Romans 13:1-14
13 Lɛ ɔlman put insɛf ɔnda di wan dɛn we gɛt pawa, bikɔs na Gɔd alaw dɛn fɔ gɛt pawa. Ɛn na Gɔd alaw dɛn fɔ de na di difrɛn difrɛn pozishɔn dɛn we dɛn de.
2 So ɛnibɔdi we de agens di wan dɛn we gɛt pawa de agens Gɔd in arenjmɛnt; di wan dɛn we de agens in arenjmɛnt go briŋ jɔjmɛnt pan dɛnsɛf.
3 Di wan dɛn we de du gud nɔ fɔ fred di wan dɛn we de rul, bɔt di wan dɛn we de du bad fɔ fred dɛn. If yu nɔ want fɔ fred dɛn, kɔntinyu fɔ du wetin gud ɛn dɛn go prez yu fɔ dat;
4 dɛn na Gɔd in savant dɛn we de wok fɔ bɛnifit yu. Bɔt if yu de du wetin bad, na fɔ fred dɛn bikɔs nɔto fɔ natin mek dɛn ol di sɔd. Dɛn na Gɔd in savant dɛn we de pul wamat pan* di wan dɛn we de du wetin bad.
5 So gud rizin de fɔ mek una put unasɛf ɔnda dɛn, nɔto jɔs bikɔs ɔf di wamat, bɔt na fɔ una yon kɔnshɛns bak.
6 Na dat mek una de pe taks dɛn; bikɔs dɛn na Gɔd in pɔblik savant dɛn we de du dis wok ɔltɛm.
7 Una gi dɛn ɔl wetin dɛn fɔ gɛt: una pe taks to di wan dɛn we aks fɔ taks; if dɛn aks una fɔ pe ɔda kayn taks, una pe am. Di wan we want mek una fred am, una fred am; di wan we want mek una ɔnɔ am, una ɔnɔ am.
8 Una nɔ fɔ o ɛnibɔdi ɛnitin; di wangren tin we una fɔ o pɔsin na lɔv; bikɔs ɛnibɔdi we lɛk in kɔmpin mɔtalman dɔn du wetin di lɔ se.
9 Di lɔ we se, “Yu nɔ fɔ lɛf yu man ɔ wɛf ɛn go du mami ɛn dadi biznɛs wit ɔda pɔsin, yu nɔ fɔ kil pɔsin, yu nɔ fɔ tif, yu nɔ fɔ milɛ,” ɛn ɔl di ɔda lɔ dɛn, de insay dis lɔ we se: “Yu fɔ lɛk yu neba lɛk aw yu lɛk yusɛf.”
10 Pɔsin we gɛt lɔv nɔ de du bad to in neba; so we pɔsin gɛt lɔv, i dɔn du wetin di lɔ se.
11 Una du dis bikɔs una no us sizin dis. Di tɛm fɔ lɛ una wek pan slip dɔn ɔlrɛdi kam. Di tɛm fɔ mek wi sev dɔn kam nia naw pas di tɛm we wi bin jɔs biliv di Masta.
12 Di nɛt dɔn go fa; di de dɔn kam nia. So lɛ wi trowe di tin dɛn we gɛt fɔ du wit daknɛs ɛn mek wi wɛr di layt in wɛpɔn dɛn.
13 Lɛ wi waka fayn lɛk se na santɛm, lɛ wi nɔ miks pan wayl pati dɛn, mek wi nɔ drink te wi chak, mek wi nɔ du mami ɛn dadi biznɛs di we aw Gɔd nɔ want, mek wi nɔ du tin dɛn we de sho se wi nɔ gɛt wan shem ɛn rɛspɛkt,* lɛ wi nɔ mek plaba ɛn jɛlɔs.
14 Bɔt una wɛr Masta Jizɔs Krays, ɛn una nɔ go de plan bifo tɛm fɔ du di tin dɛn we di bɔdi want.
