Matyu 22:1-46
22 Jizɔs yuz ɛgzampul dɛn bak fɔ tɔk to dɛn. I tɛl dɛn se:
2 “Di Kiŋdɔm we de na ɛvin tan lɛk wan kiŋ we mek mared pati fɔ in bɔypikin.
3 Ɛn i sɛn in slev dɛn fɔ kɔl di wan dɛn we i invayt fɔ kam di mared pati, bɔt dɛn nɔ gri fɔ kam.
4 I sɛn ɔda slev dɛn bak, ɛn tɛl dɛn se: ‘Una tɛl di wan dɛn we a invayt se: “A dɔn rɛdi mi it, a dɔn kil mi kaw dɛn ɛn mi fat fat animal dɛn, ɛn ɔltin dɔn rɛdi. Una kam na di mared pati.”’
5 Bɔt dɛn nɔ bisin sɛf, dɛn go du ɔda tin dɛn, sɔm go na dɛn fam, sɔm go du dɛn biznɛs;
6 bɔt di ɔda wan dɛn, ol in slev dɛn, trit dɛn bad ɛn kil dɛn.
7 “Di kiŋ vɛks bad bad wan, ɛn i sɛn in sojaman dɛn fɔ go kil di wan dɛn we kil in slev dɛn ɛn bɔn dɛn siti.
8 Dɔn i tɛl in slev dɛn se, ‘Wi dɔn rɛdi ɔltin fɔ di mared pati, bɔt di wan dɛn we a invayt nɔ fit fɔ kam.
9 So una go na di men rod dɛn, ɛn invayt ɛnibɔdi we una si fɔ kam di mared pati.’
10 So di slev dɛn go na di rod dɛn ɛn invayt ɔl di wan dɛn we dɛn si, di wikɛd wan dɛn ɛn di gud wan dɛn; ɛn di ples we dɛn mek di mared pati ful-ɔp wit di pipul dɛn we dɛn invayt.*
11 “We di kiŋ kam insay fɔ si di wan dɛn we kam di pati, i si wan man we nɔ wɛr mared klos.
12 So i aks am se, ‘Padi, aw yu kam insay we yu nɔ wɛr mared klos?’ Di man nɔ ebul tɔk.
13 Dɔn di kiŋ tɛl in savant dɛn se, ‘Una tay in an ɛn fut ɛn trowe am na do usay dak. Na de i go de kray ɛn gren in tit.’
14 “Dɛn invayt bɔku pipul dɛn, bɔt na wanwan pipul dɛn, dɛn pik.”
15 Dɔn di Faresi dɛn go plan togɛda so dat dɛn go kech am pan wetin i de tɔk.
16 So dɛn sɛn dɛn disaypul dɛn to am wit Ɛrɔd in pati pipul dɛn, ɛn dɛn tɛl am se: “Ticha, wi no se yu na pɔsin we de tɔk tru ɛn yu de tich di tru tin bɔt Gɔd, ɛn yu nɔ de du tin fɔ lɛ pɔsin lɛk yu, bikɔs yu nɔ de tek pɔsin bay aw i luk.
17 So, tɛl wi, wetin yu tink? I rayt fɔ pe taks* to Siza ɔ i nɔ rayt?”
18 Bɔt bikɔs Jizɔs no se dɛn wikɛd, i tɛl dɛn se: “Ipokrit dɛn, wetin mek una de tɛst mi?
19 Una sho mi di taks kɔyn.” Dɛn kam wit wan dinariɔs.*
20 I aks dɛn se: “Udat in fes ɛn taytul dis?”
21 Dɛn tɛl am se: “Na Siza.” Dɔn i tɛl dɛn se: “So, una gi Siza wetin na Siza in yon, ɛn una gi Gɔd wetin na Gɔd in yon.”
22 We dɛn yɛri dat, dɛn wɔnda ɛn dɛn lɛf am ɛn go.
23 Da de de di Sadyusi dɛn, we nɔ biliv se we pɔsin day i go gɛt layf bak, kam aks am se:
24 “Ticha, Mozis bin se: ‘If ɛni man day we i nɔ bɔn pikin dɛn, in brɔda fɔ mared di uman ɛn bɔn pikin fɔ in brɔda.’
25 Sɛvin brɔda dɛn bin de wit wi. Di fɔs wan mared ɛn day, bɔt i nɔ bɔn pikin; i lɛf in wɛf fɔ in brɔda.
26 Di sem tin apin wit di sɛkɔn wan, di tɔd wan, ɛn dɛn ɔl sɛvin.
27 Na di uman las day.
28 So di tɛm we di wan dɛn we dɔn day go gɛt layf bak, uswan pan di sɛvin brɔda dɛn go gɛt am as wɛf? Bikɔs dɛn ɔl bin mared am.”
29 Jizɔs tɛl dɛn se: “Una dɔn mistek, bikɔs una nɔ no di Skripchɔ dɛn ɔ di pawa we Gɔd gɛt;
30 bikɔs di tɛm we pipul dɛn go gɛt layf bak, man dɛn nɔ go de mared ɛn dɛn nɔ go de gi uman dɛn to man dɛn fɔ mared; dɛn go tan lɛk enjɛl dɛn na ɛvin.
31 As fɔ di layf we pipul dɛn go gɛt bak, una nɔ bin dɔn rid wetin Gɔd tɛl una, we i se:
32 ‘Mi na Ebraam in Gɔd, Ayzak in Gɔd, ɛn Jekɔp in Gɔd’? In nɔto Gɔd fɔ dayman dɛn, bɔt in na Gɔd fɔ di wan dɛn we gɛt layf.”
33 We di krawd yɛri dis, dɛn kɔle di we aw i de tich.
34 We di Faresi dɛn yɛri se i dɔn mek di Sadyusi dɛn nɔ ebul fɔ tɔk, dɛn kam togɛda as wan.
35 Wan pan dɛn, we sabi di Lɔ gud gud wan, aks am kwɛstyɔn fɔ tɛst am. I se:
36 “Ticha, us lɔ pas ɔl di Lɔ dɛn?”
37 I tɛl am se: “‘Yu fɔ lɛk Jiova* we na yu Gɔd wit ɔl yu at, wit ɔl yu layf,* ɛn wit ɔl yu maynd.’
38 Dis na di lɔ we pas ɔl ɛn na in na di fɔs wan.
39 Di sɛkɔn wan, we tan lɛk am, na in dis: ‘Yu fɔ lɛk yu neba lɛk aw yu lɛk yusɛf.’
40 Ɔl di Lɔ dɛn ɛn ɔl wetin di Prɔfɛt dɛn tich de insay dɛn tu lɔ ya.”
41 We di Faresi dɛn bin gɛda, Jizɔs aks dɛn se:
42 “Wetin una tink bɔt di Krays? Na udat in pikin?” Dɛn tɛl am se: “Na Devid.”
43 I aks dɛn se: “So, wetin mek naw di oli spirit mek Devid kɔl am Masta, we i se,
44 ‘Jiova* tɛl mi Masta se: “Sidɔm na mi raytan te a put yu ɛnimi dɛn ɔnda yu fut”’?
45 So, if, Devid kɔl am Masta, aw i kam bi Devid in pikin?”
46 Nɔbɔdi nɔ bin ebul fɔ tɔk wan wɔd fɔ ansa am, ɛn frɔm da de de, nɔbɔdi nɔ bin gɛt maynd fɔ aks am ɛni ɔda kwɛstyɔn.
Futnot Dɛn
^ Ɔ “we ling nia di tebul.”
^ Dis na bin taks we ɔlman fɔ pe.
^ Dis na wan Roman mɔni. Rid Baybul Wɔd dɛn Minin.
^ Rid Baybul Wɔd dɛn Minin.
^ Insay Grik, “sol.” Rid Baybul Wɔd dɛn Minin.
^ Rid Baybul Wɔd dɛn Minin.
