Sam 36:1-12
To di wan we de dayrɛkt. Devid we na Jiova in savant in siŋ.
36 Na bad tin de gayd di wikɛd wan in at;I nɔ de fred Gɔd atɔl.
2 I de tink se i tu impɔtant na in yon yayFɔ si in mistek dɛn ɛn et dɛn.
3 Di wɔd dɛn we i de tɔk bad ɛn de ful pipul dɛn;I nɔ de sho se i gɛt sɛns fɔ du wetin gud.
4 I de plan bad ivin we i ledɔm na in bed.
I de pas na rod we nɔ gud;I nɔ de avɔyd wetin bad.
5 E Jiova, yu lɔv we nɔ de chenj de rich na ɛvin,Di we aw yu fetful de rich ɔp na di klawd.
6 Di we aw yu de du wetin rayt tan lɛk big big mawntin dɛn;*Yu jɔjmɛnt dɛn tan lɛk wata we big ɛn dip.
E Jiova, yu de sev mɔtalman ɛn animal.
7 E Gɔd, yu lɔv we nɔ de chenj rili valyu!
Na ɔnda yu wiŋ dɛn,
Mɔtalman dɛn de go fɔ go ayd.
8 Dɛn de drink di bɛst tin dɛn na yu os te dɛn satisfay,Yu de gi dɛn bɔku gud tin dɛn jɔs lɛk aw riva de flo.
9 Na yu de gi layf;Na yu layt de mek wi si layt.
10 Kɔntinyu fɔ sho yu lɔv we nɔ de chenj to di wan dɛn we sabi yu,Ɛn di we aw yu de du wetin rayt to di wan dɛn we de du wetin rayt na dɛn at.
11 Nɔ mek prawd pɔsin in fut waka pan mi,Ɛn nɔ mek wikɛd pɔsin in an drɛb mi.
12 Na de di wan dɛn we de du bad dɔn fɔdɔm;Dɛn dɔn ib dɛn dɔŋ, ɛn dɛn nɔ ebul fɔ grap bak.
Futnot Dɛn
^ Insay Ibru, “lɛk Gɔd in mawntin dɛn.”
