Matyu 6:1-34
6 “Una tek tɛm mek una nɔ du wetin rayt bifo pipul dɛn fɔ lɛ dɛn si una, bikɔs una Papa we de na ɛvin nɔ go blɛs una.
2 So we yu de gi gift dɛn to po pipul dɛn, yu nɔ fɔ blo trɔmpɛt* bifo yu lɛk aw dɛn ipokrit pipul dɛn kin du na di sinagɔg* dɛn ɛn na di strit dɛn, so dat mɔtalman go prez dɛn. Fɔ tru, a de tɛl una se dɛn dɔn ɔlrɛdi gɛt dɛn pe.
3 Bɔt we yu de gi gift dɛn to po pipul dɛn, nɔ mek yu lɛftan no wetin yu raytan de du,
4 so dat di gift dɛn we yu de gi to po pipul dɛn go bi sɔntin we na sikrit. Dɔn yu Papa we de si yu pan ɔl we ɔda pipul dɛn nɔ de si yu go blɛs yu.
5 “Ɛn we una de pre, una nɔ mek lɛk dɛn ipokrit pipul dɛn, bikɔs dɛn lɛk fɔ tinap na dɛn sinagɔg* ɛn kɔna dɛn na di men strit dɛn fɔ pre so dat mɔtalman go si dɛn. Fɔ tru, a de tɛl una se dɛn dɔn ɔlrɛdi gɛt dɛn pe.
6 Bɔt we yu want fɔ pre, go insay yu rum ɛn lɔk di domɔt, dɔn pre to yu Papa we pɔsin nɔ de si. Ɛn yu Papa we de si yu pan ɔl we ɔda pipul dɛn nɔ de si yu go blɛs yu.
7 We yu de pre, nɔ se di sem tin igen ɛn igen lɛk aw di pipul dɛn na ɔda neshɔn dɛn de du, bikɔs dɛn tink se Gɔd go yɛri dɛn we dɛn yuz bɔku wɔd dɛn.
8 So una nɔ tan lɛk dɛn, bikɔs una Papa no wetin una nid ivin bifo una aks am.
9 “Na so una fɔ pre:
“‘Wi Papa we de na ɛvin, lɛ ɔlman tek yu nem as sɔntin we oli.*
10 Lɛ yu Kiŋdɔm kam. Lɛ wetin yu want, bi na dis wɔl lɛk aw i de bi na ɛvin.
11 Gi wi di it* we wi nid fɔ dis de,
12 ɛn fɔgiv wi fɔ wi sin* dɛn jɔs lɛk aw wi dɔn fɔgiv di wan dɛn we sin agens wi.
13 Nɔ alaw tɛmteshɔn fɔ ebul wi, bɔt sev wi frɔm di wikɛd wan.’
14 “If una fɔgiv pipul dɛn fɔ di bad tin dɛn we dɛn du, una Papa we de na ɛvin insɛf go fɔgiv una;
15 bɔt if una nɔ fɔgiv pipul dɛn fɔ di bad tin dɛn we dɛn du, una Papa nɔ go fɔgiv una.
16 “We una de fast, una nɔ mek una fes da sɔri we lɛk dɛn ipokrit dɛn; dɛn nɔ kin tek kia ɔf dɛn fes fɔ lɛ pipul dɛn no se dɛn de fast. Fɔ tru, a de tɛl una se, dɛn dɔn ɔlrɛdi gɛt dɛn pe.
17 Bɔt we yu de fast, rɔb ɔyl na yu ed ɛn was yu fes,
18 so dat mɔtalman nɔ go no se yu de fast bɔt na yu Papa nɔmɔ we pɔsin nɔ de si go no. Dɔn yu Papa we de si yu pan ɔl we ɔda pipul dɛn nɔ de si yu go blɛs yu.
19 “Una lɛf fɔ kip jɛntri fɔ unasɛf na di wɔl, usay bɔgbɔg* ɛn rɔsti kin pwɛl am ɛn usay tifman dɛn kin brok go insay ɛn tif.
20 Bifo dat, una kip una jɛntri na ɛvin usay bɔgbɔg ɔ rɔsti nɔ go pwɛl am ɛn usay tifman dɛn nɔ go brok go insay ɛn tif am,
21 bikɔs usay una jɛntri de, na de bak una at go de.
22 “Di bɔdi in lamp na di yay. So if yu yay de pan wan tin,* yu wan ol bɔdi go brayt.*
23 Bɔt if yu yay milɛ,* yu wan ol bɔdi go dak. If di layt we de insay yu na daknɛs, mɔs no aw yu bɔdi dak!
24 “Nɔbɔdi nɔ go bi slev to tu masta, bikɔs i go et di wan ɛn lɛk di ɔda wan, ɔ i go de biɛn di wan ɛn nɔ rɛspɛkt di ɔda wan. Una nɔ go ebul bi slev fɔ Gɔd ɛn fɔ Jɛntri.
25 “Na dis mek a de tɛl una se: Una lɛf fɔ wɔri bɔt una layf* we i kam pan wetin una go it ɔ wetin una go drink, ɔ bɔt una bɔdi we i kam pan wetin una go wɛr. Layf* impɔtant pas it, ɛn di bɔdi impɔtant pas klos, nɔto so?
26 Una tek tɛm wach di bɔd dɛn we de flay na di skay, dɛn nɔ de plant sid ɔ avɛst ɔ kip na stɔ, bɔt stil una Papa we de na ɛvin de fid dɛn. Una nɔ tink se una bɛtɛ pas bɔd dɛn?
27 Uswan pan una we de wɔri go ebul fɔ ad ivin shɔt tɛm* pan in layf?
28 Ɛn wetin mek una de wɔri bɔt klos? Una lan frɔm di we aw di flawa* dɛn de gro; dɛn nɔ de wok ɔ so klos;
29 bɔt a de tɛl una se pan ɔl we Sɔlɔmɔn bin gɛt bɔku fayn fayn tin dɛn, i nɔ bin de drɛs fayn lɛk wan pan dɛn flawa ya.
30 If na so Gɔd de drɛs dɛn flawa ya we de ya tide ɛn tumara dɛn put dɛn na ovin, una nɔ tink se i go gi una klos, una we gɛt smɔl fet?
31 So una nɔ ɛva wɔri ɛn aks se, ‘Wetin wi go it?’ ɔ, ‘Wetin wi go drink?’ ɔ, ‘Wetin wi go wɛr?’
32 Na ɔl dɛn tin ya di pipul dɛn na di ɔda neshɔn dɛn de rɔnata. Una Papa we de na ɛvin no se una nid ɔl dɛn tin ya.
33 “Una kɔntinyu fɔ put di Kiŋdɔm ɛn wetin rayt na Gɔd in yay fɔs na una layf ɛn Gɔd go gi una ɔl dɛn ɔda tin ya.
34 So una nɔ ɛva wɔri bɔt tumara, bikɔs ɔda tin dɛn go de fɔ wɔri bɔt tumara. Ɛnide gɛt in yon prɔblɛm.
Futnot Dɛn
^ Ɔ “nɔ anawns am.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Ɔ “rɛspɛkt yu nem; ɔnɔ yu nem.”
^ Insay Grik, “bred.”
^ Insay Grik “dɛt.”
^ Di Grik wɔd min wan kayn bɔgbɔg we de it klos.
^ Ɔ “klia.” Insay Grik, “simpul.”
^ Ɔ “gɛt layt ɔlsay.”
^ Insay Grik, “bad; wikɛd.”
^ Ɔ “sol.”
^ Ɔ “Di sol.”
^ Insay Grik, “wan kyubit,” we na lɛk 17.5 inch.
^ Ɔ “lili.”
