Matyu 19:1-30
19 We Jizɔs dɔn fɔ tɔk dɛn wɔd ya, i kɔmɔt na Galili ɛn kam na di bɔda dɛn na Judia we de na di ɔdasay na di Jɔdan.
2 Bɔku bɔku pipul dɛn fala am, ɛn i mɛn dɛn de.
3 Dɔn sɔm Faresi dɛn kam fɔ tɛst am. Dɛn aks am se: “Man gɛt rayt fɔ dayvɔs in wɛf fɔ ɛnikayn tin?”
4 I ansa dɛn se: “Una nɔ bin dɔn rid se frɔm di biginin na tu kayn pipul dɛn Gɔd mek, man ɛn uman
5 ɛn se: ‘Na dis mek man go lɛf in mama ɛn papa ɛn de* wit in wɛf ɛn dɛn tu go bi wan bɔdi’?
6 Dɛn nɔto tu igen, bɔt wan bɔdi. So, lɛ nɔbɔdi nɔ skata wetin Gɔd dɔn jɔyn togɛda.”
7 Dɛn tɛl am se: “Wetin mek, naw, Mozis se man kin gi dayvɔs satifiket to in wɛf fɔ dayvɔs am?”
8 Jizɔs tɛl dɛn se: “Na bikɔs ɔf una strɔngat mek Mozis alaw una fɔ dayvɔs una wɛf dɛn, bɔt nɔto so tin bin de frɔm di biginin.
9 A de tɛl una se ɛnibɔdi we dayvɔs in wɛf, we i bi se in wɛf nɔ du mami ɛn dadi biznɛs di we aw Gɔd nɔ want, ɛn i mared ɔda uman, i dɔn du mami ɛn dadi biznɛs di we aw Gɔd nɔ want.”*
10 Di disaypul dɛn tɛl am se: “If na so mared tan,* i bɛtɛ lɛ pɔsin nɔ mared.”
11 I tɛl dɛn se: “Nɔto ɔlman ebul du wetin a de tɔk, na di wan dɛn nɔmɔ we gɛt di gift de du am.
12 Sɔm pipul dɛn de we nɔ mared bikɔs dɛn bɔn dɛn da we de,* ɔda wan dɛn de we na mɔtalman kastret dɛn, ɛn pipul dɛn de we nɔ mared* bikɔs ɔf di Kiŋdɔm we de na ɛvin. Lɛ di pɔsin we ebul fɔ du dis, du am.”
13 Dɔn dɛn briŋ smɔl pikin dɛn to am fɔ lɛ i le in an pan dɛn ɛn pre fɔ dɛn, bɔt di disaypul dɛn tɔk pan dɛn.
14 Bɔt Jizɔs tɛl dɛn se: “Una lɛf di pikin dɛn; una nɔ tray fɔ stɔp dɛn fɔ kam to mi, bikɔs na pipul dɛn we tan lɛk dɛn pikin ya go gɛt di Kiŋdɔm we de na ɛvin.”
15 Ɛn i le in an pan dɛn ɛn kɔmɔt de.
16 Na de sɔmbɔdi kam mit am ɛn aks am se: “Ticha, us gud tin a fɔ du fɔ gɛt layf we go de sote go?”
17 I tɛl am se: “Wetin mek yu de aks mi bɔt wetin gud? Na wangren Pɔsin gud. Bɔt if yu want fɔ gɛt layf, go de du wetin di lɔ dɛn se ɔltɛm.”
18 I aks am se: “Uswan dɛn?” Jizɔs tɛl am se: “Yu nɔ fɔ kil pɔsin, yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin, yu nɔ fɔ tif, yu nɔ fɔ bi witnɛs we de lay,
19 ɔnɔ yu mama ɛn papa, ɛn yu fɔ lɛk yu neba lɛk aw yu lɛk yusɛf.”
20 Di yɔŋman tɛl am se: “A dɔn de obe ɔl dɛn lɔ ya; wetin igen a fɔ du?”
21 Jizɔs tɛl am se: “If yu want fɔ pafɛkt,* go sɛl wetin yu gɛt ɛn gi di po wan dɛn, ɛn yu go gɛt jɛntri na ɛvin; dɔn kam fala mi.”
22 We di yɔŋman yɛri dis, i go wit pwɛlat, bikɔs i bin gɛt bɔku prɔpati dɛn.
23 Dɔn Jizɔs tɛl in disaypul dɛn se: “Fɔ tru, a de tɛl una se i go tranga fɔ lɛ mɔniman go insay di Kiŋdɔm we de na ɛvin.
24 A de tɛl una bak se i izi fɔ mek kamɛl pas insay di ol we de pan nidul pas fɔ lɛ mɔniman go insay Gɔd in Kiŋdɔm.”
25 We di disaypul dɛn yɛri dat, dɛn rili sɔprayz ɛn aks se: “Udat rili go sev?”
26 Jizɔs luk dɛn piŋ ɛn tɛl dɛn se: “To mɔtalman dis nɔ pɔsibul, bɔt to Gɔd ɔltin pɔsibul.”
27 Dɔn Pita aks am se: “Wi dɔn lɛf ɔltin ɛn fala yu; so, wetin wi go gɛt?”
28 Jizɔs tɛl dɛn se: “Fɔ tru, a de tɛl una se we Gɔd mek ɔltin nyu, ɛn we mɔtalman Pikin sidɔm na in wɔndaful tron, una we dɔn fala mi go sidɔm pan 12 tron dɛn ɛn jɔj di 12 trayb dɛn na Izrɛl.
29 Ɛn ɛnibɔdi we dɔn lɛf os dɛn ɔ brɔda dɛn ɔ sista dɛn ɔ mama ɔ papa ɔ pikin dɛn ɔ fam dɛn fɔ mi nem go gɛt dɛn tin ya pas ɔndrɛd tɛm, ɛn i go gɛt layf we go de sote go.
30 “Bɔt bɔku pipul dɛn we de fɔs naw go de las, ɛn di wan dɛn we de las go de fɔs.
Futnot Dɛn
^ Di Grik wɔd min fɔ fasin tayt tayt wan, lɛk se na wit glu.
^ Di Grik wɔd we dɛn yuz na ya de tɔk bɔt di sin we pɔsin we mared de sin we i ledɔm wit ɔda pɔsin we nɔto in man ɔ wɛf.
^ Insay Grik, “tin tan bitwin man ɛn in wɛf.”
^ Dɛn bɔn dɛn as okobo.
^ Insay Grik, “di wan dɛn we mek dɛnsɛf okobo.”
^ Ɔ “kɔmplit.”
