptayz pipul dɛn dɔn gɛt layf bak, na dat mek i de du pawaful tin dɛn.”
15 Bɔt ɔda wan dɛn bin de se: “Na Ilayja.” Ɛn ɔda wan dɛn bak bin de se: “Na prɔfɛt jɔs lɛk wan pan dɛn prɔfɛt dɛn we bin de trade.”
16 Bɔt we Ɛrɔd yɛri bɔt dis, i se: “Na Jɔn we a kɔt in ed, na in dɔn gɛt layf bak.”
17 Ɛrɔd bin dɔn sɛn fɔ mek dɛn arɛst Jɔn ɛn chen am na prizin bikɔs ɔf Ɛrodias. Ɛrodias na bin Filip in wɛf we Ɛrɔd dɔn mared, ɛn Filip na Ɛrɔd in brɔda.
18 Jɔn bin dɔn de tɛl Ɛrɔd se: “Yu nɔ gɛt rayt fɔ tek yu brɔda in wɛf.”
19 So Ɛrodias bin de kip grɔj na in at fɔ Jɔn, ɛn i bin want fɔ kil am, bɔt i nɔ bin ebul.
20 Ɛrɔd bin de fred Jɔn, bikɔs i no se Jɔn na man we de du wetin rayt ɛn i oli, so i bin de protɛkt am. Ɛnitɛm we i lisin to am, i nɔ kin no wetin fɔ du, bɔt i bin stil lɛk fɔ lisin to am.
21 Bɔt wan fayn de bin kam we Ɛrɔd mek in batde pati fɔ di bigman dɛn na in gɔvmɛnt, di ami kɔmanda dɛn, ɛn fɔ di wan dɛn we rili impɔtant na Galili.
22 Ɛn Ɛrodias in galpikin kam dans, ɛn i mek Ɛrɔd ɛn di wan dɛn we de it* wit am gladi. So di kiŋ tɛl am se: “Aks mi fɔ ɛnitin we yu want, a go gi yu am.”
23 I ivin swɛ se: “A go gi yu ɛnitin we yu aks fɔ, ilɛksɛf na af pat na mi kiŋdɔm.”
24 So di gal go aks in mama se: “Wetin a fɔ aks fɔ?” In mama tɛl am se: “Aks fɔ Jɔn we bin de baptayz pipul dɛn in ed.”
25 I go to di kiŋ wantɛm wantɛm ɛn tɛl am se: “A want mek yu gi mi Jɔn we Bin De Baptayz Pipul Dɛn in ed na tre rayt naw.”
26 Pan ɔl we di kiŋ fil bad, i nɔ bin want fɔ tɛl di gal se i nɔ go gi am wetin i dɔn aks fɔ, bikɔs i dɔn swɛ ɛn bikɔs ɔf di wan dɛn we i invayt.*
27 So di kiŋ sɛn wan gaydman wantɛm wantɛm fɔ mek i go kam wit Jɔn in ed. So i go kɔt Jɔn in ed na prizin
28 ɛn kam wit am na tre. I gi di gal ɛn di gal gi in mama.
29 We Jɔn in disaypul dɛn yɛri dis, dɛn kam tek in bɔdi ɛn go bɛr am.
30 Di apɔsul dɛn kam gɛda rawnd Jizɔs ɛn tɛl am ɔl di tin dɛn we dɛn dɔn du ɛn tich.
31 Ɛn i tɛl dɛn se: “Una kam lɛ wi go na ples we pipul dɛn nɔ de so dat una go rɛst smɔl.” Dis na bikɔs bɔku pipul dɛn bin de kam ɛn go, ɛn dɛn nɔ bin gɛt tɛm fɔ dɛnsɛf, ivin fɔ it sɛf.
32 So dɛn go insay di bot fɔ go na wan ples usay na dɛn nɔmɔ go de de.
33 Bɔt pipul dɛn si we dɛn de go ɛn bɔku pipul dɛn kam no, ɛn pipul dɛn kɔmɔt na ɔl di siti dɛn ɛn rɔn go bifo dɛn.
34 We i kɔmɔt insay di bot, i si bɔku bɔku pipul dɛn ɛn i sɔri fɔ dɛn, bikɔs dɛn bin tan lɛk ship dɛn we nɔ gɛt shɛpad. So i bigin fɔ tich dɛn bɔku tin.
35 We tɛm dɔn go, in disaypul dɛn kam mit am ɛn tɛl am se: “Pipul dɛn nɔ de liv na dis ples ɛn tɛm dɔn go.
36 Mek lɛ dɛn go, so dat dɛn go go na di fam ɛn vilej dɛn we de nia ya ɛn bay it fɔ dɛnsɛf.”
37 I tɛl dɛn se: “Una gi dɛn sɔntin fɔ it.” Na de dɛn aks am se: “Yu want lɛ wi go bay 200 dinaray* bred ɛn gi di pipul dɛn fɔ it?”
38 I aks dɛn se: “Ɔmɔs bred una gɛt? Una go luk!” Dɛn go luk ɛn kam tɛl am se: “Wi gɛt fayv bred ɛn tu fish.”
39 Ɛn i tɛl ɔl di pipul dɛn fɔ sidɔm na di grin gras bay grup.
40 So dɛn ɔl sidɔm bay grup; sɔm 100, sɔm 50.
41 I tek di fayv bred ɛn tu fish, ɛn i luk ɔp ɛvin ɛn pre. Dɔn i brok brok di bred dɛn ɛn gi in disaypul dɛn fɔ mek dɛn gi di pipul dɛn, dɔn i sheb di tu fish fɔ ɔlman.
42 So dɛn ɔl it ɛn bɛlful,
43 ɛn we dɛn gɛda di balans we lɛf, i ful-ɔp 12 baskɛt, apat frɔm di fish.
44 Na 5,000 man dɛn it di bred.
45 Dɔn wantɛm wantɛm, i mek in disaypul dɛn go insay di bot ɛn go bifo na di ɔdasay na di si we de bay Bɛtseda. Dɔn i lɛf biɛn fɔ mek di pipul dɛn go.
46 We i dɔn tɛl di pipul dɛn baybay, i go na wan mawntin fɔ pre.
47 We ivintɛm kam, di bot bin de midul di si, bɔt na in wangren bin de na land.
48 So ali mɔnin* we i si se dɛn de stren fɔ padul di bot, bikɔs di briz bin de kɔmɔt usay dɛn de go, i waka pantap di wata fɔ kam mit dɛn, bɔt i tan lɛk se i de kam pas dɛn.
49 We dɛn si am de waka pantap di wata, dɛn tink se: “Na vishɔn!” Ɛn dɛn ala,
50 bikɔs dɛn ɔl si am ɛn dɛn fred. Bɔt wantɛm wantɛm, i tɛl dɛn se: “Una tek kɔrej! Na mi; una nɔ fred.”
51 Dɔn i go insay di bot ɛn di briz stɔp. Ɛn dɛn rili sɔprayz,
52 bikɔs dɛn nɔ lan lɛsin frɔm di mirekul we Jizɔs bin pafɔm wit di bred dɛn. Dɛn nɔ bin stil ɔndastand yet.
53 Dɛn krɔs kam na Gɛnɛsarɛt ɛn ankɔ di bot de.
54 Bɔt as dɛn kɔmɔt insay di bot so, pipul dɛn no se na in.
55 Dɛn rɔn go ɔlsay na da eria de ɛn bigin fɔ kam wit sikman dɛn na strɛcha* na di say we dɛn yɛri se i de.
56 Ɛn we i go na ɛni vilej ɔ siti ɔ di say dɛn we de nia di siti, pipul dɛn kin go put di sikman dɛn na di makit dɛn, ɛn dɛn kin beg am fɔ lɛ dɛn jɔs tɔch di ɛj pat pan in klos we i wɛr pantap. Ɛn ɔl di wan dɛn we tɔch am bin wɛl.
Futnot Dɛn
^ Rid Baybul Wɔd dɛn Minin.
^ Insay Grik, “kɔpa.”
^ Ɔ “ɔda klos.”
^ Ɔ “we ling nia di tebul.”
^ Ɔ “di wan dɛn we ling nia di tebul.”
^ Dis na wan Roman mɔni. Rid Baybul Wɔd dɛn Minin.
^ Dat na, bay dɛn tri oklɔk na mɔnin te dɛn siks oklɔk na mɔnin.
^ Wan smɔl bed we dɛn kin yuz fɔ kɛr sik pɔsin.
