Sam 34:1-22
Wan siŋ we Devid rayt. Di siŋ de bɔt di tɛm we i bin mek lɛk se i kres bifo Abimilɛk.
א [Alɛf]
34 A go prez Jiova ɔltɛm;A nɔ go stɔp fɔ prez am.
ב [Bɛt]
2 A go bost bɔt Jiova;Di wan we ɔmbul go yɛri ɛn gladi.
ג [Gimɛl]
3 Jɔyn mi fɔ prez Jiova;Lɛ wi ɔnɔ in nem togɛda.
ד [Dalɛt]
4 A pre to Jiova, ɛn i ansa mi.
I sev mi frɔm ɔl di tin dɛn we a bin de fred.
ה [I]
5 Di wan dɛn we de luk to am, dɛn fes go shayn;Dɛn nɔ go shem.
ז [Zayin]
6 Dis pɔsin we pipul dɛn nɔ tek mek natin pre to Jiova, ɛn i yɛri am.
I sev am frɔm ɔl in prɔblɛm dɛn.
ח [Ɛt]
7 Jiova in enjɛl de rawnd di wan dɛn we de fred Am,Ɛn i de sev dɛn.
ט [Tɛt]
8 Tes ɛn si se Jiova gud;Di pɔsin we de go to am fɔ ayd gɛt gladi-at.
י [Yɔd]
9 Una fred Jiova, una ɔl we na in oli wan dɛn,Bikɔs di wan dɛn we de fred am go gɛt wetin dɛn nid.
כ [Kaf]
10 Ivin strɔng yɔŋ layɔn dɛn nɔ kin gɛt tin fɔ it,Bɔt di wan dɛn we de luk fɔ Jiova go gɛt ɔl wetin dɛn nid.
11 Una kam, mi pikin dɛn, una lisin to mi;A go tich una wetin i min fɔ fred Jiova.
מ [Mɛm]
12 Udat de pan una we want fɔ gɛt gladi-at na layfƐn we go want fɔ gɛt lɔng layf?
נ [Nɔn]
13 If na so i bi, tek tɛm lɛ yu tɔŋ nɔ tɔk wetin bad,Lɛ yu mɔt nɔ tɔk lay lay tin dɛn.
ס [Samɛk]
14 Avɔyd wetin bad ɛn du wetin gud;Luk fɔ pis ɛn tray tranga wan fɔ gɛt am.
ע [Ayin]
15 Jiova in yay de pan di wan dɛn we de du wetin rayt,Ɛn i de lisin to dɛn we dɛn kray to am fɔ ɛp.
פ [Pe]
16 Bɔt Jiova de tɔn in fes pan di wan dɛn we de du wetin bad,Fɔ mek nɔbɔdi nɔ mɛmba dɛn na di wɔl.
צ [Sada]
17 Dɛn kray to Jiova, ɛn i yɛri dɛn;I sev dɛn frɔm ɔl dɛn prɔblɛm dɛn.
ק [Kof]
18 Jiova de nia di wan dɛn we gɛt pwɛlat;I de sev di wan dɛn we dɛn at rili pwɛl.
ר [Resh]
19 Di wan we de du wetin rayt kin gɛt bɔku prɔblɛm dɛn,Bɔt Jiova kin sev am frɔm ɔl in prɔblɛm dɛn.
ש [Shin]
20 I de protɛkt ɔl in bon dɛn;Dɛn nɔ brok nɔn pan dɛn.
ת [Tɔ]
21 Trɔbul go mek di wikɛd wan day;Di wan dɛn we et di wan we de du wetin rayt go gilti.
22 Jiova de sev in savant dɛn,Nɔn pan di wan dɛn we de go to am fɔ ayd go gilti.
