Matyu 11:1-30
11 We Jizɔs dɔn fɔ tɛl in 12 disaypul dɛn wetin dɛn fɔ du, i kɔmɔt de fɔ go tich ɛn prich na ɔda siti dɛn.
2 Bɔt we Jɔn bin de na jel ɛn yɛri bɔt di tin dɛn we di Krays de du, i sɛn in disaypul dɛn
3 fɔ aks am se: “Na yu na di Wan We Fɔ Kam, ɔ wi fɔ luk fɔ ɔda wan?”
4 Jizɔs ansa dɛn se: “Una go tɛl Jɔn wetin una de yɛri ɛn si:
5 Di wan dɛn we blayn de si naw, di wan dɛn we nɔ de waka fayn de waka fayn, di wan dɛn we gɛt lɛprɔsi de wɛl, di wan dɛn we dɛf de yɛri, di wan dɛn we dɔn day de gɛt layf bak, ɛn di po wan dɛn de yɛri di gud nyuz.
6 Di pɔsin we nɔ gɛt ɛni rizin fɔ dawt mi gɛt gladi-at.”
7 We dɛn bin de go, Jizɔs bigin fɔ tɔk to di krawd bɔt Jɔn. I aks dɛn se: “We una bin go na di wildanɛs,* wetin una bin go de fɔ si? Na gras* we briz kin blo?
8 So, wetin una bin go de fɔ si? Na man we wɛr klos we sɔft?* Nɔ, di wan dɛn we de wɛr klos we sɔft de na kiŋ dɛn os.
9 So, wetin rili mek una go de? Fɔ si prɔfɛt? Fɔ tru, a de tɛl una se i pas prɔfɛt fa fawe.
10 Na in dɛn bin rayt bɔt se: ‘A de sɛn mi mɛsenja bifo yu,* we go rɛdi di rod bifo yu!’
11 Fɔ tru, a de tɛl una se pan ɔl di wan dɛn we dɛn dɔn bɔn, no wan nɔ de we pas Jɔn we De Baptayz Pipul Dɛn, bɔt pɔsin we gɛt lo pozishɔn na di Kiŋdɔm na ɛvin pas am.
12 Frɔm Jɔn we De Baptayz Pipul Dɛn in tɛm te naw, pipul dɛn de tray tranga wan fɔ go insay di Kiŋdɔm we de na ɛvin, ɛn di wan dɛn we de rili tray tranga wan de go de.
13 Te Jɔn in tɛm, ɔl di Prɔfɛt dɛn ɛn di Lɔ tɔk bɔt wetin go apin.
14 Ɛn if una want fɔ biliv ɔ una nɔ want fɔ biliv, na in na ‘Ilayja we fɔ kam.’
15 Lɛ di wan we gɛt yes lisin.
16 “Wit udat a go kɔmpia dis jɛnɛreshɔn? Dɛn tan lɛk smɔl pikin dɛn we sidɔm na makit de kɔl dɛn kɔmpin dɛn we dɛn ɔl kin ple,
17 ɛn se: ‘Wi ple flut fɔ una, bɔt una nɔ dans; wi siŋ bɛrin siŋ fɔ una, bɔt una nɔ sho se una fil am.’*
18 Semweso, we Jɔn kam, i nɔ bin de it ɔ drink, bɔt pipul dɛn se, ‘I gɛt dimɔn.’
19 Mɔtalman Pikin in kam de it ɛn drink, bɔt pipul dɛn se, ‘Na man we bigyay, i de drink wayn pasmak, ɛn in padi dɛn na sina dɛn ɛn pipul dɛn we de gɛda taks.’ Bɔt di tin dɛn we pɔsin de du di rayt we na in de sho se i gɛt sɛns.”
20 Dɔn i bigin fɔ tɔk pan di pipul dɛn we de na di siti dɛn usay i du bɔku pawaful tin dɛn, bikɔs dɛn nɔ ripɛnt.
21 I se: “Bad tin go apin to una we de na Kɔrezin! Bad tin go apin to una we de na Bɛtseda! bikɔs if di pawaful tin dɛn we apin na una siti dɛn bin apin na Taya ɛn Saydɔn, di pipul dɛn we de de bin fɔ dɔn ripɛnt lɔn lɔn tɛm; dɛn fɔ dɔn wɛr di klos we pipul dɛn kin wɛr we dɛn at pwɛl ɛn sidɔm pan ashis.
22 A de tɛl una se, we Jɔjmɛnt De kam, i go bɛtɛ fɔ Taya ɛn Saydɔn pas fɔ una.
23 Ɛn una we de na Kepanyɔm, una fil se una go go na ɛvin? Na di Grev* una go go, bikɔs if di pawaful tin dɛn we apin na una siti bin apin na Sɔdɔm, i fɔ dɔn de te tide.
24 A de tɛl una se we Jɔjmɛnt De kam, i go bɛtɛ fɔ di pipul dɛn na Sɔdɔm pas fɔ una.”
25 Na de Jizɔs se: “Papa, di Masta fɔ ɛvin ɛn dis wɔl, a de prez yu bifo ɔlman, bikɔs yu dɔn ayd dɛn tin ya frɔm di wan dɛn we gɛt sɛns ɛn di wan dɛn we lan buk ɛn yu dɔn sho dɛn to smɔl pikin dɛn.
26 Fɔ tru, Papa, bikɔs na dis yu bin want.
27 Mi Papa dɔn gi mi ɔltin, ɛn nɔbɔdi nɔ rili no di Pikin pas di Papa, ɛn nɔbɔdi nɔ rili no di Papa pas di Pikin ɛn nɔbɔdi nɔ go ebul fɔ no di Papa pas di Pikin rɛdi fɔ tich am bɔt di Papa.
28 Una kam to mi, una ɔl we dɔn taya ɛn we gɛt ebi lod, ɛn a go mek una blo.
29 Una bi mi disaypul* ɛn lan frɔm mi, bikɔs a de tek tɛm du tin ɛn a ɔmbul ɛn una* go fil fayn.
30 I nɔ at fɔ bi mi disaypul ɛn mi lod layt.”
Futnot Dɛn
^ Rid Baybul Wɔd dɛn Minin.
^ Ɔ “rid.” Dis na plant we tɔl ɛn dray ɛn we izi fɔ lɛ briz blo.
^ Ɔ “fayn klos?”
^ Insay Grik, “bifo yu fes.”
^ Ɔ “nɔ nak una chɛst fɔ sho se una fil am.”
^ Ɔ “Ediz.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Insay Grik, “tek mi tik.” Di wɔd “tik” na ya min di tik ɔ ayɛn we pɔsin kin put na in sholda ɔ pan animal fɔ kɛr lod go.
^ Ɔ “una sol.”
