Malakay 2:1-17
2 “E una dɛn prist dɛn, na dis kɔmand a de gi una.”
2 Jiova we gɛt bɔku bɔku sojaman dɛn tɔk se: “If una nɔ gri fɔ lisin ɛn mek-ɔp una maynd fɔ ɔnɔ mi nem, a go briŋ di swɛ pan una ɛn a go tɔn una blɛsin dɛn to swɛ dɛn. A dɔn tɔn di blɛsin dɛn to swɛ dɛn, bikɔs una nɔ mek-ɔp una maynd.”
3 “Bikɔs ɔf una, a go pwɛl di sid dɛn we una dɔn plant, ɛn a go skata tɔylɛt na una fes dɛn, di tɔylɛt dɛn frɔm di animal dɛn we una de sakrifays na una fɛstival dɛn; ɛn dɛn go kɛr una go de.*
4 Dɔn una go no se a dɔn gi una dis kɔmand so dat mi agrimɛnt wit Livay go kɔntinyu.” Na dis Jiova we gɛt bɔku bɔku sojaman dɛn se.
5 “Mi agrimɛnt we a mek wit am bin de gi am layf ɛn pis, a bin de gi am dɛn tin dɛn ya so dat i go fred* mi. I bin de fred mi, ɛn i bin de rɛspɛkt mi nem.
6 Na wetin tru na in i bin de tich, ɛn i nɔ bin de tɔk ɛnitin we nɔ rayt. I bin gɛt pis wit mi, i bin de du tin tret wan, ɛn i ɛp bɔku pipul dɛn fɔ stɔp fɔ du bad.
7 Prist fɔ mek pipul dɛn no Gɔd, ɛn pipul dɛn fɔ go to am fɔ lɛ i tich dɛn, bikɔs in na mɛsenja fɔ Jiova we gɛt bɔku bɔku sojaman dɛn.”
8 Jiova we gɛt bɔku bɔku sojaman dɛn se: “Unasɛf sɛf dɔn lɛf fɔ waka na di rayt we. Una dɔn mek bɔku pipul dɛn nɔ de fala di lɔ. Una dɔn pwɛl di agrimɛnt we a mek wit Livay.
9 So a go mek di pipul dɛn nɔ tek una mek natin ɛn una nɔ go gɛt wan valyu na dɛn yay, bikɔs una nɔ bin du wetin a want ɛn una nɔ bin de du tin fia wan we i kam to di lɔ.”
10 “Nɔto wan papa wi ɔl gɛt? Nɔto wan Gɔd mek wi? So wetin mek wi de ful wi kɔmpin dɛn, ɛn nɔ sho rɛspɛkt fɔ di agrimɛnt we Gɔd mek wit wi gret gret granpa dɛn?
11 Di pipul dɛn na Juda dɔn ful dɛn kɔmpin dɛn, dɛn dɔn du bad tin na Izrɛl ɛn Jerusɛlɛm; di pipul dɛn na Juda nɔ de ɔnɔ Jiova we lɛk wetin oli,* ɛn di man dɛn dɔn mared uman dɛn we de sav ɔda gɔd.
12 Jiova go kil ɛnibɔdi we kɔmɔt frɔm Jekɔp we de du dis, ilɛk udat i bi,* pan ɔl we i de gi gift ɔfrin to Jiova we gɛt bɔku bɔku sojaman dɛn.”
13 “Ɔda* tin de bak we una de du we dɔn mek kray wata kɔba Jiova in ɔlta, ɛn i de yɛri we dɛn de kray ɛn pini de, we dɔn mek i nɔ de pe atɛnshɔn igen to una gift ɔfrin ɔ tek ɛnitin na una an.
14 Ɛn una se: ‘Wetin mek?’ Na bikɔs Jiova na bin witnɛs bitwin yu ɛn yu wɛf we yu bin mared we yu yɔŋ, we yu nɔ fetful to igen, pan ɔl we na yu patna ɛn na yu wɛf we yu mek agrimɛnt wit.*
15 Bɔt pɔsin de we nɔ du am bikɔs i gɛt sɔm pan Gɔd in spirit. Wetin da pɔsin de bin de tink? I bin de tink bɔt Gɔd in pikin. So una tek tɛm wit wetin una de tink ɛn una fetful to di uman we una mared we una yɔŋ.”
16 Jiova we na di Gɔd na Izrɛl, Jiova we gɛt bɔku bɔku sojaman dɛn tɔk se: “A et* dayvɔs, ɛn a et di wan dɛn we de du wikɛd* tin dɛn. Una tek tɛm wit wetin una de tink, ɛn una fɔ fetful.”
17 “Una dɔn mek Jiova taya wit una.* Bɔt una de se: ‘Aw wi dɔn mek i taya?’ Una du dat bay we una de se: ‘Ɛnibɔdi we du bad de du gud na Jiova in yay, ɛn i de gladi fɔ am,’ ɔ bay we una de se: ‘We di Gɔd we de du tin tret wan?’”
Futnot Dɛn
^ Dat na, di ples usay dɛn de trowe di animal dɛn we dɛn de sakrifays, dɛn tɔylɛt.
^ Ɔ “rɛspɛkt.”
^ Ɔ i kin bi, “we lɛk di ples we oli.”
^ Insay Ibru, “di wan we nɔ de slip ɛn di wan we de ansa.”
^ Insay Ibru, “Sɛkɔn.”
^ Ɔ “yu wɛf we yu mared ligal wan.”
^ Insay Ibru, “I et.”
^ Insay Ibru, “we de kɔba dɛn klos wit wikɛd.”
^ Insay Ibru, “taya wit una wɔd dɛn.”
