Sam 22:1-31
To di wan we de dayrɛkt; di myuzik we nem “Uman Dia na Mɔnin.”* Devid in siŋ.
22 Mi Gɔd, mi Gɔd, wetin mek yu dɔn lɛf mi?
Wetin mek yu nɔ de kam fɔ sev mi?Wetin mek yu nɔ de yɛri di kray we a de kray we a de sɔfa?
2 Mi Gɔd, a kin kɔl yu ol de, bɔt yu nɔ de ansa mi,Ɛn na nɛt a nɔ kin sɛt mi mɔt.
3 Bɔt yu oli,Di prez we Izrɛl de prez yu de rawnd yu.
4 Na yu wi papa dɛn de abop pan;Dɛn bin abop pan yu, ɛn yu kɔntinyu fɔ sev dɛn.
5 Na yu dɛn bin de kray to, ɛn yu bin de sev dɛn;Dɛn bin abop pan yu, ɛn yu nɔ bin mek dɛn shem.
6 Pipul dɛn bin de laf mi ɛn dɛn nɔ tek mi mek natin,Lɛk se mi nɔto mɔtalman, mi na tumbu.
7 Ɔl di wan dɛn we de si mi de provok mi;Dɛn de laf mi ɛn shek dɛn ed se:
8 “I dɔn abop pan Jiova. Lɛ I sev am!
Lɛ I sev am, bikɔs i rili lɛk Am!”
9 Yu na di Wan we pul mi kɔmɔt na mi mama in bɛlɛ,Na yu bin mek a fil sef we a de sɔk mi mama in bɔbi.
10 Na yu bin dɔn de kia fɔ mi frɔm we dɛn bɔn mi;Frɔm we a de na mi mama in bɛlɛ, yu dɔn bi mi Gɔd.
11 Nɔ go fa frɔm mi, bikɔs trɔbul de nia mi,Ɛn a nɔ gɛt no ɔda pɔsin fɔ ɛp mi.
12 Bɔku yɔŋ man kaw dɛn sɔrawnd mi;Pawaful man kaw dɛn we kɔmɔt na Beshan de rawnd mi.
13 Dɛn opin dɛn mɔt big wan pan mi,Lɛk layɔn we de ala we i de chɛr chɛr animal we i dɔn kech.
14 A nɔ gɛt trɛnk igen, a tan lɛk dɔti wata we dɛn dɔn trowe;Ɔl mi bon dɛn dɔn kɔmɔt na dɛn jɔynt dɛn.
Mi at dɔn tan lɛk waksWe de mɛlt na mi chɛst.
15 A dɔn fiba kɔntri pɔt, a nɔ gɛt trɛnk igen;Mi tɔŋ dɔn fasin na mi mɔt;Yu dɔn briŋ mi kam na di ol fɔ lɛ a day.
16 Bɔku bɔku bad pipul dɛn de rawnd mi,Dɛn sɔrawnd mi lɛk dɔg dɛn;Dɛn de bɛt mi an ɛn mi fut dɛn lɛk layɔn.
17 A ebul kɔnt ɔl mi bon dɛn.
Dɛn de kɔntinyu fɔ de wach mi.
18 Dɛn sheb mi klos to dɛnsɛf,Ɛn dɛn balɔt fɔ mi klos.
19 Bɔt yu, E Jiova, nɔ kɔntinyu fɔ de fa frɔm mi.
Na yu de gi mi trɛnk, duya mekes ɛp mi.
20 Sev mi frɔm di sɔd,Pul mi kɔmɔt na di dɔg dɛn an;
21 Sev mi frɔm di layɔn in mɔt ɛn frɔm di bush kaw dɛn ɔn;Ansa mi ɛn sev mi.
22 A go tɔk bɔt yu nem to mi brɔda dɛn;A go prez yu midul di kɔngrigeshɔn.
23 Una we de fred Jiova, una prez am!
Ɔl Jekɔp in pikin dɛn, una gi am glori!
Ɔl Izrɛl in pikin dɛn, una kɔle ɛn wɔnda pan am.
24 I nɔ ovaluk di sɔfa we di wan we dɛn de sɔprɛs de sɔfa;I nɔ ayd in fes pan am.
We i kray to am fɔ ɛp, i yɛri.
25 A go prez yu usay bɔku bɔku pipul dɛn de;A go du wetin a dɔn vaw bifo di wan dɛn we de fred yu.
26 Di wan dɛn we ɔmbul go it ɛn satisfay;Di wan dɛn we de luk fɔ Jiova go prez am.
Lɛ dɛn ɛnjɔy dɛn layf sote go.
27 Ɔl di pipul dɛn na di wɔl go mɛmba Jiova ɛn tɔn to am.
Ɔl di famili dɛn na di neshɔn dɛn go butu bifo am.
28 Jiova na di Kiŋ;I de rul oba di neshɔn dɛn.
29 Ɔl di jɛntriman dɛn na di wɔl go it, ɛn dɛn go butu bifo am;Ɔl di wan dɛn we de go dɔŋ na di dɔti go nil dɔŋ bifo am;Dɛn nɔn nɔ ebul sev dɛn layf.
30 Dɛn pikin dɛn go wɔship am;Dɛn go tɛl di pikin dɛn we dɛn nɔ bɔn yet bɔt Jiova.
31 Dɛn go tɔk bɔt di we aw i de du wetin rayt.
Dɛn go tɛl pipul dɛn we dɛn nɔ bɔn yet wetin i du.
Futnot Dɛn
^ I kin min wan tyun ɔ myuzik stayl.
