Matyu 25:1-46
25 “Di Kiŋdɔm we de na ɛvin tan lɛk tɛn vajin dɛn we tek dɛn lamp dɛn ɛn go fɔ go mit di ɔkɔ.
2 Fayv pan dɛn bin ful ɛn fayv bin gɛt sɛns.
3 Di wan dɛn we ful tek dɛn lamp bɔt dɛn nɔ go wit ɔyl,*
4 bɔt di wan dɛn we gɛt sɛns kɛr dɛn lamp dɛn ɛn go wit ɛkstra ɔyl.
5 We di ɔkɔ bin de dile, dɛn ɔl fil fɔ slip so dɛn slip.
6 Midul midul nɛt, sɔm pipul dɛn ala se: ‘Luk di ɔkɔ! Una go mit am.’
7 Dɔn ɔl di vajin dɛn grap ɛn rɛdi dɛn lamp.
8 Di vajin dɛn we ful tɛl di wan dɛn we gɛt sɛns se, ‘Una gi wi sɔm pan una ɔyl bikɔs wi lamp dɛn want fɔ ɔt.’
9 Di wan dɛn we gɛt sɛns tɛl dɛn se: ‘Sɔntɛm i nɔ go du fɔ wi ɛn una. So una go to di wan dɛn we de sɛl am ɛn bay sɔm fɔ unasɛf.’
10 As dɛn de go fɔ bay di ɔyl, di ɔkɔ kam. I go na di mared pati wit di vajin dɛn we rɛdi. Afta dat, dɛn lɔk di domɔt.
11 Leta, di ɔda vajin dɛn kam ɛn tɔk se, ‘Masta, Masta, opin fɔ wi!’
12 I tɛl dɛn se, ‘Fɔ tru, a nɔ no una.’
13 “So una go de wach, bikɔs una nɔ no di de ɔ di awa.
14 “Di Kiŋdɔm we de na ɛvin jɔs tan lɛk wan man we want fɔ travul go ɔda kɔntri. I kɔl in slev dɛn ɛn lɛf wetin i gɛt na dɛn an, fɔ lɛ dɛn tek kia ɔf am.
15 I gi fayv talɛnt* to wan, i gi tu talɛnt to ɔda wan, ɛn i gi wan talɛnt to ɔda wan bak. I gi ɔlman wetin dɛn go ebul kia fɔ, ɛn i travul.
16 Di wan we i gi di fayv talɛnt go du biznɛs wit am wantɛm wantɛm, ɛn i gɛt fayv ɔda talɛnt as prɔfit.
17 Semweso, di wan we i gi tu talɛnt gɛt tu ɔda talɛnt as prɔfit.
18 Bɔt di slev we i gi jɔs wan talɛnt go dig di grɔn ɛn ayd in masta in mɔni.
19 “Afta lɔng tɛm, di slev dɛn masta kam, ɛn i bin want fɔ no wetin dɛn dɔn du wit in mɔni.
20 So di wan we i bin gi fayv talɛnt kam bifo ɛn briŋ fayv mɔ talɛnt, ɛn se, ‘Masta, yu bin lɛf fayv talɛnt na mi an, naw, a dɔn gɛt fayv ɔda talɛnt as prɔfit.’
21 In masta tɛl am se: ‘Yu dɔn du wɛl, yu na slev we gud ɛn fetful! Yu bin fetful pan smɔl tin. A go put yu oba bɔku tin. Jɔyn yu masta fɔ gladi.’
22 Dɔn di wan we i bin gi tu talɛnt kam bifo ɛn se, ‘Masta, yu bin lɛf tu talɛnt na mi an, naw, a dɔn gɛt tu ɔda talɛnt as prɔfit.’
23 In masta tɛl am se: ‘Yu dɔn du wɛl, yu na slev we gud ɛn fetful! Yu bin fetful pan smɔl tin. A go put yu oba bɔku tin. Jɔyn yu masta fɔ gladi.’
24 “Leta, di slev we i bin gi wan talɛnt kam bifo ɛn se: ‘Masta, a no se yu biznɛs tranga, yu de avɛst usay yu nɔ plant, ɛn yu de gɛda usay yu nɔ fana.
25 So a fred ɛn go dig di grɔn ɛn kip yu talɛnt de. Luk wetin na yu yon.’
26 Na de in masta tɛl am se: ‘Yu na slev we wikɛd ɛn lezi, yu bin no se a de avɛst usay a nɔ plant ɛn gɛda usay a nɔ fana, nɔto so?
27 Wɛl, yu fɔ dɔn put mi mɔni* na bank, ɛn we a kam bak a fɔ dɔn gɛt sɔntin pantap.
28 “‘So una pul di talɛnt na in an ɛn gi am to di wan we gɛt di tɛn talɛnt.
29 Ɛnibɔdi we gɛt, go gɛt mɔ, ɛn i go gɛt plɛnti. Bɔt di wan we nɔ gɛt, ivin wetin i gɛt nɔ go lɛf na in an.
30 Una trowe di slev we nɔ bɛtɛ na do usay dak. Na de i go de kray ɛn gren in tit.’
31 “We mɔtalman Pikin go kam wit in glori ɛn ɔl di enjɛl dɛn, i go sidɔm pan in wɔndaful tron.
32 Ɔl di neshɔn dɛn go gɛda bifo am, ɛn i go sheb pipul dɛn, jɔs lɛk aw shɛpad kin put ship dɛn wansay ɛn put got dɛn ɔdasay.
33 Ɛn i go put di ship dɛn na in raytan, ɛn put di got dɛn na in lɛftan.
34 “Dɔn di Kiŋ go tɛl di wan dɛn we de na in raytan se: ‘Una we mi Papa dɔn blɛs, una kam tek di Kiŋdɔm we i dɔn pripia fɔ una frɔm we di wɔl bigin.
35 We a bin angri, una gi mi sɔntin fɔ it; we a bin tɔsti, una gi mi sɔntin fɔ drink. We mi na bin strenja, una ol mi fayn;
36 we a bin nekɛd,* una gi mi klos. We a bin sik, una kia fɔ mi. We a bin de na prizin, una go fɛn mi.’
37 Dɔn di wan dɛn we de du wetin rayt go aks am se: ‘Masta, ustɛm wi bin si se yu angri ɛn gi yu sɔntin fɔ it, ɔ ustɛm wi bin si se yu tɔsti ɛn gi yu sɔntin fɔ drink?
38 Ustɛm wi bin si se yu na strenja ɛn ol yu fayn, ɔ ustɛm wi bin si se yu nekɛd ɛn gi yu klos?
39 Ustɛm wi bin si se yu sik ɔ de na prizin ɛn wi go fɛn yu?’
40 Di Kiŋ go tɛl dɛn se, ‘Fɔ tru, a de tɛl una se bikɔs una du am to wan pan dɛn mi brɔda ya we nɔ impɔtant, na mi una du am to.’
41 “Dɔn i go tɛl di wan dɛn we de na in lɛftan se: ‘Una kɔmɔt nia mi, una we Gɔd dɔn kɔndɛm ɛn we de go insay di faya we nɔ de ɔt we i dɔn rɛdi fɔ di Dɛbul ɛn in enjɛl dɛn.
42 We a bin angri, una nɔ gi mi ɛnitin fɔ it; ɛn we a bin tɔsti, una nɔ gi mi ɛnitin fɔ drink.
43 We mi na bin strenja, una nɔ ol mi fayn; we a bin nekɛd, una nɔ gi mi klos; we a bin sik ɛn we a bin de na prizin, una nɔ tek kia ɔf mi.’
44 Dɔn dɛnsɛf go tɔk se: ‘Masta, ustɛm wi si se yu angri ɔ tɔsti ɔ yu na strenja ɔ yu nekɛd ɔ sik ɔ de na prizin ɛn wi nɔ ɛp yu?’
45 Dɔn i go tɛl dɛn se: ‘Fɔ tru, a de tɛl una se bikɔs una nɔ du am to wan pan dɛn wan ya we nɔ impɔtant, una nɔ du am to mi.’
46 Dɛn wan ya go day ɛn dɛn nɔ go ɛva gɛt layf igen, bɔt di wan dɛn we de du wetin rayt go gɛt layf we go de sote go.”
Futnot Dɛn
^ Dis na ɔyl we dɛn bin de put na lamp dɛn trade trade. Na pan ɔliv dɛn bin de pul am.
^ Wan Grik talɛnt ikwal to 20.4 kilogram.
^ Insay Grik, “silva.”
^ Ɔ “nɔ bin wɛr bɛtɛ klos.”
