Romans 6:1-23
6 Wetin wi go se naw? Wi fɔ kɔntinyu fɔ sin so dat Gɔd in spɛshal gudnɛs* go bɔku mɔ ɛn mɔ?
2 Nɔ-o! Naw we i tan lɛk se wi dɔn day we i kam pan sin, wetin mek wi fɔ kɔntinyu fɔ sin?
3 Ɔ una nɔ no se wi ɔl we baptayz insay Krays Jizɔs baptayz insay in day?
4 So dɛn bɛr wi wit am we wi baptayz insay in day, so dat jɔs lɛk aw Krays gɛt layf bak tru di Papa in pawa,* na so wisɛf fɔ liv nyu layf.
5 If wi dɔn gɛt wanwɔd wit am we wi day lɛk aw i day, wi go gɛt wanwɔd wit am bak we wi gɛt layf bak lɛk aw i bin gɛt layf.
6 Wi no se dɛn nel wi ol abit dɛn na di tik we dɛn nel am fɔ mek wi bɔdi we de sin nɔ gɛt pawa igen, so dat wi nɔ go kɔntinyu fɔ bi sin in slev dɛn igen.
7 We pɔsin day, i dɔn fri frɔm in sin.*
8 Pantap dat, if wi dɔn day wit Krays, wi biliv se wi go liv bak wit am.
9 Wi no se naw we Krays dɔn gɛt layf bak, i nɔ go day igen; day nɔto in masta igen.
10 I day wan tɛm nɔmɔ fɔ pul sin, bɔt i de liv in layf fɔ Gɔd.
11 Semweso, una fɔ tek unasɛf lɛk pipul dɛn we dɔn day we i kam pan sin, ɛn liv una layf fɔ Gɔd bikɔs una na Krays Jizɔs in disaypul dɛn.
12 So una nɔ alaw sin fɔ kɔntinyu fɔ rul as kiŋ insay una bɔdi we de day, so dat una nɔ go du di tin dɛn we una bɔdi want.
13 Ɛn una nɔ kɔntinyu fɔ gi una bɔdi dɛn to sin as wɛpɔn dɛn fɔ du wetin nɔ rayt, bɔt una gi una bɔdi to Gɔd lɛk di wan dɛn we dɔn gɛt layf bak, ɛn una gi una bɔdi dɛn bak to Gɔd as wɛpɔn dɛn fɔ du wetin rayt.
14 Sin nɔ fɔ bi una masta, bikɔs nɔto lɔ una de fala, na Gɔd in spɛshal gudnɛs* de pan una.
15 Wetin wi go se naw? Fɔ se wi fɔ sin bikɔs wi nɔ de fala lɔ, na Gɔd in spɛshal gudnɛs* de pan wi? Nɔ-o!
16 Una nɔ no se if una gi unasɛf to ɛnibɔdi as slev ɛn obe am, una na slev to di wan we una de obe, ilɛksɛf na to sin we go mek una day, ɔ una de obe so dat una go bi pɔsin we de du wetin rayt?
17 Bɔt a tɛl Gɔd tɛnki bikɔs pan ɔl we una na bin sin in slev dɛn, naw ɔl di tin dɛn we dɛn bin dɔn tich una, una de du dɛn wit ɔl una at.
18 Fɔ tru, frɔm we Gɔd pul una pan sin, una dɔn bi slev fɔ du wetin rayt.
19 A de tɔk lɛk mɔtalman bikɔs una nɔ pafɛkt. Jɔs lɛk aw una bin gi una bɔdi as slev fɔ du dɔti tin dɛn ɛn bad tin dɛn we mek una bin de du bad tin dɛn, una gi una bɔdi naw as slev fɔ du wetin rayt we go mek una oli.
20 We una na bin sin in slev dɛn, una nɔto bin slev fɔ du wetin rayt.
21 Wetin una gɛt frɔm di tin dɛn we una bin de du dɛn tɛm dɛn de? Na tin dɛn we de mek una shem naw. Na day dɛn tin dɛn de kin ɛnd-ɔp pan.
22 Bɔt naw we Gɔd dɔn pul una pan sin ɛn una dɔn bi Gɔd in slev dɛn, una de du tin dɛn we de mek una layf oli, ɛn dat go mek una gɛt layf we go de sote go.
23 Sin in pe na day, bɔt di gift we Gɔd de gi na layf we go de sote go tru Krays Jizɔs wi Masta.
Futnot Dɛn
^ Rid Baybul Wɔd dɛn Minin.
^ Insay Grik, “glori.”
^ Ɔ “Gɔd dɔn fɔgiv in sin.”
^ Rid Baybul Wɔd dɛn Minin.
^ Rid Baybul Wɔd dɛn Minin.
