Romans 5:1-21
5 So naw we Gɔd dɔn tɔk se wi na pipul dɛn we de du wetin rayt bikɔs wi gɛt fet, lɛ wi ɛnjɔy di pis we wi Masta Jizɔs Krays dɔn mek wi gɛt wit Gɔd.
2 Bikɔs wi gɛt fet pan Jizɔs, dat dɔn opin di we fɔ mek wi ɛnjɔy Gɔd in spɛshal gudnɛs* we wi gɛt naw. Lɛ wi gladi bikɔs wi gɛt op fɔ gɛt Gɔd in glori.
3 Bɔt apat frɔm dat, lɛ wi gladi we wi gɛt prɔblɛm dɛn, bikɔs wi no se prɔblɛm de mek wi bia;
4 we wi bia, dat de mek Gɔd gladi fɔ wi; ɛn we Gɔd gladi fɔ wi, dat de mek wi gɛt op,
5 ɛn wi go mɔs gɛt wetin wi op fɔ; bikɔs Gɔd dɔn yuz in oli spirit we i gi wi fɔ sho se i lɛk wi.
6 Infakt, we wi bin stil wik, Krays day fɔ sina dɛn we di tɛm rich.
7 I nɔ izi fɔ mek sɔmbɔdi day fɔ pɔsin we de du wetin rayt; bɔt sɔntɛm pɔsin go gɛt maynd fɔ day fɔ sɔmbɔdi we gud.
8 Bɔt Gɔd sho se i lɛk wi we i mek Krays day fɔ wi di tɛm we wi na sina dɛn.
9 Bikɔs in blɔd dɔn mek Gɔd tɔk se wi de du wetin rayt, wi rili shɔ se i go mek Gɔd nɔ vɛks pan wi.
10 If di tɛm we wi ɛn Gɔd na bin ɛnimi, wi bin ebul fɔ gɛt pis wit am tru di day we in Pikin day, dat min se naw we wi dɔn gɛt pis wit am, in Pikin in layf go mɔs mek wi sev.
11 Bɔt nɔto dat nɔmɔ, wi de gladi bak fɔ di padi biznɛs we wi gɛt wit Gɔd tru wi Masta Jizɔs Krays, we dɔn mek wi gɛt pis wit Gɔd.
12 Na dat mek jɔs lɛk aw wan man mek sin kam na di wɔl ɛn sin briŋ day, ɛn ɔlman de day bikɔs dɛn ɔl dɔn sin—.
13 Sin bin de na di wɔl bifo di Lɔ kam, bɔt dɛn nɔ de tɛl ɛnibɔdi se i dɔn sin we lɔ nɔ de.
14 Bɔt frɔm Adam in tɛm te to Mozis in tɛm, day bin de rul as kiŋ; i ivin rul di wan dɛn we nɔ sin lɛk Adam, we fiba di wan we gɛt fɔ kam.
15 Bɔt di gift nɔ tan lɛk di sin. If wan man in sin mek bɔku pipul dɛn day, wetin naw wi go se bɔt Gɔd in spɛshal gudnɛs* ɛn di fri gift we go mek bɔku pipul dɛn rili bɛnifit, we kam tru wan man in spɛshal gudnɛs,* we na Jizɔs Krays?
16 Di fri gift ɛn di tin dɛn we apin we wan man sin, nɔto di sem. Wan sin mek Gɔd kɔndɛm ɔlman, bɔt afta bɔku pipul dɛn dɔn sin, i gi dɛn gift we mek i tɔk se dɛn de du wetin rayt.
17 If wan man in sin mek day rul as kiŋ, dat min se di wan dɛn we dɔn rili gɛt Gɔd in spɛshal gudnɛs* ɛn di fri gift we mek i de si dɛn as pipul dɛn we de du wetin rayt go liv ɛn rul as kiŋ dɛn, bikɔs ɔf wan pɔsin we na Jizɔs Krays.
18 So jɔs lɛk we wan man in sin dɔn mek Gɔd kɔndɛm ɔlkayn pipul dɛn, na so bak di rayt tin we wan man du dɔn mek Gɔd tɔk se ɔlkayn pipul dɛn de du wetin rayt ɛn fit fɔ gɛt layf.
19 Jɔs lɛk aw wan man we nɔ obe dɔn mek bɔku pipul dɛn bi sina, na so bak di obe we wan man obe go mek bɔku pipul dɛn bi pipul dɛn we de du wetin rayt.
20 Di Lɔ kam fɔ mek sin bɔku. Bɔt usay sin bɔku, Gɔd in spɛshal gudnɛs* de bɔku mɔ ɛn mɔ.
21 Wetin mek? So dat jɔs lɛk we sin rul as kiŋ wit day, na so bak Gɔd in spɛshal gudnɛs* go rul as kiŋ bikɔs ɔf wetin rayt. Dis go mek wi gɛt layf we go de sote go tru Jizɔs Krays wi Masta.
Futnot Dɛn
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
