Osia 7:1-16
7 “Da tɛm de we a go mɛn Izrɛl,Ɔlman go no bɔt Ifrem in sinƐn Sameria in wikɛdnɛs.
Dɛn de du bad bad tin dɛn;Tifman dɛn de brok go insay ɛn gɛng we de red, de red na do.
2 Bɔt dɛn nɔ tɔk na dɛn at se a go mɛmba ɔl dɛn wikɛdnɛs.
Di tin dɛn we dɛn de du de arawnd dɛn;Dɛn de rayt bifo mi fes.
3 Dɛn wikɛdnɛs de mek di kiŋ gladi,Ɛn di prins dɛn de gladi bikɔs ɔf dɛn lay lay we dɛn.
4 Dɛn ɔl nɔ fetful to dɛn man ɔ dɛn wɛf dɛn,Jɔs lɛk ovin we bekaman sɛt,Bɔt i stɔp fɔ mek di faya kech sote i nid di do ɛn wet fɔ lɛ i rayz.
5 Di de we di kiŋ gɛt gladi gladi, di prins dɛn sik;Dɛn vɛks bikɔs ɔf wayn.
I dɔn mek padi wit di wan dɛn we lɛk fɔ provok.
6 Dɛn mek dɛn at de bɔn lɛk se dɛn briŋ am kam nia ovin.*
Ol nɛt di bekaman de slip;Na mɔnin di ovin de blez lɛk big big faya.
7 Dɛn ɔl wam lɛk ovin,Ɛn dɛn de dɔnawe wit dɛn rula dɛn.*
Ɔl dɛn kiŋ dɛn dɔn fɔdɔm,No wan pan dɛn nɔ de kɔl mi fɔ ɛp dɛn.
8 Di pipul dɛn na Ifrem de miks wit di neshɔn dɛn.
Dɛn tan lɛk rawnd kek we dɛn nɔ tɔn.
9 Strenja dɛn dɔn pul dɛn trɛnk na dɛn an, bɔt dɛn nɔ no.
Dɛn ia ɔl dɔn wayt, bɔt dɛn nɔ notis.
10 Di prawd we di pipul dɛn na Izrɛl prawd dɔn gi witnɛs agens dɛn,Bɔt dɛn nɔ tɔn bak to Jiova dɛn Gɔd,Ɛn pan ɔl dat, dɛn nɔ luk fɔ am.
11 Di pipul dɛn na Ifrem tan lɛk fulish dɔv, dɛn nɔ gɛt sɛns.*
Dɛn kɔl Ijipt fɔ ɛp dɛn, dɛn dɔn go na Asiria.
12 Ɛnisay dɛn go, a go prɛd mi nɛt oba dɛn.
A go briŋ dɛn dɔŋ lɛk di bɔd dɛn we de flay na di skay.
A go pɔnish dɛn akɔdin to di wɔnin we a bin dɔn gi dɛn.
13 Bad tin go apin to dɛn, bikɔs dɛn rɔnawe pan mi!
Dɛn go dɔnawe wit dɛn, bikɔs dɛn dɔn sin agens mi!
A bin rɛdi fɔ fri dɛn, bɔt dɛn dɔn tɔk lay lay tin dɛn bɔt mi.
14 Dɛn nɔ bin de kɔl mi fɔ ɛp dɛn wit ɔl dɛn at,Pan ɔl we dɛn bin de kray lawd wan na dɛn bed dɛn.
Dɛn de kɔt kɔt dɛnsɛf fɔ dɛn it ɛn nyu wayn;Dɛn tɔn agens mi.
15 Pan ɔl we a tich dɛn ɛn gi dɛn trɛnk,*Dɛn de agens mi, dɛn de plan bad tin dɛn.
16 Dɛn mek chenj dɛn, bɔt dɛn nɔ du bɛtɛ tin,*Pɔsin nɔ de ebul fɔ abop pan dɛn jɔs lɛk bo we lus.
Dɛn go kil dɛn prins dɛn wit sɔd bikɔs ɔf dɛn fityay tɔk dɛn.
Dis go mek dɛn provok dɛn na Ijipt.”
Futnot Dɛn
^ Ɔ i kin bi, “Dɛn at tan lɛk ovin as dɛn de kam wit dɛn sikrit plan dɛn.”
^ Insay Ibru, “jɔj dɛn.”
^ Insay Ibru, “nɔ gɛt at.”
^ Insay Ibru, “dɛn an dɛn.”
^ Dat na, nɔto to tru wɔship we bɛtɛ pas ɔl.
