Osia 1:1-11
1 Di mɛsej we Jiova gi to Osia* we na Biiray in bɔypikin di tɛm we Uzaya, Jotam, Eaz, ɛn Ɛzikaya na bin kiŋ dɛn na Juda, ɛn di tɛm we Jɛroboam, we na Joash in bɔypikin na bin kiŋ na Izrɛl.
2 We Jiova bigin fɔ gi in mɛsej to Osia, Jiova tɛl Osia se: “Go, mared uman we de pan rare layf* ɛn bɔn pikin dɛn pan rare layf,* bikɔs na rare layf* dɔn mek di pipul dɛn na di land dɔn lɛf fɔ fala mi, Jiova.”
3 So i go mared Goma we na Dibleim in galpikin. Goma gɛt bɛlɛ ɛn bɔn bɔypikin fɔ am.
4 Dɔn Jiova tɛl am se: “Kɔl am Jɛzriɛl* bikɔs i nɔ go te igen a go pɔnish Jiu in famili fɔ Jɛzriɛl in bɔku kil kil, ɛn a go dɔnawe wit di kiŋdɔm na Izrɛl.
5 Da de de, a go brok Izrɛl in bo na Jɛzriɛl in Vali.”*
6 Goma gɛt bɛlɛ bak ɛn bɔn galpikin. Dɔn Gɔd tɛl Osia se: “Kɔl am Lo-ruema,* bikɔs a nɔ go sɔri fɔ di pipul dɛn na Izrɛl igen, ɛn a go mɔs drɛb dɛn.
7 Bɔt a go sɔri fɔ Juda in famili, ɛn na mi, Jiova dɛn Gɔd, go sev dɛn; a nɔ go sev dɛn wit bo ɔ sɔd ɔ wɔ ɔ ɔs dɛn ɔ wit man dɛn we de rayd ɔs.”
8 Afta Goma pul Lo-ruema pan bɔbi, i gɛt bɛlɛ bak ɛn bɔn bɔypikin.
9 Dɔn Gɔd se: “Kɔl am Lo-amay,* bikɔs una nɔto mi pipul dɛn, ɛn a nɔ go bi una Gɔd.
10 “Di pipul dɛn na Izrɛl* go bɔku lɛk di sansan na di si, we dɛn nɔ go ebul fɔ mɛzhɔ ɔ kɔnt. Dɔn di ples usay dɛn bin de tɛl dɛn se, ‘Una nɔto mi pipul dɛn,’ dɛn go tɛl dɛn naw se, ‘Una na di Gɔd we de alayv in bɔypikin dɛn.’
11 Di pipul dɛn na Juda ɛn Izrɛl go kam togɛda as wan, ɛn dɛn go pik wan lida fɔ dɛnsɛf ɛn kɔmɔt na di land, bikɔs dat go bi wɔndaful tɛm fɔ Jɛzriɛl.”
Futnot Dɛn
^ Di shɔt we fɔ kɔl Oshaya, we min “Na Ja Sev; Ja Dɔn Sev.”
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ I min “Gɔd Go Plant Sid.”
^ Ɔ “Flat Land.”
^ I min “Dɛn Nɔ Sɔri fɔ Am.”
^ I min “Nɔto Mi Pipul Dɛn.”
^ Insay Ibru, “Izrɛl in pikin dɛn.”
