Romans 2:1-29
2 Padi, ilɛk udat yu bi, yu nɔ gɛt ɛni ɛksyuz if yu jɔj pɔsin. We yu jɔj ɔda pɔsin, yu de kɔndɛm yusɛf, bikɔs yu we de jɔj de du di sem tin.
2 Wi no se we Gɔd de jɔj di wan dɛn we de du dɛn tin ya, i de jɔj di kɔrɛkt we.
3 Padi, yu tink se we yu de jɔj di wan dɛn we de du dɛn tin ya, we i bi se yusɛf de du dɛn, yu go rɔnawe pan Gɔd in jɔjmɛnt?
4 Gɔd rili gud, ɛn i de rili bia ɛn peshɛnt. Fɔ se yu nɔ tek dis mek natin, bikɔs yu nɔ no se na we Gɔd gud na in mek i de tray fɔ mek yu ripɛnt?
5 Bɔt bikɔs yu de mek trangayes ɛn yu nɔ want fɔ ripɛnt, yu de mek Gɔd de vɛks pan yu mɔ ɛn mɔ. I go sho se i rili vɛks di de we i de jɔj mɔtalman, ɛn i go jɔj di rayt we.
6 Ɛn i go pe ɔlman fɔ wetin i du:
7 di wan dɛn we de fɛn glori, ɔnɔ, ɛn bɔdi we nɔ de rɔtin go gɛt layf we go de sote go if dɛn nɔ taya fɔ du wetin gud;
8 bɔt di wan dɛn we lɛk plaba, we nɔ de fala di trut, ɛn we nɔ de du wetin rayt, Gɔd go pul in wamat ɛn vɛksteshɔn pan dɛn.
9 Ɛnibɔdi* we de du wetin bad go gɛt trɔbul ɛn sɔfa. I go apin fɔs to di Ju dɛn, dɔn to di Grik dɛn.
10 Bɔt ɛnibɔdi we de du wetin gud go gɛt glori, ɔnɔ, ɛn pis. I go apin fɔs to di Ju dɛn, dɔn to di Grik dɛn,
11 bikɔs Gɔd nɔ de tek wan pɔsin bɛtɛ pas ɔda pɔsin.
12 Ɔl di wan dɛn we sin bikɔs dɛn nɔ gɛt Lɔ, go day pan ɔl we dɛn nɔ gɛt Lɔ; bɔt ɔl di wan dɛn we gɛt Lɔ, bɔt dɛn sin, na di Lɔ go jɔj dɛn.
13 Nɔto di wan dɛn we de yɛri di Lɔ de du wetin rayt bifo Gɔd, bɔt na di wan dɛn we de du wetin di Lɔ se, na dɛn Gɔd go tɔk se de du wetin rayt.
14 We pipul dɛn na ɔda neshɔn dɛn, we nɔ gɛt Lɔ, de du di tin dɛn we di Lɔ se, pan ɔl we dɛn nɔ gɛt Lɔ, dɛn gɛt sɔntin we tan lɛk lɔ insay dɛn.
15 Dɛn na di sem wan dɛn we de sho se di Lɔ de na dɛn at, ɛn dɛn ɛn dɛn kɔnshɛns na witnɛs, ɛn we dɛn de tink, dɛn de no if dɛn dɔn du bad ɔ dɛn nɔ du bad.
16 Dis go apin di de we Gɔd go yuz Krays Jizɔs fɔ jɔj di tin dɛn we mɔtalman de ayd, jɔs lɛk aw di gud nyuz we a de prich se.
17 Yu we se yu na Ju ɛn yu abop pan di lɔ ɛn yu gladi we yu na Gɔd in padi,
18 yu no wetin i want ɛn yu ebul no di tin dɛn we rili impɔtant, bikɔs dɛn tich yu di Lɔ.
19 Yu biliv se yu na pɔsin we de sho blaynman rod, yu na layt fɔ di wan dɛn we de na dak,
20 yu de kɔrɛkt di wan dɛn we nɔ gɛt sɛns, yu de tich smɔl pikin dɛn, ɛn yu ɔndastand di men tin dɛn ɛn tru tin dɛn na di Lɔ—
21 bɔt yu we de tich ɔda pɔsin, yu nɔ de tich yusɛf? Yu we de prich se, “Nɔ tif,” yu de tif?
22 Yu we de se, “Pɔsin nɔ fɔ lɛf in man ɔ wɛf ɛn go du mami ɛn dadi biznɛs wit ɔda pɔsin,” yu de lɛf yu man ɔ wɛf ɛn go du mami ɛn dadi biznɛs wit ɔda pɔsin? Yu we rili et aydɔl, yu de tif na tɛmpul dɛn?
23 Yu we gladi fɔ di lɔ, yu de sho se yu nɔ de ɔnɔ Gɔd bay we yu nɔ de obe di Lɔ?
24 “Una de mek pipul dɛn na ɔda neshɔn dɛn de tɔk bad bɔt Gɔd in nem,” jɔs lɛk aw dɛn bin dɔn rayt.
25 Di tin nɔmɔ we go mek di sakɔmsayz we yu sakɔmsayz gɛt bɛnifit na we yu de obe di lɔ, bɔt if yu nɔ de obe di lɔ, i go jɔs tan lɛk se yu nɔ sakɔmsayz pan ɔl we yu sakɔmsayz.
26 So if pɔsin we nɔ sakɔmsayz de du di rayt tin dɛn we di Lɔ se, i go jɔs tan lɛk se i sakɔmsayz, pan ɔl we i nɔ sakɔmsayz, nɔto so?
27 Ɛn we pɔsin we nɔ sakɔmsayz de obe di Lɔ, i de jɔj yu we nɔ de obe lɔ, pan ɔl we yu gɛt di lɔ we dɛn rayt ɛn yu sakɔmsayz.
28 Nɔto pɔsin in bɔdi de mek i bi Ju, ɛn sakɔmsishɔn nɔto sɔntin we de pan pɔsin in bɔdi.
29 Bɔt na aw pɔsin tan insay, na in de mek i bi Ju, ɛn na in at sakɔmsayz; na di spirit du dat, nɔto lɔ we dɛn rayt. Na Gɔd de prez dis kayn pɔsin, nɔto pipul dɛn.
Futnot Dɛn
^ Ɔ “Ɛni sol.”
