Romans 7:1-25
7 Mi brɔda dɛn, fɔ se una nɔ no (bikɔs a de tɔk to di wan dɛn we no lɔ) se di Lɔ na masta fɔ pɔsin wans i de alayv?
2 Fɔ ɛgzampul, akɔdin to lɔ, mareduman go de wit in man we in man de alayv; bɔt we in man day, i nɔ de ɔnda in man in lɔ igen.
3 So if i go mared to ɔda man we in man de alayv, dɛn go se i bambot. Bɔt if in man day, i nɔ de ɔnda in man in lɔ igen, so if i go mared to ɔda man nɔto bambot layf dat.
4 So, mi brɔda dɛn, Krays in bɔdi dɔn mek una day we i kam pan di Lɔ, so dat una go bi ɔda pɔsin in yon, dat na, di wan we gɛt layf bak, fɔ lɛ wi du tin dɛn fɔ Gɔd.
5 We wi bin de du tin dɛn we wi bɔdi want, di Lɔ bin de mek wi no se di bad tin dɛn we wi bɔdi want bin de mek wi bɔdi sin, ɛn da sin de bin de mek wi day.
6 Bɔt naw wi nɔ de ɔnda di Lɔ igen, bikɔs di tin we bin de stɔp wi nɔ de kɔntrol wi igen, so dat di spirit go mek wi bi slev nyu we; nɔto lɛk di ol we, di tɛm we wi bin gɛt di Lɔ we dɛn rayt.
7 Wetin wi go se naw? Fɔ se di Lɔ na sin? Nɔ-o! Fɔ tru, a nɔ bin fɔ no bɔt sin if di Lɔ nɔ bin de. Fɔ ɛgzampul, a nɔ bin fɔ no bɔt milɛ if di Lɔ nɔ bin se: “Yu nɔ fɔ milɛ.”
8 Sin yuz di chans we di lɔ gi, fɔ mek a milɛ ɔlkayn we; if lɔ nɔ bin de, sin dɔn day.
9 Infakt, we lɔ nɔ bin de, a bin de alayv. Bɔt we lɔ kam, sin gɛt layf bak, bɔt mi day.
10 Ɛn a si se di lɔ we fɔ briŋ layf, nain de briŋ day.
11 Sin yuz di chans we di lɔ gi ɛn ful mi ɛn mek a day.
12 So di Lɔ oli, ɛn di tin dɛn we di Lɔ se oli, dɛn rayt, ɛn dɛn gud.
13 So fɔ se na gud tin mek a day? Nɔ-o! Na sin mek a day. Sin yuz wetin gud fɔ mek a day fɔ sho wetin na sin, ɛn di lɔ de sho se sin na sɔntin we rili bad.
14 Wi no se di Lɔ kɔmɔt to Gɔd, bɔt mi na mɔtalman, we dɛn dɔn sɛl to sin.
15 A nɔ ɔndastand wetin a de du. A nɔ de du wetin a want, na wetin a et na in a de du.
16 Bɔt if a de du wetin a nɔ want, a gri se di Lɔ fayn.
17 Bɔt naw nɔto mi de du am igen, na di sin we de insay mi.
18 A no se insay mi, dat na, mi bɔdi, natin nɔ de de we gud; a kin want fɔ du wetin fayn, bɔt a nɔ kin ebul du am.
19 A nɔ de du di gud tin we a want, na di bad tin we a nɔ want na in a de du.
20 So if a de du wetin a nɔ want fɔ du, dat min se nɔto mi de du am, na di sin we de insay mi na in de du am.
21 Wan lɔ de we de afɛkt mi: We a want fɔ du wetin rayt, na bad tin a kin fil fɔ du.
22 Insay mi at, a rili lɛk Gɔd in lɔ,
23 bɔt insay mi bɔdi wan ɔda lɔ de we de fɛt di lɔ we de na mi maynd, ɛn i de mek a bi slev to sin in lɔ we de insay mi bɔdi.
24 Mi na man we sɔri! Udat go sev mi frɔm dis bɔdi we de mek a day dis kayn day?
25 A de tɛl Gɔd tɛnki tru Jizɔs Krays wi Masta! So na mi maynd mi na slev to Gɔd in lɔ, bɔt na mi bɔdi mi na slev to sin in lɔ.
