Matyu 18:1-35
18 Dɔn di disaypul dɛn kam nia Jizɔs ɛn aks am se: “Udat rili impɔtant pas ɔlman na di Kiŋdɔm we de na ɛvin?”
2 So i kɔl wan smɔl pikin ɛn mek i tinap bifo dɛn
3 ɛn i tɛl dɛn se: “Fɔ tru, a de tɛl una se if una nɔ chenj* ɛn tan lɛk smɔl pikin dɛn, una nɔ go ɛva go insay di Kiŋdɔm we de na ɛvin.
4 So ɛnibɔdi we put insɛf dɔŋ lɛk dis smɔl pikin na in impɔtant pas ɔlman na di Kiŋdɔm we de na ɛvin,
5 ɛn ɛnibɔdi we wɛlkɔm smɔl pikin lɛk dis bikɔs ɔf mi nem, dɔn wɛlkɔm mi.
6 Bifo ɛnibɔdi mek wan pan dɛn smɔl wan ya we gɛt fet pan mi, sin, i go bɛtɛ lɛ dɛn ɛng grenin ston* na in nɛk ɛn ib am na di si.
7 “Bad tin go apin to di pipul dɛn na di wɔl we de mek ɔda pipul dɛn sin! Na tru se pipul dɛn go de we go mek ɔda pipul dɛn sin, bɔt bad tin go apin to dɛn pipul dɛn de!
8 So, if yu an ɔ fut de mek yu sin, kɔt am kɔmɔt ɛn trowe am. I bɛtɛ lɛ yu sev pan ɔl we pat pan yu bɔdi damej ɔ yu nɔ ebul fɔ waka fayn pas fɔ lɛ dɛn trowe yu wit tu an ɔ tu fut insay faya we go de sote go.
9 Ɛn if yu yay de mek yu sin, pul am ɛn trowe am. I bɛtɛ lɛ yu sev wit wan yay pas fɔ mek dɛn trowe yu na Gɛɛna* wit tu yay.
10 Una tek tɛm lɛ una nɔ tek wan pan dɛn smɔl wan ya mek natin, bikɔs a de tɛl una se dɛn smɔl wan ya dɛn enjɛl dɛn na ɛvin de si mi Papa we de na ɛvin in fes ɔltɛm.
11 *——
12 “Wetin una tink? If wan man gɛt 100 ship ɛn wan pan dɛn lɔs, una nɔ tink se i go lɛf di 99 na di mawntin ɛn go fɛn di wan we dɔn lɔs?
13 Ɛn we i fɛn am, a de tɛl una se i go gladi fɔ am pas di 99 we nɔ lɔs.
14 Semweso, mi* Papa we de na ɛvin nɔ ivin want lɛ wan pan dɛn smɔl wan ya day.
15 “Pantap dat, if yu brɔda sin, go to am ɛn tɛl am in fɔlt;* lɛ i bi bitwin una tu nɔmɔ. If i lisin to yu, yu dɔn gɛt yu brɔda bak.
16 Bɔt if i nɔ lisin, kɛr wan ɔ tu pipul dɛn, so dat usay tu ɔ tri witnɛs dɛn tɔk,* ɔltin go klia.
17 If i nɔ lisin to dɛn, tɔk to di kɔngrigeshɔn. If i nɔ ivin lisin to di kɔngrigeshɔn, tek am lɛk pɔsin na ɔda neshɔn ɛn lɛk pɔsin we de gɛda taks.
18 “Fɔ tru, a de tɛl una se ɛnitin we una tay na dis wɔl, Gɔd dɔn ɔlrɛdi tay am na ɛvin ɛn ɛnitin we una lus na dis wɔl, Gɔd dɔn ɔlrɛdi lus am na ɛvin.
19 Dɔn, a de tɛl una fɔ tru se if tu pan una na di wɔl gri fɔ aks mi Papa na ɛvin bɔt ɛnitin we impɔtant, i go du am fɔ una.
20 Dis na bikɔs ɛnisay we tu ɔ tri pipul dɛn gɛda bikɔs ɔf mi nem, a de wit dɛn.”
21 Dɔn Pita kam aks am se: “Masta, ɔmɔs tɛm a fɔ fɔgiv mi brɔda if i sin agens mi? Sɛvin tɛm?”
22 Jizɔs tɛl am se: “Nɔ, nɔto sɛvin tɛm, bɔt 77 tɛm.
23 “Na dat mek di Kiŋdɔm we de na ɛvin tan lɛk kiŋ we bin want fɔ kɔl-dɛt in slev dɛn.
24 We i bigin fɔ kɔl-dɛt dɛn, dɛn briŋ wan man we fɔ pe am 10,000 talɛnt.*
25 Bɔt bikɔs di man nɔ bin ebul fɔ pe bak, in masta se mek dɛn sɛl di man, in wɛf, in pikin dɛn, ɛn ɔl di tin dɛn we i gɛt fɔ pe di dɛt.
26 So di slev sho am rɛspɛkt* ɛn tɔk se, ‘Peshɛnt wit mi, a go pe yu ɔltin bak.’
27 Di slev in masta sɔri fɔ am, i lɛf am ɛn tɛl am lɛ i nɔ pe igen.
28 Bɔt da slev de go fɛn wan in kɔmpin slev we gɛt fɔ pe am 100 dinaray.* We i si am, i ol am ɛn bigin kwis in trot ɛn tɛl am se, ‘Gi mi ɔl wetin yu fɔ pe mi.’
29 So in kɔmpin slev nil dɔŋ ɛn bigin fɔ beg am se, ‘Peshɛnt wit mi, a go pe yu bak.’
30 Bɔt i nɔ gri, bifo dat, i go mek dɛn put in kɔmpin na prizin te i ebul pe am bak wetin i fɔ pe am.
31 We in kɔmpin slev dɛn si wetin apin, dɛn at pwɛl bad bad wan ɛn dɛn go tɛl dɛn masta ɔl wetin dɔn apin.
32 Dɔn in masta kɔl am ɛn tɛl am se: ‘Yu na wikɛd slev, we yu beg mi, a mek yu nɔ pe natin igen.
33 Yusɛf nɔ fɔ dɔn sɔri fɔ yu kɔmpin slev lɛk aw a sɔri fɔ yu?’
34 So in masta vɛks bad bad wan ɛn put am na prizin* te i pe ɔl in dɛt.
35 Mi Papa we de na ɛvin go trit una di sem we if una nɔ fɔgiv una brɔda wit ɔl una at.”
Futnot Dɛn
^ Insay Grik, “tɔn rawnd.”
^ Ɔ “big ston we dɔnki kin tɔn.” Dɛn de yuz dis kayn ston fɔ gren wan it we dɛn de kɔl wit.
^ Rid Baybul Wɔd dɛn Minin.
^ Dis vas nɔ de insay sɔm fɔs fɔstɛm pepa dɛn we dɛn rayt di Baybul pan, so i nɔ de pan di Skripchɔ dɛn we Gɔd yuz pipul dɛn fɔ rayt.
^ Ɔ i kin bi “una.”
^ Insay Grik, “ɛn kɔrɛkt am.”
^ Insay Grik, “mɔt.”
^ 10,000 silva talɛnt bin ikwal to 60,000,000 dinaray.
^ Ɔ “butu bifo am.”
^ Dis na wan Roman mɔni. Rid Baybul Wɔd dɛn Minin.
^ Insay Grik, “gi am to di wan dɛn we de gayd di jelman dɛn.”
